Esekyel 5 - Fanawbuid tagsibaliwas Fakayabian

Furuan Erusalem nu Kaiklas

¹ Dius nalong angku te, “Taw at baguama, namul o sik fiso at maglat, fangufo am buk ay am umi. Sanya ginan, namabudbungguan o ay afudi sas tulu am buk ay am umi.

² Taguna fag afud namoli o sam natagis fag furuan Erusalem. Ay nangirug o sas wabilug furuan nu ntabu wo gfalag nu setain furuan Erusalem nu gababawan. Ay at faduak afud, gatvngi ay fatunglui sas furuan daul. Ay at sawad, falayugi wan sas tagmara. Aroro namabul kban ku ngay taw siginan sik fiso tagsumbalian at uyup.

³ Dewa katanya, fasawadi tiba sirut am buk ay sifigi sam lanbung.

⁴ Buli yap fia tiba am buk ay irugi. Ay kanya ro gbia nu gigang ay kafagdaul laman nangirug fagdaul Israel.

⁵ “Au, Yawi ay Fun, glong au te, katanya ban takadasug sas furuan Erusalem, ku nafili fag furuan sas fagdaul daga.

⁶ Kanya fag furuan nafamabo ku ngay suguan ay amauri yap tua tagsit ligung fag ngay talun. Ay kanya fag ngay taw wa nafaning ku ngay suguan ay ku ngay faugali.

⁷ Au, Yawi ay Fun, glong kyay fia te, ngay taw Erusalem, nu mauri am, aksvn yap tua tagsi ay ligung fag ngay talun. Aroro wam nafaning ku ngay suguan ay ku ngay faugali, ay nusdi at munakbang si ayu fag ngay talun at ngay faugali wam nafaning.

⁸ Nu katanya, Au, Yawi ay Fun, kadotama au ayu. Namaurianan kban ayu sa sangay talun at daga salubangan.

⁹ Aroro ay ngay fakamulun maksvn wan nu mauri, namakamulun kban sa ayu ku nayud yay batang gfakamulun ay ku fagyudun ban gfakamulun ya.

¹⁰ Nu katanya, at ngay fagtainan ban kon wan at ngay sisian ay at ngay sisian ban kon wan at ngay fagtainan. Namaurianan kban ayu, ay at sawad ban namasaruayan au sas fagdaul daga.

¹¹ Au, Fun Dius Yawi, gfatuyanan au te, kafanud nu gleleg au, namamin kban ayu, ay kwa ban kafanyu ya ayu, aroro nafasuya am ku bale siginan nu gseg am at yud matuyan fag ngay fagsegan ay siginan nu gfakamulun am nusnga setaw fag ngay fakamulun at maksvn nu mauri.

¹² Nangafud kban ayu tuluk afud. Taguna ban fag afud kabul sis furuan daul siginans lunus ay fakasaitun. Ay at fadua bank afud, nangabul sas day furuan daul siginans fiso tagsumbalian at uyup. Ay at fatulu bank afud, namasaruayan au sas fagdaul daga ay gfataglayun kyay ban fia gfaurianan.

¹³ “Nu nfasludan waban takatanya, kwa ban kadotama ya ayu, nu katanya, nafasud kwan ay ngay nafakamulun mauri. Ay gina kban nafadasug sa ayu takatanya, sumaful ban am te, au Yawi tagfakamatoan ayu aroro maksvn nu kadotama au ayu.

¹⁴ Nanrasras kban ay furuan daul ay tagligung ban ayu fag ngay furuan ay fagayu ban taw tagdalan sa ay furuan gfalingun ayu.

¹⁵ Ay aroro sat kindasug sa ayu, tagligung ban ayu fag ngay talun at ngay taw gfapla ay gfalingun ay gsaruyan ayu. Ay ku faurianan ban sa ayu, sik famararang sa tagligung ayu fag ngay talun at ngay taw. Au, Yawi, taglong tuy.

¹⁶ Gfadasug kban sa ayu sik fanlunus kata sik banyas at masakit gfabul. Gfataglayun ban nu kaksvn fanlunus yakmay ban namin ay fakonun.

¹⁷ Saman ya fanlunus, namadasug kyangay ban sa ayu tagfangagat fag ngay mela ay kanya ban nangon ay ngay sisian. Ay kabul yangay ban am sas fakasaitun ay sa sangay awayan. Au, Yawi, taglong tuy.”