Esekyel 4 - Fanawbuid tagsibaliwas Fakayabian

Taw at Baguama Nafalag nu e Namauri ban Furuan Erusalem

¹ Sanya ginan, Yawi nalong sa angku te, “Taw at baguama, namul o sik gang fangawat bale, ay fasai am daga salubangan ay tagisi sanya furuan Erusalem at aninu.

² Ay fae aninui yangay sanya kata sik ngay fawayan nu namawayan kafag furuan. Ay namoli o ngay agdan sas tigyangan alad gang, ay sis ligung furuan nangawat o sik ngay fagmafulan, ay namul o sik kayu at mabyat fanrufa alad gang.

³ Sanya ginan, namul o sik sanbung marafad kata sik alad gang fanwabilug emu siginans furuan. Sanya ginan, salubangi sas furuan kata nu namawayan o. Ay kanya sik famasaful sa sangay taw Israel te, at ngay fawayan ban namawayan anya fagayu.

⁴ “Sanya ginan, taygilidani sas fawalan, sik famasaful te, gbuba o ngay taw Israel at asalanan, ay nu seyuk menit nu gtaygilidan o, kaduge yangay nya nu gbuba o at asalanan.

⁵ Sik menit kata nu sadik banwa. Ay kaduge ban tuluk sandan siamk safuluk menit gfasanan o ngay taw Israel at asalanan.

⁶ Sanya ginan, abilingi sabaliwa siun ay bubai ngay taw Uda at asalanan kaduge ufatk safuluk menit, sik menit kata nu sadik banwa.

⁷ Dogi yap damai am fagrirukan ay damai furuan Erusalem at aninu at nababawan, ay aringangi sabaliwa sa ngay taw Israel, kaduge am lanbung at take mafalutan.

⁸ Ay gsiuk au emu laman wo mabidbilingan ya yakmay ban antabu nu gfalag o nu e namawayan furuan Erusalem.

⁹ “Bubai yangay trigu ay barli, ay tiba ya takatanya fag rawvg. Fasuglatani kanya fagayu sa sik fagsuadan ay nangawat o tinapay. Kanya ban am fakonun kaduge tuluk sandan siamk safuluk menit kaduge ban o gtaygilidan sas wala baliwa.

¹⁰ Nu kon o kayu menit galay fanfangonan, fabudbungguani duak tagis ay sik wabilug.

¹¹ Ay am fanginum dua wayk taya ay sik wabilug galay o antabu gfangon.

¹² Kayu menit, kaduge ngay taw gdama, fatamai tinapay. Fatamai takatanya kata nu gfatama tinapay siginans trigu. Ay am famaygang taw yakman at kek at kin-gong, ay nu ntama wan, oni wan.

¹³ Aroro katanya ban at kumfasludan sa sangay taw Israel. Kanya ban fagayu kon at masuya fag ngay fakonun sa ku fagnamabanwanan ban fag ngay furuan.”

¹⁴ Sanya ginan, nalong au te, “Yawi, ku Fun, lag o gsugu angku te, fakamuluni takatanya. Nasaful wo, kwa batang gfasuya ku sadili, siginan nu masisian au dasug katsi. Kwa batang kon nusnga setaw fag fagbaugun at kinbul, ay tibak mangilafang at nafabul, ay kwa yangay batang kon nusnga setaw fag fagbaugun at yud masine ay am nafatuyan te, masuya.”

¹⁵ Yawi nabalus angku te, “Nu katanya, am famaygang baka yakman at kek at kin-gong.”

¹⁶ Yawi nalong yay fia te, “Gbuin kban furuan Erusalem at fakonun. Nu katanya, kanya ban fag ngay taw nanginsaful te, seyu ya at fakonun ay at fanginum. Ay kanya ban fagayu maksvn nu gafanawa ay nu gwayway.

¹⁷ Ay kanya ban fagayu gdaddaman way lang gafanawa aroro at fakonun ay at fanginum wa kasakan ya, ay gsadsadian ban kabul aroro sat ngay asalanan.”