Esekyel 3 - Fanawbuid tagsibaliwas Fakayabian

¹ Ay tagfakamatoan angku nalong yay fia te, “Taw at baguama, oni tuy fag fafil at mafalutan, ay loi wan sas talun Israel ay namoyung o sa sangay taw tagbanwan sanya.”

² Nu katanya, nafabia au ku bibig ay kanya nafasamsam sa angku at mafalutan fag fafil.

³ Kanya nalong angku te, “Oni ay apsugi.” Ay naon au, nu kanamnam matamis kata sik deut.

⁴ Sanya ginan, kanya nalong angku te, “Taw at baguama, loi wan sa sangay tagbanwan sis talun Israel ay nanlong o sa anya fagayu ku nalong sa emu.

⁵ Kwa gsugu emu sa tibak taw tagsaman at fangaringang at maidap katogdungug, nu bunway, sa way lang ngay taw tagbanwan sis talun Israel.

⁶ Aroro nu nasugu kro emu sa sangay taw tagsaman at fangaringang, at maidap katogdungug, kanya ro fag ngay taw gdungugan tua emu.

⁷ Dewa katanya, ngay taw Israel ro wa gdungugan emu, aroro kanya fagayu wa kaylat gdungugan angku. Kanya fagayu kamabo ay kamaogatun at amatanganan.

⁸ Dewa katanya, namaksvn au am amatanganan, kaksvn kafag ngay taw nu kamaogatun,

⁹ ay namakata au emu sik gang at matugas. Nu katanya, lag o kalimu, aroro kanya fagayu sik ngay takamabo.”

¹⁰ Ay kanya nalong yay fia angku te, “Taw at baguama, dungugani fia ay amatangi ku ngay nalong emu.

¹¹ Loi wan sam ngay kaiban at natabanan yangay gasfuan emu, ay namoyung o te, ‘Katatuy Yawi tam Fun at longan.’ Ay kanya ban fagayu gdungugan man ay duan, foyungi sa anya fagayu ku nalong emu.”

¹² Sanya ginan, at Falad nabuba angku ay nadungug au sik aringang daul siginan ku day guyuy ay glong te, “Segi Yawi at kamabalyanan sas banwa.”

¹³ Ay nadungug kyangay kafag ufatk awatan tagleleg at ngay fakfak nu gyabyaban ay at ngay fanlao nu kadkalungan kata sik maksvn daul fag uig.

¹⁴ At Falad nabuba angku sa tangayayu. Nu katanya, maksvn nu kauri au ay kadotama, dewa katanya, Yawi nafaragang tua takatanya ku amatanganan.

¹⁵ Ay andasug au sas Tel-Abib sas tigyangan Liskung Kebar sat natabanan fag ngay taw at fagbanwanan. Ay nabanwan au sanya kaduge fituk menit. Ay maksvn nu kalimu au ku ngay nalag sanya.

¹⁶ Nu nlangfe fituk menit, Yawi nalong sa angku te,

¹⁷ “Taw at baguama, nafili au emu laman tagulit ngay taw tagbanwan sis talun Israel. Nu katanya, nusnga setaw am nadungug siginan angku fag ngay famararang, nanlong o fia sa anya fagayu.

¹⁸ Nu nalong au sa sik taw at mauri te, ‘Umbul ban o,’ ay nu dway o nanamararang anya te, ‘Ubuni wan am fagmauriun laman umlangfe o,’ kanya umbul, ay o wan at ke malong sa angku kanya fag taw at faginbulun.

¹⁹ Dewa katanya, nu nalong oma o ay kanya wa naubun at fagmauriun, kanya umbul aroro siginan at asalanan, ay wo e kurang ya sa angku.

²⁰ At matuyan fag taw nu naubun way at fagmatuyanun ay kanya ansik mauri ay nu nafabayan way o anya nu gfataglayun sat fagmauriun, kanya umbul. Nu dway o nafararang ya anya, kanya umbul, ay kwa ban gamatang ya at ngay nafakamulun at masine. Ay o wan at ke kurang sa angku kanya fag taw at faginbulun.

²¹ Dewa katanya, nu nananlong tuo sa anya, ay kanya nu ddi nafataglayun at fagmauriun, kanya ban di kabul ay wo e kurang ya sa angku.”

²² Sanya ginan, Yawi at fagmabalyananun antayuk sa angku ay nalong te, “Loi wan sas datag. E fagyalongun au emu.”

²³ Nu katanya, nalao kwa vtv sas datag ay nalag au Dius at kamasuloan nu mabalyanan, kata ku nalag gina au sis tigyangan Liskung Kebar ay namalub au.

²⁴ Sanya ginan, kanya fag Falad antayuk sa angku, ay kanya nafalindug angku ay nalong te, “Ulii wan ay lag ban o gduksun siginan am bale!

²⁵ Ay masiukan ban o laman wo namadgaloan am ngay kaiban.

²⁶ Ay gfasik yud kban maringang emu laman wo manamararang sanya fag ngay taw takamabo.

²⁷ Dewa katanya, gina kban gfakamatoan emu gdog wo maringang. Ay nanlong ban o sanya fag ngay taw te, ‘Katatuy Yawi tam Fun at longan.’ Tiba bank taw gdungugan emu ay tiba ban wa kaylat gdungugan, aroro kanya fagayu kamabo way.”