Esekyel 2 - Fanawbuid tagsibaliwas Fakayabian

Nafili Esekyel laman sik Taglong

¹ Kafag aringang glong sa angku te, “Taw at baguama, malindugi; e longan au sa emu.”

² Kaduge kafag aringang gfakamatoan angku, at Falad at fagmabalyananun antayuk sa angku ay nafalindug angku. Ay gdungugan au tagfakamatoan angku at aringang.

³ Kanya nalong te, “Taw at baguama, gsugu au emu sa sangay tagbanwan ay takamabo fag talun Israel. Siginan at ngay mangaguyang at buknga ay dasug katsi, kanya fagayu kamabo way gugat angku.

⁴ Kanya fagayu kamaogatun way at amatanganan. Longi sanya fag ngay taw te, ‘Katatuy Yawi tam Fun at longan.’

⁵ Kanya ban fag ngay takamabo gdungugan man ay duan, sumaful te, sanya e taglong oma.

⁶ Lag o kalimu anya fagayu. Lag o kalimu dewa at ngay longan kata sik dugi ay sik libaga nu nagat. Kanya fag ngay taw sik ngay takamabo way.

⁷ Kanya fagayu gdungugan man ay duan, namadungug o fia ku nalong emu.

⁸ “Dewa katanya, taw at baguama, dungugani fia ku longan emu. Lag o kamabo kata kanya fag ngay taw. Fabiai am bibig ay oni ku fagnamonun emu.”

⁹ Sanya ginan, nalag au sik daluap ay nafon angku sik fafil mafalutan.

¹⁰ Kanya narafad si ku salubangan, ay dewa sit bilingan e rirukan wan. At marirukan sanya ngay fagidapun way lang ay fakabaluun.