Esekyel 12 - Fanawbuid tagsibaliwas Fakayabian

¹ Yawi nalong sa angku te,

² “Taw at baguama, namanwan o sa sangay taw takamabo. Kanya fagayu e mata oma, dewa katanya, wa glag, ay e talinga oma, dewa katanya, wa gdungug, aroro kanya fagayu sik ngay takamabo way.

³ Nu katanya, namalganan o am ngay famubaun ay namaning o kata nu gatabanan o. Ay loi sa tibak furuan, ay nu glao o, si yakman swa menit, laman kafag ngay taw glag emu. Tiba ginan ro, kanya fagayu nu nalag takatanya am fakamulun, sumaful te, sik takamabo way.

⁴ Ay nu gakayabiun wan, falganani am famubaun laman ngay taw glag. Nu nyabi wan, gina kanya fagayu gdama, loi kata sik natabanan.

⁵ Fae sulati am bale at dingding ay sanyai wan nu gfaduksun o am ngay famubaun.

⁶ Ay kanya fagayu kaduge gdama emu, fasai am tungud lafi am ngay famubaun ay loi gina mayabi. Ay tabuni am mata laman wo glag at talun. Takatanya am fakamulun sik famararang sa sangay taw Israel.”

⁷ Nu katanya, nafaning au Yawi at suguan. Ay mayabas nu kamalganan au ku ngay famubaun, ay nu nyabi wan, nafae sulat au ku bale at dingding. Ay kanya fagayu kaduge gdama, nafasanan au ku ngay famubaun ay nalao kwan.

⁸ Balabag di, Yawi nalong sa angku te,

⁹ “Taw at baguama, takamabo fag ngay taw Israel nanginto ro emu sabaliwa am nafakamulun.

¹⁰ Dewa gina ro, balusi anya fagayu te, ‘Au, Fun Dius Yawi, e fagyalongun au sa sangay tagfangguna sis furuan Erusalem ay sas fagayu taw Israel.’

¹¹ Nanlong o anya fagayu te, ‘Am nafakamulun sik famasaful te, gatabanan ban am.’

¹² “Anggan ban at tagfangguna namasanan at sadili famubaun ay glao sad yabi. Ay nu gduksun ban sa ways sulat dingding alad at nafalganan laman sa anya. Ay kanya ban gtabun at mata laman wa glag kafag talun.

¹³ Dewa katanya, ggamat kban anya kata sik mangilafang ay nantaban sas talun Babilunya sa sangay taw Kaldea at talun. Dewa katanya, kanya ban wa glag, ay sanya waban nu kabul.

¹⁴ Ay namasaruayan kban at fagfanggunaun fag ngay taw, ay at ngay fagsuguan, anggan at ngay tagfawayan. Ay dewa nday ban kafag ngay taw, gfabul kyay ban fia.

¹⁵ Ay gina kban nafasaruayan kafag ngay taw sa sangay talun, kanya ban fagayu sumaful te, au Yawi.

¹⁶ Dewa katanya, gfalangfe kyay ban tibak taw Israel siginans awayan, fanlunus, ay fakasaitun laman ban kafag ngay taw nanlong sa tibak talun at ngay nafakamulun mauri, ay at ngay nadalan fag faurianan, ay siginan takatanya, kanya ban fagayu sumaful te, au Yawi.”

¹⁷ Yawi nalong sa angku te,

¹⁸ “Taw at baguama, kaduge o gfangon ay ginum, alimui tadtaruyani.

¹⁹ Longi sa sangay tagbanwan sis furuan Erusalem ay sas fagayu tagsis talun Israel te, ‘Au, Fun Dius Yawi, glong au te, kanya ban fag ngay taw gina gfangon, galakayan ay gtadtaruyan kalimu aroro sat fagmauriun, ay e nangago ban at ngay ramraman.

²⁰ At ngay furuan ban umrasras wan, ay kanya ban fagayu kabalu maksvn ay sumaful te, au Yawi.’ ”

²¹ Yawi gdog yay glong angku te,

²² “Taw at baguama, nataw at masuad ngay taw Israel at nalong te, ‘Buknga wan gragangan, dewa katanya, at ngay foyungan we kafasludan?’

²³ Nanlong o sanya fag ngay taw te, ‘Fun Dius Yawi glong te, Gfaragang kwan takatanya fag longan, ay sa bans fagdaul talun Israel, we glong ya takatanya fag longan.’ Longi yangay sanya fag ngay taw te, ‘Munakbang wan nu kafasludan kafag ngay foyungan.

²⁴ Matuyan, si ban sfuruan Israel we gtaginfan ya at yud matuyan, ay wa ban e glong ya at yud matuyan fag foyungan.

²⁵ Dewa katanya, au, Fun Dius Yawi, nu garingang au, umfasludan tua ku longan. Wa ban glugo ya nu kafasludan ku ngay nalong sabaliwa takamabo fag ngay taw. Ay nu kafasludan ban gina ya ay buknga, si yay ban ay buknga. Au, Yawi, taglong tuy.’ ”

²⁶ Fun Dius Yawi nalong sa angku te,

²⁷ “Taw at baguama, ngay taw tagbanwan sis Israel glong te, ‘Am ngay taginfan ay am ngay longan umfasludan, dewa katanya, glugo yay ban.’

²⁸ Nu katanya, nanlong o sanya fag ngay taw te, ‘Fun Dius Yawi glong te, Anud, ku ngay longan kafasludan wan.’ ”