Esekyel 1 - Fanawbuid tagsibaliwas Fakayabian

Esekyel at Taginfan Taguna

^1-3 Au Esekyel fag tagfon fanggalangun, Busi at baguama. Ay sik natabanan kyangay sas talun Babilunya. Gina au gbanwan sis tigyangan Liskung Kebar gfaudgufudan at natabanan fag ngay taw, banwa anluang masakit. Ay Yawi at fagmabalyananun antayuk sa angku ay nafalag sa angku sik ngay taginfan. Anfasludan takatanya gina sis falimak menit sis faufatk magdanun sis fatuluk safuluk banwa. Ginanya, falimak banwa fun Yuyakin nu gatabanan.

⁴ Kaduge au gdama, nalag au sik fulug kadasug siginans fawalan fag alvngvdan. Ay siginan sad linyabu maksvn nu glimbad, nu katanya, sit ligung maksvn nu mayamag. Ay at kaksvnan nu glimbad, masulo kata sik tansu.

⁵ Ay nalag au sis wa linyabu ufatk awatan tagleleg, takata sik ngay taw,

^6-8 ay galay at sadi ufat at kamatan, ay e mesa ufatk fakfak ay at ngay bitis malugde, ay at ngay darafa kata baka at darafa, ay ganinag kata sik tansu, ay at ngay daluap kata sik taw at daluap, ay si way at ngay daga fakfak.

⁹ At ngay langbud fakfak gdaddasugan. Ay nusnga nday nu glayug gasfuan ay gturunan mandi.

¹⁰ At kamatan sit salubangan kata sik ngay taw, ay si baliwa at siun kata sik liun, ay si baliwa at wala kata sik baka tama, ay sit day guyuy kata sik bio.

¹¹ Ay at dua at fakfak mafarafadan sat tungud baliwa ay gdaddasugan, ay at dua yak fakfak gsuklub at mesa bilug.

¹² Ay dewa nday nu glayug gasfuan ay gturunan. Ay nusnga nday at falad nu gbuba, fagayu sanya wan.

¹³ Kanya fagayu kata sik ngay singsing afuy tagigang ay sik salung. Ay sit ngay mesa wabilug e sik afuy gyamag, ay e limbad yangay sanya ginan.

¹⁴ Kanya fag ufatk awatan tagleleg gfoyfolian kasakit slimbad.

¹⁵ Kaduge au gdama kanya fag ufatk awatan tagleleg, nalag au at mesa fanlao. Ay at fanlao fag ufat gtayuk daga.

¹⁶ Katatuy at ngay fanlao nu mawatan: kanya fagayu ganinag kata sik mafanud fag gang gladlaksiun, ay fagayu katanya yay. Ay galay sik fanlao e sadi yak fanlao sisad basad ay malvngvd way nu mafolian.

¹⁷ Nu katanya, kafag ufatk awatan tagleleg malao way dewa nday.

¹⁸ Ay kanya fag ngay fanlao malimu, aroro matunglu ngay mata.

¹⁹ Tagleleg fag ngay awatan nu glao wan, at ngay fanlao galo yangay, ay nu giwangan wan, at ngay fanlao giwangan yangay.

²⁰ Tagleleg fag ngay awatan at falad siwa at fanlao. Ay nusnga nday at falad, sanya yangay tagleleg fag ufatk awatan ay anggan at ngay fanlao.

²¹ Tagleleg fag ngay awatan nu glao wan, at ngay fanlao galo yangay. Ay nu gragangan wan, at ngay fanlao gragangan yangay. Ay nu giwangan wan, at ngay fanlao giwangan yangay, aroro at falad siwa at ngay fanlao.

²² Ay si tagleleg fag ngay awatan at ngay tungud alfuyu, e sik masulo at masine mandi nu kalag.

²³ Ay sit daga vtv, at mesa duak fakfak mafarafadan gdaddasugan. Ay at fakfak at dua gtabun at mesa bilug.

²⁴ Kanya gina glayug, at ngay fakfak nu gwvswvs kata mamam nu gfawas, kata at mabalyanan fag Dius nu garingang, ay nu kadungug kata ngayuk tagfawayan nu gbarisanan. Ay kanya fagayu nu nragang wan, gfalut wan at mesa fakfak.

²⁵ Ay gina nafalut at ngay fakfak, e sik aringang siginan at tungud.

²⁶ Ay sanya e kata sik faglunggungan mawatan siginan tagmedmeloun fag ngay gang, ay sanya fag faglunggungan e kata sik taw.

²⁷ Siginan at fagwan sat tungud baliwa, e kata sik taganyang fag sanbung ay sat daga baliwa, kata tagigang fag afuy, ay sit ligung e sik yamag daul masulo.

²⁸ Ay tagligung anya fag yamag kata sik balango gina arak ansiwang. Katanya Yawi at kamasuloan. Ay nu nalag au anya, namalub au ay nadungug au sik aringang.