Eremyas 31 - Fanawbuid tagsibaliwas Fakayabian

Ngay Taw Israel nu Kafoli

¹ Yawi nalong yangay te, “Ginanya ban fag menit, au wan fagayu talanan sis Israel at Dius, ay gfili kban anya fagayu laman ku ngay taw.

² Ay galaga kban at kinsawad fag ngay taw kaduge kanya fagayu glao sas talun at yud e taw. Ay kafoli kban laman namon au fagmanabayanun sa sangay taw Israel.”

³ Ebi Yawi ansure sa sangay taw Israel ay nalong te, “Nesug au ayu at yud e fakatabuan. Siginan ku fagmagalangun, nafakbang au ayu sa angku.

⁴ Gfadog kyay namalindug ayu kata sik baguina. Ay gdog yay ban am gfalelegan ay ngay afud bilug, laman guseganan am ay gfawang fagfadkalinganun.

⁵ Ay gdog yay ban am gtanum wat ubas sa sangay buksul sis Samarya, ay gfanagsag ban am at ngay rawvg.

⁶ Ay sik menit ban, ngay taw tagalaga furuan guro si sangay buksul tagsis Efraim te, ‘Gewan, glo watam sas furuan Erusalem laman nanseg tam Yawi tam Dius.’ ”

⁷ Yawi glong te, “Alubadi ay uroi laman sas Akub at ngay kasugfunanan, aroro kanya wan tiba tungud fag gaban taw. Useganani ay uroi te, ‘Yawi, falangfei am ngay taw, at kinsawad tagleleg sis Israel.’ ”

⁸ Ay Yawi glong yay fia te, “Dungugani! Namul au ay namaful anya fagayu siginans fawalan fag alvngvdan, nusnga nday fag fungfung daga. Galo yangay anya fagayu, anggan at ngay yud glag, ay at yud malao, ay tagfafion, ay tagafasalugun wan. Ngayu tua bank taw takafoli.

⁹ Ay kaduge kban gtabanan gfauli kanya fagayu, at kaksvnan nu guseganan sak gwayway ay gdarangin. Gtaban kban anya fagayu sa sangay bulbug, ay glao ban sat masine fag dalan ay di ban kataid. Aroro au taw Israel at mama, ay Efraim ku baguama taguna.

¹⁰ Ngay talun dungugani ku longan, ay fadungugi sa tangayayu fag ngay furuan: nafarapyagan au ngay taw Israel, dewa katanya, namaful kyay ban ay nangalaga kata sik tagalaga fagbaugun nu galaga at ngay tupa.

¹¹ Gfalangfe kban Akub at ngay kasugfunanan siginan sa ngay taw tagtungud tua anya nu mabalyanan.

¹² Kanya ban fagayu glao sas Buksul Siun ay guro guseganan. Ay guseganan ban aroro sa ku ngay nafon sa anya fagayu. Ay umkayu ban at gutluan, ay ubas at mamam, ay at langis ulibu, ay at ngay fagbaugun. Ay kanya ban fagayu umkata sik ngay tanuman at malayun tua nu e gfarugme, ay wa ban gdog ya e fakabaluun.

¹³ Ay siginan ban takatanya, at ngay baguina ay at ngay baguama ay anggan at ngay fagtainan guseganan gfalelegan at ngay afud bilug. Gtubus kban fagusegananun at fagwaywayun. Ay abat ngate ban kabalu, gfasun kban anya fagayu.

¹⁴ Namon kban ngayuk fanggalangun sa sangay tagfon fanggalangun. Ay gfapsug kban ku ngay taw siginan ku ngay famonun. Au, Yawi, taglong tuy.”

¹⁵ Yawi nalong yay fia te, “E ndungug siginans furuan Rama sik maksvn fag wayway ay fag fandeng. Rakel gwayway laman sat ngay sisian. Kanya gwayway aroro at ngay baguama anbul, ay wa kaylat nu e gfasun anya.”

¹⁶ Dewa katanya, Yawi nalong anya te, “Lag o gwayway ya aroro gfon kban sa emu famonun sas fagayu am nafakamulun. Am ngay baguama ban kafoli yay siginan at ngay fawayan at talun.

¹⁷ Nu katanya, e fagsegun yay ban o, aroro am ngay baguama ban kafoli yay sat fagbanwanan.”

¹⁸ Nadungug au ngay taw Efraim nu gfandeng glong te, “Yawi, kata waymi sik ngay riangan baka at yud annanad e fantungud liug, dewa katanya, nafoyung tuo emi nu setain nu gfaning ami emu. O wan em Dius Yawi, nu katanya katsi, fafolii emi sa em fagbanwanan.

¹⁹ Natalyuyan ami emu, ay katsi, nafoyung ami fagayu em asalanan. Ay nu nasaful ami te, e nasalan ami, natalaptap ami em ngay dubdub kaduge ami gfoyung em asalanan. Kapla ami sa em nafakamulun ebi gina ami masisian.”

²⁰ Yawi gbalus te, “Ngay taw Efraim, o nunda am wan ku fakesugun ku ngay sisian? Dewa malayun nu glong au sa ayu at mauri, kesug ktua gugat ayu. Kaylat ktua gugat ay kafanyu ayu.

²¹ Fiungi tua ay turuki sa ay ngaba dalan laman ay fagaloan, ay amatangi tua ay dalan, aroro sanya yay ban ay dalan gina am kafoli. Ku ngay sisian fag ngay taw Israel ulii wan sa ay ngay furuan ayu daul.

²² Ku ngay sisian at nalyam, ginain yaban nu kafoli am sa angku? E fagnamakamulunun kban at yud yay batang e nfasludan ste swa daga: mangena tua ban tagbalabag sik mangama.”

Takadasug fag Fagmabayanun sas Israel

²³ Yawi at Mabalyanan, Israel at Dius glong te, “Gina kban nafafoli ngay taw Uda sat talun siginan at fagatabananan, kanya ban fagayu gdog yay glong te, ‘Yawi nangus gfadante at fagbanwanan fag buksul at yud e malong.’

²⁴ Ngay taw Israel ban namanwan sa sangay furuan tagsis Uda, gadgaloan ngay tagtanum ay ngay tagalaga ngay fagbaugun.

²⁵ Ay ginanya ban gfafiangalay au fagayu takalufuy ay gfabitsug kban fagayu at mamomuy aroro kalunus. Nu katanya, ngay taw ban glong te,

²⁶ ‘Natiug au, ay nu nfulo kwan, masine wan ku kayaunanan.’ ”

²⁷ Yawi glong te, “Kadasug ban sik menit, gfayu kban ngay taw Israel ay ngay taw Uda anggan at ngay fagbaugun.

²⁸ Ebi nafaurianan au, ay nafamin ay narasras ay naiyan anya fagayu, dewa katanya, namadog kyay ban namalindug ay namaksvn.

²⁹ “Ginanya ban ngay taw wa glong ya te, ‘Ngay fagtainan naon wat ubas at rawvg at mayat, ay at ngay sisian way at kinkayat.’

³⁰ “Dewa katanya, siginan ban katsi, nusnga sinu at naon at mayat fag wat ubas at rawvg, kanya way takayat. Ay nusnga sinu at nasalan, kanya way takabul.”

³¹ Yawi nalong te, “Kadasug ban sik buknga, nangawat kban sik bagu fag nasadian sa sangay taw Israel ay sa sangay taw Uda.

³² Kanya ban wa kata ya ebi taguna fag nasadian ku nawat sat ngay mangaguyang gina au gtaban anya fagayu kaduge glao siginans talun Igiptu. Dewa au kata nu at indugan, kanya fagayu wa nafaning taguna em nasadian.”

³³ Yawi nalong yangay te, “Katatuy at bagu fag nasadian ku fagnangawatun, laman ban ngay taw Israel at fagaloan sa takadasug fag ngay buknga: Griruk kban sat ngay amatanganan ku ngay foyungan. Au waban fia kanya fagayu at Dius, ay kanya ban fagayu ku ngay taw.

³⁴ Wa ban e glong ya sat ngay kaiban ay sat faduksay te, ‘Toglagi tua Yawi,’ aroro kanya fagayu toglag wan angku, siginan tagafalingunan ay anggan sat ngay takadungug. Namalyam kban kanya fagayu at ngay nafakamulun at mauri, ay kwa ban gamatangan ya at ngay asalanan.

³⁵ Au, Yawi tagsugu menit laman gyamag fagngabak menit, ay au wan tagsugu magdanun ay ngay galeme laman gyamag fagngabak yabi. Ay au yangay tagfauigan dagat ay tagfafawas ngay lugwak. Au, Yawi at Mabalyanan, taglong tuy.

³⁶ Kaduge ban e banwa ay e fagdaul daga, sanya yangay talun Israel.

³⁷ Nu setain nu yud e mafatuyan te, kadaul nya banwa, ay kabasad nya daga, katanya yangay kwa ban gaiyan Israel at ngay gaban, kanya fagayu dewa nafakamulun ngayuk asalanan. Au, Yawi, taglong tuy.”

³⁸ Yawi gfataglayun glong te, “Abandi ban e gdog yay kawat Erusalem laman sa angku, siginans Kananel fag bale ngabat fagulitan, sitsigons Sakbawan tagsis Fugungan.

³⁹ Ay sanya ginan ban gfataglayun sat fatuan tagsas buksul Gareb ay kabaraud ban sas Gua.

⁴⁰ Fagdaul datag fagukasan ngay kinbul ay ngay nakaurian ay anggan ngay gamasun tagsis Liskung Kidrun sitsigons sakbawan at nafangayan te, Sakbawan Kabayu tagsis fakamenitan baliwa, sanya fagdaul mafalganan wan laman sa angku. Ay kanya ban fag furuan wa gdog ya karasras ay kaiklas.”