Eremyas 14 - Fanawbuid tagsibaliwas Fakayabian

Tangaduge fag Mangune sis Uda

¹ Katatuy Yawi at longan sa angku, sabaliwa tangaduge fag mangune:

² “Uda ay at ngay furuan kabalu. At ngay tagbanwan sis Erusalem malunggung sisad daga ay nawayway maksvn.

³ At ngay maramraman nasugu at ngay fagsuguan laman nanagub. Ay kafag ngay fagsuguan nalao sa sangay bubun, dewa katanya we mamam. Nu katanya, kanya fagayu anfoli ay we bilug at ngay baringan, ay at kaksvnan nu kapla natabun at ngay alfuyu.

⁴ Lutuk ankarang aroro we arak ay at kaksvnan ngay tagtanum nu kabalu natabun at ngay alfuyu.

⁵ Dewa arasyo at bagu gfasalug gubun wan at ngay riangan, aroro we makmak ya.

⁶ Ay ngay asnu araw nananmalindug sa sangay buksul tagsis talun at yud e taw, ay gengasan kata ngay idu talun. Ay nu kamanawan gyawyawa wan aroro we fakonun ya.”

⁷ Ngay taw nalong te, “Yawi, nafamabo ami gugat emu ay nasalan. Dewa ami sak gafaurianan aroro sa em ngay asalanan, kin, fakamuluni wan laman ngay taw gfauseganan tua emu.

⁸ Yawi, o wan Israel at fagsegun ay at tagfalangfe gina e fagidapun. Wain am fakataun way em betaw? Ay wain am fakataun way sik tagfanloan tagsik yabi way nu gtiug si em talun?

⁹ O kata yangay o sik taw at yud e fagmafakamulunun, ay sik tagfawayan at yud makatu gfalangfe? Yawi, dewa katanya, si tuo gugat emi, ay ami wan am ngay taw, nu katanya, lag o gfabayan emi.”

¹⁰ Ay Yawi nabalus te, “Matuyan, anyayu am siginan angku. Nafaning am ay sadili fakaylatun. Nu katanya, kwa kaylat ya ayu. Ay kwa ban kalyam ya ay ngay fagmauriun, ay namaurianan au ayu.”

¹¹ Sanya ginan, Yawi nalong sa angku te, “Lag o gdarangin sabaliwa kafag ngay taw at fagmanabayanun.

¹² Kanya ro fag ngay taw dewa e buknga nu yud gfangon laman gdarangin, laman get gubuk sa angku, kwa ro gdungugan ya anya fagayu. Ay kanya ro fagayu dewa gfon at ngay fagirugun fag ngay fanggalangun ay at famauseganan sa angku fag ngay fanggalangun, kwa kaylat ya. Abat ngate, namabul kwan anya fagayu sas awayan, fanlunus, ay sas faurianan.”

¹³ Dewa katanya, nalong au te, “Yawi em Fun, saful wo ngay taglong glong gugat sa anya fagayu te, ‘Wa ban e awayan ay e fanlunus takadasug aroro Yawi glong te, gfon kban gugat fagmanabayanun ste fag talun.’ ”

¹⁴ Yawi nabalus te, “Kanya fag ngay taglong kamuag sa ku ngayan. Kwe nasugu ay kwe nalong sa anya fagayu. Wa siginan angku ay we masuad kanya fagayu at taginfan at foyungan sa ayu, nu bunway siginan way at ngay amatanganan.

¹⁵ Nu katanya, au, Yawi, glong au te, namaurianan kwan kanya fag ngay taglong. Kanya fagayu gagbilug ku ngayan deyud au nafoyung ay glong te, ‘Wa ban e awayan ay e fanlunus iste fag talun.’ Dewa katanya, kanya ban fagayu umfaurianan sas awayan ay sas fanlunus.

¹⁶ Ay e nangukas ban sas furuan Erusalem at ngay dalan at ngay kinbul at nafanud sanya fag ngay taglong. Kanya ban fagayu umbul sas awayan ay sas fanlunus. Wa ban e namoli ya at ngay mangena ay at ngay sisian. Ay namadasug kban sa anya fagayu at kasakan fag faurianan.

¹⁷ “Eremyas, nanlong o sa sangay taw te, ‘Kayu menit ay yabi, wa karagang ya nu gwayway au aroro maksvn wan ku ngay taw at ngay bangbang, ku natuyan fia te, ku baguina, ay maksvn wan nu kabalu au anya fagayu.

¹⁸ Ay nu nalao au sas fagtanuman ay sas furuan daul, nalag au at ngay kinbul sis awayan ay sis fanlunus. Ngay taglong ay ngay takamoyung gfataglayun nu gfakamulun, dewa katanya, wa saful at ngay fakamulun.’ ”

Ngay Taw Ankakbang sas Yawi

¹⁹ Yawi, o matuyan naiyan wo Uda? O anud kauri wo furuan Erusalem? Wain am fagnafauriananun emi takatatuy, ay kata wa nu yud ami e fagsegun ya kafia? Nafanya oma tam fagmanabayanun dewa katanya, we ndasug. Nafanya oma tam fagmafianun, dewa katanya, at kindasug fagmalimuun way.

²⁰ Yawi, nasaful ami te, anke asalanan ami kata em ngay mangaguyang. Anud, anke asalanan ami sa emu.

²¹ Lag o gaiyan emi aroro am ngayan matuyan tua. Lag o gfae fakaplaun am fagfagtainanan. Ay amatangi am nasadian sa emi, ay lag yap gfayud e masuad.

²² Nusdi sadik fagsegan sa sangay talun we mafadasug arak, ay we mafae ayuyus, ay anggan banwa wa mafae arak. Yawi em Dius, o way lang at mafafakamulun takatanya, ay sa way lang emu nu gafanud ami.