Eremyas 1 - Fanawbuid tagsibaliwas Fakayabian

¹ Katatuy Eremyas, Kilkya at baguama, at ngay foyungan. Kilkya, sik tagfon fanggalangun sis Anatut, sis Benamin fag kasugfunanan at daga.

² Yawi nafon sas Eremyas sik foyungan ebi gina sis falabi tuluk banwa Usyas nu gfunan sis Uda. Usyas, Amun at baguama.

³ Yawi gfataglayun gfoyung at foyungan sas Eremyas gina Yuyakim, Usyas at baguama, nu gfunan, sitsigons falabi sadik banwa Sedekya, Usyas at baguama, nu gfunan. Ay gina sis falimak magdanun, ginanya fag banwa, ngay taw tagbanwan sis Erusalem natabanan.

Nu Guro Eremyas

⁴ Yawi nalong sa angku te,

⁵ “Eremyas, gina au nangawat emu sim mina at ungdan, nafili kwa emu. Ay gina o yud ansalug, nafili kwan emu laman ban sik taglong o sas fagayu talun at taw.”

⁶ Ay nabalus au te, “Ku Fun Yawi, kya makatu namoyung am longan, aroro baguama kyay.”

⁷ Ay Yawi nalong sa angku te, “Lag o glong te, mabaguama yay o. Faningi ban nusnga nday nu gsugu au emu ay foyungi nusnga setaw ku fakaylatun am fagnanlongun.

⁸ Lag o kalimu ngay taw aroro gufud kban ay gdiri emu. Au, Yawi, taglong tuy.”

⁹ Sanya ginan, Yawi nafalugde at take ay nated ku bibig ay nalong te, “Gfon au sa emu ku ngay longan am fagnanlongun.

¹⁰ Ay katsi gfili au emu laman namoyung o sa sangay talun at ngay taw ay sa sangay fagfagtainanan te, tiba ban si ayu umfaurianan ay umkamin ay umrasras ay e nangaiyan, ay tiba ban umlindug tua ay umkaksvn.”

¹¹ Sanya ginan, Yawi nainto sa angku te, “Eremyas, nataw am lagan?” Ay nabalus au te, “Sik sanga dingin.”

¹² Yawi nalong te, “Matuyan am nalag. Kanya tagfatuyan te, gulit au ku ngay longan laman umfasludan.”

¹³ Yawi gdog yay ginto angku te, “Nataw katsi am lagan?” Ay nabalus au te, “Sik tikung at ke mamam kudkulukan, mafaulagan sabaliwas wala fag alvngvdan.”

¹⁴ Yawi nalong te, “Matuyan am nalag, aroro e kadasug ban sik malimu siginans wala baliwa fag alvngvdan laman sa sangay taw tagbanwan ste fag talun.

¹⁵ Dungugani! Nanguro au ngay tagfawayan siginans fagayu fagfagtainanan, tagsis wala baliwa fag alvngvdan laman namawayan furuan Erusalem. Ay kanya ban fag ngay talun at ngay fun nangawat at ngay mesa fagfagtainanan sis furuan Erusalem at ngay sakbawan anggan sat ligung. Ay katanya yangay ban at fakamulun sa tibak furuan sis Uda.

¹⁶ Namaurianan kban ku ngay taw tagfakamulun at mauri, aroro kanya fagayu natalyuyan angku siginan nu girug famaebebanglu fag lune ay nu gseg at nawat fag ngay fagsegan.

¹⁷ Eremyas, falganani! Ay loi wan ay namoyung o sa anya fagayu ku longan emu. Lag o kalimu. Aroro nu nlimu way ro wo, gfaugat kro nu kalimu o gina o sanya fag ngay taw at daga salubangan.

¹⁸ Katsi namaksvn au emu kaksvn sik furuan daul at ke alad, ay kamogat sik turuk ay sik dingding mawatan sanbung. Wa ban e mababo emu dewa ngay fun, ngay tagfangguna, ngay tagfon fanggalangun, ay fagayu tagbanwan sis Uda.

¹⁹ Kanya ban fagayu namawayan emu, dewa katanya, gababawan way ban, aroro gufud kban ay ggubuk emu. Au, Yawi, taglong tuy.”