Efesu 6 - Fanawbuid tagsibaliwas Fakayabian

Foyungan sa sangay Fagtainan ay sa sangay Sisian

¹ Ngay sisian, faningi tua ay ngay fagtainan, aroro katanya tua at matuyan.

² “Suyui ay mama ay ay mina.” Tuy taguna fag suguan gasfuan sik fatuyanan. Katatuy at fatuyanan te,

³ “Nu kesug tuam ay mama ay ay mina, manabayan tuam ay ngaduge nu gleleg am ste swa daga.”

⁴ Ngay mama, lag am gfaidapan ay sisian. Abat ngate, fagurangi way anya ay fananadi foyungi anya kata tam Fun at ugali ay at foyungan.

Foyungan sa sangay Fagsuguan ay sa sangay Tagfayafun

⁵ Ngay fagsuguan, faningi tua ay ngay tagfayafun sas fagdaul ay fagmasuyuun. Faningi ay matuyani kata nu gfaning am tam Fun Isus.

⁶ Dewa e glag ay deyud e glag, katanyai tua ay fakamulun, dangay am lang gfauseganan taw nu bunway aroro am wan tam Fun Isus at ngay fagsuguan, magani tua fia sa ay amatanganan nu gfakamulun am tam Dius at fakaylatun.

⁷ Masinei tua fia ay amatanganan nu gfaning am, kata nu gfaning am tam Fun, bundi sas taw.

⁸ Aroro nasaful wam te, tam Fun ban gbangsi ay nafakamulun at masine, sa sik fagsuguan ay sas yud fagsuguan.

⁹ Am fag ngay tagfayafun, masinei tua sa ay ngay fagsuguan, lag gfalimuanan anya, aroro nasaful am te, am ay ay fagsuguan sadi way ay Fun sis banwa, at yud e fagfili taw.

Dius at Nafon fag Famalabag

¹⁰ Ay sas fakatabuan ku longan, maksvni tua nu masadi am sa tam Fun ay siginan at fagmabalyananun at gubuk.

¹¹ Suluni Dius at nafon ayu fag famalabag, laman mafawayan am Satanas at ngay algan.

¹² Aroro tam fawayan bunwa taw, nu bunway at mauri way fag ngay falad sis banwa, ngay tagfunan, ay ngay ke fagmabalyananun, ay ngay tagagbilug fagmadulumun ste swa daga.

¹³ Nu katanya, suluni tagsiginans Dius fag famalabag, laman mafawayan tuam gugat gina ban andasug sik menit at ke fagmauriun, ay laman ban nu ntabu nu gfawayan am, mabitsug tuam gugat.

¹⁴ Nu katanya, mafalganani tua gugat ay taudani at matuyan sabaliwas Dius. Ay fakamuluni gugat at matuyan tuga famalabag si ay dubdub.

¹⁵ Ay suluni ay lapak laman mafalganan am nanfamoyung at Masine fag Barita sabaliwas fagmanabayanun sas Dius.

¹⁶ Kabavn fasii tua gugat ayu ay fagafanudun sa tam Fun Isus laman ay famalabag, kanya ay famalabag ay ay famarabung fagayu Tagmauri at tagigang fag banyas.

¹⁷ Suluni yangay ay famalabag si ay alfuyu ay buli ay fiso at Masine fag Falad at nafon ayu, at masuad Dius at Longan.

¹⁸ Ay kaduge am gfakamulun katanya, kabavn darangini siginan at Masine fag Falad at gubuk. Darangini fagayu ay fagdaranginun. Ay darangini tua gugat Dius at nafili fag ngay taw.

¹⁹ Darangini yangay angku laman Dius gfon angku at matuyan fag longan laman maseganama nu gfoyung au Dius at algan at masuksukan sabaliwa at Masine fag Barita.

²⁰ Dius nasugu angku laman kamoyung au at Masine fag Barita, ay kanya wan ku fagmasiukanun katsi. Nu katanya, darangini angku laman maseganama nu gfoyung au kata at masine.

Fakatabuan at Longan

²¹ Tam fakesugun tam faduksay Tikiku tam Fun at fagsuguan at matuyan, kanya ban tagfadungug ayu fagayu nusnge wain sabaliwa ku kayaunanan ay ku fakamulun ste.

²² Gsugu au anya sa ayu laman sumaful am em kayaunanan ay laman gfaksvn tua ay ngay amatanganan.

²³ Em ngay faduksay, siwa nangus fia ayu fagmanabayanun ay fakesugun gasfuan ay fagafanudun, siginan tam Dius tam Mama ay tam Fun Isus.

²⁴ Dius at fagmagalangun sumawa nangus fia ayu fagayu, am takesug fia tam Fun Isus.