Efesu 5 - Fanawbuid tagsibaliwas Fakayabian

Ugalii Tagfauseganan Dius

¹ Dakngani am wan Dius at fakesugun at ngay sisian, faningi tua anya.

² Ugalii ke fakesugun kata tam Fun Isus nu kesug antam. Kanya nafon at leleg sik mabebanglu fag fanggalangun sas Dius laman sa antam.

³ Am wan Dius at nafili, nu katanya, lag am gkamatoan ya sabaliwas fagfanugtugun ay fagnamatugtugun, ay sas fagmauriun ay sas fagfanganuranun.

⁴ Ay lag yangay gugali nusnga setaw fag mauri ay at yud e tungkul fag fagkamatoanun ay at yud masine fag alaman, nu bunway useganani tua sas Dius.

⁵ Asafuli te, tagfanugtug ay at namatugtug ay tagfakamulun at mauri ay tagfanganuran, wa ban umful sa tam Fun Isus ay sas Dius at fagfagtainanan, aroro tagfanganuran kata yay nu gseg at yud matuyan fag ngay fagsegan.

⁶ Lag am gadayan nusnga sinu fag taw at yud matuyan at longan, aroro Dius kadotama nusnga sinu takamabo.

⁷ Nu katanya, lag am nangataip sa takatanya fag ngay taw at fakamulun.

⁸ Ebi gbanwan am sis fagmadulumun, ay katsi tam Fun nafasa tua ayu sad mayamag. Ugalii at masine kata nu si am sad mayamag.

⁹ Aroro tagsis fagmayamagun at rawvg masine tua ay matuyan ay mafanud.

¹⁰ Rvbvyi tua te, inday fag ngay ugali tagfauseganan tam Fun.

¹¹ Lag am gfagamutan ngay taw tagfakamulun at yud masine, tagfaning fagmadulumun. Abat ngate, falagi way sa anya fagayu te, mauri at ngay fakamulun.

¹² Aroro mapla way nusdi taglong sabaliwa ngay takamabo at fakamulun at masuksukan.

¹³ Fagayu takatanya nu nayamagan, at ngay ugali umsure.

¹⁴ Ay at nayamagan matuyan nasasad mayamag. Kata sik longan te, “O fag taw tagtiug, afuloi wan, ay abangkadi siginans fakabulun, ay tam Fun Isus dumamlag emu.”

¹⁵ Nu katanya, amatangani tua te, tain ay ugali at masine. Dangay kata at yud e fagsafulun, nu bunway katai tua at ke fagsafulun.

¹⁶ Lag gfangulan ay buknga, aroro katsi mauri wan fagdaul daga at ugali.

¹⁷ Dangay am yud e fagsafulun, nu bunway atogdungugi tua te, setain tam Fun at fakaylatun.

¹⁸ Lag am glanguan, aroro kanya mauri way, nu bunway ugatani laman at Masine fag Falad gbanwan tua si ayu.

¹⁹ Fodfoyungani ay alubadi siginans Dius at Longan fag ngay alubad ay siginan ay ngay fafil fag ngay alubad, ay siginan ay amatanganan fag ngay alubad. Nu galubad am, fagdauli tua ay amatanganan at ke fagusegananun sa tam Fun.

²⁰ Kabavn fauseganani tam Dius tam Mama aroro sas fagayu nusnge wain, siginan tam Fun Isus at ngayan.

Suguan sas Dadwaan

²¹ Am fadfaningani tua sik fakatoglagan te, gfaning am tam Fun Isus.

²² Ngay mangena, faningi tua ay mesa mangama kata nu gfaning am tam Fun.

²³ Aroro mangama wan tagfangguna at mangena, kata tam Fun Isus nu gfangguna at ngay taw ay at nafalangfe anya fagayu.

²⁴ Dius at ngay taw nu gfaning tua tam Fun Isus, katanyai yangay at masine anggan ngay mangena nu gfaning at mesa mangama.

²⁵ Ngay mangama, esugi tua ay mesa mangena kata tam Fun Isus nu kesug at ngay taw. Kanya nafon at leleg sa anya fagayu,

²⁶ laman gfayud e malong ay gfasine anya fagayu siginan nu kasurung sasad mamam ay siginan Dius at Longan.

²⁷ Nu katanya tua, kanya mafasalubang at ngay taw sa anya, masine ay di e kalong nusnga setaw ay di e mauri, nu bunway masine tua ay matuyan.

²⁸ Katanya yangay, ngay mangama esugi tua at mesa mangena kata nu kesug at sadili. Aroro, nusnga sinu takesug tua at mangena kanya kesug tua at sadili.

²⁹ Aroro nusnga sinu fag taw wa kauri at sadili bilug, abat ngate, kanya gfafangon tua fia ay galaga. Katanya yangay tam Fun Isus at fakamulun sa antam, at ngay taw,

³⁰ aroro itam wan sik afud tam Fun Isus at bilug.

³¹ Katatuy at Rirukan te, “Nu katanya, mangama gubun at mama ay at mina ay nangasadi sat mangena, ay kanya fag dua ansadi wan.”

³² Nasaful au te, tuy maidap katogdungug, dewa katanya, tuy sik fafaskudanan way tam Fun Isus ay at ngay taw.

³³ Dewa katanya, tuy at fagfatungulan sa yangay ayu fagayu. Ngay mangama, esugi tua ay mesa mangena kata nu kesug am ay sadili, ay anggan am fag ngay mangena, suyui tua ay mesa mangama.