Efesu 4 - Fanawbuid tagsibaliwas Fakayabian

Ngay Tagafanud at Fagmasadiun

¹ Au sik maubungan aroro siginan nu gfaning au tam Fun, maksvn nu glong au ayu te, ugalii tua at masine kata Dius at ngay nauro.

² Am famababauni tua, ay malukmei tua ay magwantai tua, ay maluayani ay mafangesugi.

³ Ugatani fabanwani si ayu ay fagmasadiun sat Masine fag Falad, siginan at fagmanabayanun tagfutus ayu.

⁴ Ansadi tam sa sik bilug ay sa sik Falad, ay sadi yangay tam fagsegun at nafon antam gina nauro antam.

⁵ Sadi way tam Fun, ay sadi way tam fagafanudun, ay tam fakasurungun.

⁶ Sadi way Dius, fagayu taw at Mama. Kanya gtungud tua sas fagayu, ay takawat fagayu, ay tagsis fagayu.

⁷ Nafon sas galay antam at sadi sik mafasamanan fag famonun, kata tam Fun Isus at algan at fon.

⁸ Nu katanya, katatuy at Rirukan at foyungan te, “Kanya gina nkabat sas banwa nataban ngayuk taw ebi at natabanan. Ay nafon ngay famonun sa sangay taw.”

⁹ Nataw at masuad te, kanya nkabat? At masuad, kanya natustus yay ste swa daga.

¹⁰ Ay at natustus ste swa daga kanya yangay at kinkabat sa tiba tungud fag banwa laman siwa anya fagayu nusnge wain.

¹¹ Ay kanya nafili tibak taw sik ngay nasugu, ay sik ngay tagfasaful Dius at ngay longan, ay tagbuba at Masine fag Barita, ay takamoyung ay tiba tagfoyung sis bale fakafulan.

¹² Kanya nafakamulun katanya laman gfalganan sabaliwas Dius at ngay nafili at fakamulun ban, laman tam Fun Isus at bilug kaksvn tua.

¹³ Takatanya fag balyawvtan, umsadi tua tam sas fagafanudun ay tumoglag tam Dius at Baguama, laman umtuyan fia tam kaugalian kata tam Fun Isus nu matuyan.

¹⁴ Nu katanya tua, di ban tam kata ya sik sisian at amatanganan ay gabuban sa tibak foyungan ay di ban tam galoan ya ngay tagfandaya. Ay di ban tam gadayan ya tibak taw at ngay fandaya.

¹⁵ Nu bunway tam longan kabavn matuyani tua ay e fakesuguni tua laman kamayewa tagsi antam kaksvn tua tam sa tam Fun Isus, kanya wan tagfun sas fagayu.

¹⁶ Siginan anya fagdaul at bilug matuyan tua nu gdiuganan nu masine tua fagayu at afud at fakamulun, ay fagdaul at bilug mataglu tua ay karabung tua ay kaksvn tua sas fakesugun.

At Bagu fag Ugali sa tam Fun Isus

¹⁷ Katatuy ku longan sa ayu siginan tam Fun te, lag am gugali ya kata at yud Udyu fag ngay taw at ugali ay at yud e tungkul fag ngay amatanganan.

¹⁸ Kanya wa natogdungug, aroro siginan at fagyudun mamatanganan ay fakamaogatunun, takatanya fag taw we afud Dius at famonun fag leleg.

¹⁹ Kanya fag ngay taw we apla ya ay annanad gfakamulun at mauri fagayu, ay maksvn nu kaylat gfakamulun nusnge wain fag fagmauriun.

²⁰ Dewa katanya, di katanya ay fagsafulun sabaliwa tam Fun Isus

²¹ gina am nadungug sabaliwa anya. Ay sa ay fagmasadiun sa anya ansaful tuam at matuyan fag foyungan sabaliwas Isus.

²² E nafoyung ayu te, ay fagfangalabianun gdaya ayu laman namamin ayu, ay nu katanya, ubuni wan ay dan fag ugali anggan ay dan fag ngay fakamulun.

²³ At foyungan yangay ayu te, tubusi wan ay amatanganan,

²⁴ ay fagfasiun ayu at bagu tua fag taw at kinkawat takata Dius, laman ay ugali matuyan tua ay di e malong.

²⁵ Nu katanya, lag am kadkamuagan ya, nu bunway matuyani tua sas galay am at sadi, aroro fagayu tam masadi tam si sik bilug.

²⁶ Ay dewa am ankuri, lag gfadasug sas asalanan. Ay lag am gfafagngabak menit nu gfalyam am ay fakauriun.

²⁷ Lag am gfon buknga sas Satanas.

²⁸ Tagfangkamul lag gfangkamul ya, nu bunway fakamuluni tua nusnga setaw at masine laman mafagubuk ngay tagayudan.

²⁹ Lag am glong nusnge wain at mauri, nu bunway at mafagubuk tua ay at mafaksvn ay iba kata at fagayudanun, laman e fanambagun tua sa tagdungugan.

³⁰ Ay lag am gfae fakabaluun Dius at Masine fag Falad. Aroro kanya wan fakatoglagan te, masadi tuam si anya, ay tagdiri ayu anggan ban andasug Dius at falganan fag menit laman gfalangfe ayu.

³¹ Ukasi wan fagayu at mauri tagsi ayu; fagfangauriun, ay fagfangadotamaun, ay fakamawayanun, ay nu glong mauri say iba, ay fagamatanganun at mauri say iba.

³² Nu bunway, madmalukmeani tua ay edkesugani, ay fadfalyamani tua nu nke fagmauriun sa ay iba, kata Dius nu gfalyam ay asalanan siginan tam Fun Isus.