Efesu 3 - Fanawbuid tagsibaliwas Fakayabian

¹ Aroro katanya, au, Pablu, maubungan au aroro kamoyung au sa ayu yud Udyu fag ngay taw sabaliwa tam Fun Isus.

² Gtuyan au te, nadungug wam sabaliwa Dius at nafon angku fag fakamulun nu kamoyung au sabaliwa at fagmagalangun, laman e tungkul tuam.

³ Dius nafasure sa angku at algan at masuksukan, kata ku nariruk sa ayu aro.

⁴ Ay siginan nu gtap am tuy ku rirukan, umyamag am nu setain ku nayamagan sabaliwa at algan at masuksukan sabaliwa tam Fun Isus.

⁵ Tuy fag masuksukan we taw nasaful ebi ginan fag ngay buknga, ay katsi Dius nafasure sat mafilian fag ngay nasugu ay sat ngay taglong siginan at Masine fag Falad at gubuk.

⁶ Katatuy Dius at algan at masuksukan: aroro ngay yud Udyu gafanud yangay sat Masine fag Barita, kanya fagayu mul yangay Dius at famonun kata ngay taw Udyu. Kafag duak gaban ansadi sa sik bilug, ay kanya fagayu mul Dius at fatuyanan fag famonun aroro siginan at fagmasadiun sa tam Fun Isus.

⁷ Siginan Dius at fagmagalangun ay at fagmabalyananun, kanya nafili angku laman gfoyung at Masine fag Barita.

⁸ Ay sas fagayu taw Dius at nafili, au wan at yud e tungkul. Dewa katanya, Dius nafon angku at fagmasineun gfayamag sas yud Udyu fag ngay taw sabaliwa tam Fun Isus at fagmasineun yud e gfasud,

⁹ ay gfayamag au sas fagayu taw te, setain Dius at algan at masuksukan nu kafasludan. Dius at nawat fagayu nusnge wain, ebi taguna kanya ya nafasure at algan at masuksukan,

¹⁰ laman fagayu tagafanud katsi gfasaful sa sangay fun ay sa sangay tagfangguna sis banwa, sabaliwas Dius at fagsafulun at yud e fakatabuan.

¹¹ Katanya Dius at algan siginans fagsigadan, ay kanya nafafasludan at algan siginan tam Fun Isus.

¹² Aroro siginan tam fagafanudun sa anya, manangakbang tua tam sas Dius, ay antuyan tua tam te, gdungugan antam.

¹³ Nu katanya, glong au ayu te, lag am gfamomuy ay amatanganan aroro sa ku nadalan fag fagidapun laman sa ay fagmasineun.

Pablu nu Gdog Gdarangin ngay Taw Efesu

¹⁴ Ay nu namatang au takatanya fagayu, gtudan au gdarangin sa tam Mama.

¹⁵ Fagayu tagsis banwa ay tagsis daga anke leleg siginan anya.

¹⁶ Gdarangin au sa anya te, siginan at maksvn fag fagmabalyananun, kanya nangus gfabitsug ay amatanganan siginan at Masine fag Falad.

¹⁷ Tam Fun Isus nangus gbanwan si ay ngay amatanganan aroro gafanud tuam sa anya. Ay gdarangin kyangay te, maksvn am sis Dius at fakesugun, kata sik kayu tangabasad at lalid,

¹⁸ laman sumaful tuam fia gasfuan Dius at ngay nafili te, se aksvn tam Fun Isus nu kesug antam.

¹⁹ Ay laman sumaful am tam Fun Isus at fakesugun, dewa tam yud nasaful fagdaul at fakesugun. Nu katanya tua, umtayuk wam fia fagdaul Dius at fagmadiusun.

²⁰ Tam Dius mafafakamulun tagtungud yay fagayu tam fagetun ay tam amatanganan, siginan at fagmabalyananun tagfunan antam.

²¹ Siwa anya famauseganan kabavn ban, siginan at nafakamulun sa sangay tagafanud sa tam Fun Isus. Anud.