Efesu 2 - Fanawbuid tagsibaliwas Fakayabian

Nafaleleg Gasfuan Isus

¹ Ebi taguna kata way nu mabulan am aroro sa ay fakamaboun ay sa ay ngay asalanan.

² Gugali am gfaning ste sfagdaul daga at ugali, ay galo yangay am tagfunan kiwang fag falad at ke mauri fag ngay fagmabalyananun. Kanya wan tagfamatangan takamabo fag ngay taw.

³ Ebi gfakamulun yangay tam at mauri kata kafag ngay taw, ay gfaning tam tam bilug ay tam amatanganan at fakaylatun. Ay satu umfaurianan tam gasfuan kanya fag ngay taw.

⁴ Dewa katanya, Dius mafangafanyu tua, ay maksvn nu kesug antam.

⁵ Ebi dewa tam kata nu mabulan aroro sa tam fakamaboun, Dius nafaleleg tua antam gasfuan tam Fun Isus. Matuyan anlangfe tua tam aroro sat fagmagalangun.

⁶ Ay kanya nafadog tua nafaleleg antam gasfuan anya. Ay siginan tam fagmasadiun sa tam Fun Isus nafalunggung tua antam gasfuan anya sis banwa.

⁷ Kanya nafakamulun takatanya laman ban sa takadasug fag buknga, namalag yangay sa antam at fagmagalangun at yud e gfasud, siginan tam Fun Isus.

⁸ Siginan Dius at fagmagalangun anlangfe am aroro gafanud tuam. Ay kafag fakalangfean bunwa siginan ayu, nu bunway siginan tuas Dius at famonun,

⁹ ay bunwa siginan ay nafakamulun at masine. Nu katanya, we taw mafamatungudun sat nafakamulun.

¹⁰ Dius nawat antam. Ay siginan tam fagmasadiun sa tam Fun Isus, ankawat tam laman gfakamulun tam at masine. Dius nafalganan takatanya sa antam siginan yay ebi taguna.

¹¹ Nu katanya, am at yud Udyu fag ngay taw siginan ngay nu kasalug am, amatangani ay kayaunanan ebi. Ngay taw Udyu gfalingun ayu te, wam e fakatoglagan. Ay gtuyan at ngay sadili te, at ke fakatoglagan, laman gfalag te, kanya tua Dius at ngay taw. Dewa katanya, at ke fakatoglagan at masuad, taw way at nafakamulun sit bilug.

¹² Amatangani ay kayaunanan ebi, yam ansadi si tam Fun Isus, ay wam katap sas talun Israel at ngay taw, ay wam e afud Dius at fatuyanan sas taw Israel. Wam e fagsafulun sabaliwas Dius ay wam e fagsegun fakalangfean.

¹³ Ay aroro ansadi tuam sa tam Fun Isus, ebi dewa am ngayayu si anya, siginan tam Fun Isus at nabulanan nafakbang tua ayu sas Dius.

¹⁴ Kanya nafae fagmanabayanun antam ay nafasadi antam, ami fag ngay taw Udyu ay am at yud Udyu. Siginan at nabulanan kanya nafalyam wan fandoddotaman takata sik alad tagfasaruayan antam.

¹⁵ Kanya nafakamulun takatanya siginan nu gfae yud e tungkul taw Udyu at faugali ay at ngay suguan. Kanya at algan namasadi kafag duak gaban taw, nu katanya, kanya nafae fagmanabayanun kafag ngay taw.

¹⁶ Siginan tam Fun Isus at nabulanan sas fasulungan kayu, kanya nafatabu wan kafag duak gaban taw at fagawayanun, ay nafasadi wan laman namafoli sas Dius.

¹⁷ Tam Fun Isus andasug ay nafoyung at Masine fag Barita sabaliwas fagmanabayanun laman sas fagayu taw, sa ayu at yud Udyu fag ngay taw at ngayayu sis Dius, ay sas taw Udyu at munakbang si anya.

¹⁸ Aroro sa tam Fun Isus, gsud tua tam manangakbang sa tam Mama siginan at Masine fag Falad.

¹⁹ At masuad, bundi am sik ngay betaw ya, ay bundi am tagsiginan ya tangayayu fag talun, nu bunway Dius tuam at nafili ay anfamut tuam sas Dius at ngay taw.

²⁰ Itam fag ngay tagafanud kata tam sik bale daul, tam turuk, Isus at ngay nasugu wan ay Dius at ngay taglong, ay tam fagtungkudan turuk, we tiba nu bunway tam Fun Isus wan.

²¹ Galay sadik fangawat nafasugfun sa anya, nu katanya, ankata sik bale at mafasinean at nafasaman laman sa tam Fun.

²² Ay siginan yangay ay fagmasadiun sa tam Fun Isus, kanya gfasfuan yangay gfalindug ayu laman Dius am at Masine fag Falad at fagbanwanan.