Efesu 1 - Fanawbuid tagsibaliwas Fakayabian

¹ Au Pablu, tam Fun Isus at nasugu kata Dius at fakaylatun. Griruk au sa ayu, Dius at nafili fag ngay taw sanya sfuruan Efesu, at matuyan fia tagalo tam Fun Isus.

² Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

³ Segi Dius, tam Fun Isus at Mama, aroro kanya nafon tua sa antam fagayu fanfalad fag ngay famonun siginan nu nsadi tam sa tam Fun Isus.

⁴ Aroro siginan tam fagmasadiun sa anya, kanya nafili antam siginan yay nu yud nawat fagdaul daga, laman umsine tam ay di tam e malong sas Dius at daga salubangan. Aroro kesug tua antam,

⁵ kanya nafalganan antam laman kangayan tam te, at ngay sisian, siginans Isus tam Fun. Katanya at algan ay at fakaylatun.

⁶ Fauseganani Dius, aroro kanya nafakamulun tua at madulo fag famonun sa antam siginan at fakesugun at Baguama.

⁷ Siginan tam Fun Isus at taguk, anlangfe tam, ay nalyam wan tam ngay asalanan. Nu katanya, Dius nafon sa antam at maksvn fag fagmagalangun,

⁸ gasfuan at famonun sa antam fag fagsafulun ay fag fagmamatanganun,

⁹ laman tumogdungug tam fia Dius at algan at masuksukan, gfaning at fakaylatun, at fagnamafasludanun siginan tam Fun Isus,

¹⁰ nu ndasug ban at nafalganan fag buknga. Siginan ebi Dius e algan namasadi sa tam Fun Isus fagayu tagsis banwa ay tagsis daga.

¹¹ Aroro sa tam Fun Isus, Dius nafili emi laman at furuan, kata at fakaylatun siginan ebi sfakasigadan. Ay kanya nafafasludan takatanya kata at algan,

¹² laman ami, at naguna gafanud sa tam Fun Isus, gfauseganan ay gseg ami anya aroro sat kamasinean.

¹³ Ay kanya nafasadi yangay ayu sa tam Fun Isus nu nadungug am at matuyan fag longan, at Masine fag Barita tagfon fakalangfean. Ay aroro anke fagafanudun tuam, kanya nafon tua sa ayu at Masine fag Falad, laman at famatuyan te, kanya nafili ayu.

¹⁴ At Masine fag Falad famatuyan te, magbilug tam Dius at ngay fatuyanan sa antam at ngay nafili, yakmay ban tam nabul fakalangfean. Segi anya aroro sat kamasinean.

Pablu at Darangin

¹⁵ Nu katanya, siginan nu gdungug au sabaliwa ay fagafanudun sa tam Fun Isus ay nu kesug am Dius at ngay taw,

¹⁶ wa karagang nu guseganan au sa tam Dius aroro sa ayu. Guseganan au ayu ay gdarangin au gugat ayu,

¹⁷ ay get au gugat sa tam Fun Isus at Mama at mabalyanan laman siginan at Masine fag Falad at gubuk, gfae fagsafulun ay gfae fagmayamagun ayu, sabaliwa nu gtoglag am fia Dius.

¹⁸ Ay gdarangin kyangay te, ay ngay amatanganan nangus umyamag laman sumaful am at nafalganan sa antam fag fagsegun te, kanya ban gfon sik masine ay at yud e kurang fag famonun sat ngay nafili.

¹⁹ Ay gdarangin au te, sumaful am nangus fia Dius at fagmabalyananun yud e gfasud laman sa antam fag ngay tagafanud.

²⁰ Kanya yangay Dius at fagmabalyananun gina nafadog nafaleleg tam Fun Isus siginan at fagmabulanan ay nafalunggung anya sit siun baliwa sis banwa.

²¹ Kanya tagtungud fagayu tagfunan ay tagagbilug ngay falad, ay at ke fagmabalyananun, ay tagfunan fagayu. Ay at fagmasineun gtungud tua fagayu fagmasineun, bundi lang katsi fag ngay menit, nu bunway anggan tua takadasug yay ban.

²² Dius nafasas daga tam Fun Isus at fagmabalyananun fagayu nusnge wain, ay kanya nafili anya tagfunan sas fagayu laman gfae fagmasineun at ngay taw,

²³ at masuad te, tam Fun Isus at bilug. Kanya fagayu tagfakasakan tam Fun Isus, kata tam Fun Isus nu gfakasakan fagayu nusnge wain.