Ebreu 7 - Fanawbuid tagsibaliwas Fakayabian

Melkisedek sik Tagfon Fanggalangun

¹ Melkisedek furuan Salem at fun, ay sik tagfon fanggalangun sa Tiba Tungud fag Dius. Abrayam nu kafoli wan siginan at fagawayanan, nafablang Melkisedek, ay Melkisedek nafadante sik masine fag longan sas Abrayam.

² Ay Abrayam nafon anya at fasafuluk afud at nabul siginan at fagawayanan. Melkisedek at ngayan at masuad te, at matuyan fag fun. Ay Salem at fun at masuad yangay te, tagfae fagmanabayanun fag fun.

³ Kanya we mama ay we mina ay we mangaguyang, ay we fakasigadan ay we fakatabuan kata nu Dius at Baguama, ay sik tagfon fanggalangun kabavn ban.

⁴ Amatangani se mabalyanan Melkisedek. Dewa Abrayam tam ngay mangaguyang at mama, kanya nafon sas Melkisedek at fasafuluk afud at nabul siginan at fagawayanan.

⁵ Sis Muisis at Faugali e suguan te, Lebi at ngay kasugfunanan fag ngay tagfon fanggalangun tagbul ngay taw Israel at fasafuluk afud, kafag ngay taw Lebi dewa Abrayam yangay at ngay kasugfunanan.

⁶ Melkisedek deyud siginans Lebi at kasugfunanan, nabul Abrayam at fasafuluk afud, ay nafadante Abrayam, Dius at fagfatuyanan fag taw.

⁷ Nasaful watam te, tagfadante gtungud tua at fagfadantean fag taw.

⁸ Ngay taw Lebi, tagbul at fasafuluk afud, kabul way. Dewa katanya, Dius at Rirukan nafatuyan te, Melkisedek ban gleleg tua kabavn.

⁹ Nu katanya, malong tam te, aroro Abrayam nafon sa anya at fasafuluk afud, anggan Lebi nafon yangay sa anya at fasafuluk afud siginans Abrayam at nafakamulun,

¹⁰ aroro gina Melkisedek gfablang Abrayam, Lebi si yay at mangaguyang at bilug.

¹¹ Dewa Muisis at Faugali gsugu te, taw Lebi tagfon fanggalangun, kafag ngay tagfon fanggalangun wa mafae yud e asalanan nusnga sinu fag taw. Nu katanya, masine nu e sadi yak tagfon fanggalangun takata Melkisedek, ay di kata Arun.

¹² Nu natubus wan tagfon fanggalangun, at masuad anggan at faugali tubusi yangay.

¹³ Kanya fag longan sabaliwa tam Fun, tagsiginan way tibak kasugfunanan. Ay we siginan kafag kasugfunanan tagfon fanggalangun.

¹⁴ Mayamag wa te, tam Fun siginans Uda at kasugfunanan. Ay Muisis we foyungan te, e tagfon fanggalangun ban sanya ginan fag kasugfunanan.

¹⁵ Ay ankugat yay nu mayamag takatanya gina sik tagfon fanggalangun ansure kata Melkisedek.

¹⁶ Kanya ansik tagfon fanggalangun, bunwa te, at mangaguyang sik tagfon fanggalangun, nu bunway siginan tua at leleg at mabalyanan at yud e fakatabuan.

¹⁷ Aroro katatuy at Rirukan sabaliwa anya te, “Sik tagfon ban o fanggalangun kabavn kata Melkisedek.”

¹⁸ Nu katanya, Dius natubus taguna fag faugali aroro mamomuy way ay we tungkul.

¹⁹ Aroro Muisis at Faugali wa mafafasine nusnge wain. Ay katsi e nafadasug sa antam sik fagsegun tagtungud tua ebi tam fagsegun. Ay siginan kanya fag fagsegun manangakbang tua tam sas Dius.

²⁰ Dius gina gfadasug kafag faugali bagu, kanya nalong tua sik famatuyan fag longan. Ay dewa katanya, kanya wa nalong ya sik famatuyan fag longan gina gfili Arun at ngay kasugfunanan laman sik ngay tagfon fanggalangun.

²¹ Ay gina Dius gfili Isus, kanya nalong tua sik famatuyan kata sit Rirukan at foyungan te, “Tam Fun nafatuyanan te, ‘Kabavn ban sik tagfon o fanggalangun.’ Ay at fatuyanan takatanya di ban gbadbalian kabavn.”

²² Ay aroro Dius nafatuyanan takatanya, Isus wan tagfatuyan sa antam te, at bagu fag nasadian gtungud tua nu masine.

²³ Ebi taguna ngayuk taw tagfon fanggalangun, ay nu nbul wan at sadik tagfon fanggalangun, e gtubus wa anya laman gfataglayun at fakamulun.

²⁴ Dewa katanya Isus gleleg tua kabavn, ay kanya sik tagfon fanggalangun kabavn ban.

²⁵ Nu katanya, kanya mafalangfe fagayu taw takakbang sas Dius siginan anya, aroro kanya gleleg tua kabavn laman tagwabilug kafag ngay taw sas Dius.

²⁶ Nu katanya, Isus wan tam tiba tungud fag tagfon fanggalangun. Kanya masine, ay we malong, ay di e asalanan, ay masaman tua siginan sangay tagasalanan, ay nafabat anya sa tiba tungud fag banwa.

²⁷ Isus wa kata tibak tagfon fanggalangun, tagfon gugat at fanggalangun kayu menit, taguna laman sat sadili asalanan ay sanya ginan laman sa sangay taw at ngay asalanan. Isus sadi ginan way nu gfon fanggalangun, gina way lang gfon at sadili sas fagayu taw.

²⁸ Tiba tungud fag ngay tagfon fanggalangun at kinfili, gfaning Muisis at Faugali, e fagmamomuyun way. Ay Dius nu nafon wan Muisis at Faugali, abandi, Dius nafili at Baguama siginan nu glong sik famatuyan fag longan, ay kanya nafayud e malong anya kabavn ban.