Ebreu 1 - Fanawbuid tagsibaliwas Fakayabian

Dius Naringang siginan at Baguama

¹ Ebi Dius naringang sa tam ngay mangaguyang ngayu ginan siginan at ngay taglong, ay saman wa samank balyawvtan.

² Ay katsi, taguyan fag ngay menit, kanya naringang sa antam siginan at Baguama. Ay siginan yangay at Baguama Dius nawat fagdaul daga ay nafili anya laman tagagbilug fagayu nusnge wain.

³ Dius at fagmasineun at damlag kalag sit Baguama, aroro nu setain Dius, katanya yay anggan at Baguama. Ay at Baguama wan tagbakvd fagayu nusnge wain siginan at mabalyanan fag aringang. Ay kanya nu nafasine wan tam ngay asalanan, namalunggung sas banwa sat Mabalyanan fag Dius at siun.

At Baguama Gtungud tua ngay Tagbarita

⁴ Nu katanya, kanya gtungud tua ngay tagbarita aroro Dius at nafon anya fag ngayan gtungud tua at ngay tagbarita at ngayan.

⁵ Kabavn Dius wa batang glong sas nusnga sinu fag tagbarita te, “O wan ku Baguama, ay katsi au wan am Mama.” Ay wa yangay e longan sabaliwa sik tagbarita te, “Au waban fia at Mama, ay kanya waban fia ku Baguama.”

⁶ Ay dewa katanya, gina Dius gsugu at Baguama fag sesadi ste swa daga, kanya nalong te, “Masine Dius at tagbarita fagayu nu gseg tua ban anya.”

⁷ Katatuy Dius at Longan nu sa man baliwa at ngay tagbarita, “Mafakata kways tagmara ngay tagbarita, ay at ngay fagsuguan kata sik afuy at igang.”

⁸ Ay sabaliwa at Baguama, Dius nalong te, “Dius, am fagfagtainanan kabavn tua ban. Ay nu gfagtainan ban o, matuyan tua.

⁹ Kaylat tuo fagmatuyanun, ay kauri o at mauri. Nu katanya, am Dius nafili emu, ay nafae fagusegananun emu gtungud yay sa am ngay iba.”

¹⁰ Dius nalong yangay te, “Ku Fun, siginan ngays fakasigadan o wan at nawat daga, ay am daluap nawat banwa.

¹¹ Kanya ban fagayu e fakatabuan way, ay o ban wo e fakatabuan kabavn. Kanya ban fagayu karasras kata sik lanbung,

¹² ay gfalut ban o kata sik lanbung aba, kata sik taw tagtubus wan at lanbung. Ay dewa katanya, di ban o gbadbalian ya, ay gleleg tua ban o kabavn.”

¹³ Kabavn Dius wa batang glong sas nusnga sinu fag tagbarita te, “Malunggungi sa ku siun fag tigyangan, nu dyakmay ban au nafasa am daga darafa am ngay fawayan.”

¹⁴ Nu katanya, ngay tagbarita, kanya Dius way at ngay fagsuguan, ay at nasugu laman at nanggubuk at fagfalangfeun fag ngay taw.