Deuterunumyu 6 - Fanawbuid tagsibaliwas Fakayabian

Esugi ay Dius Yawi

¹ Takatanya ay Dius Yawi at nalong sa angku fag ngay suguan, ngay foyungan, ay faugali ku fagnamoyungun sa ayu. Namaning ban am tuy sa ay fagnangagbilugun fag daga sas dife Liskung Urdan,

² laman ban am ay ay ngay sisian ay anggan ay ngay fufu gsuyu tua Yawi kaduge am gleleg. Nu gfaning tua ban am tuy fag ngay suguan ay fagayu fagaloan ku nafon ayu, ngaduge tua ban nu gleleg am.

³ Ngay taw Israel, dungugani ay faningi at ngay suguan laman ban manabayan tuam ay umsine ay ngay famanwanun ay laman ban umkayu am sit masine ay at maramraman fag talun, kata ay Dius Yawi at fatuyanan say ngay mangaguyang.

⁴ Ngay taw Israel dungugani: Yawi tam Dius sadi way.

⁵ Esugi ay Dius Yawi sas fagdaul ay amatanganan ay sas fagdaul ay fakaylatun ay sas fagdaul ay fagmabitsugun.

⁶ Lag am kalyam ku nafoyung ayu katsi fag ngay suguan.

⁷ Foyungi ban sa ay ngay sisian. Ay longi ban gugat gina am si ay bale ay gina am glao, ay gina am nantiug, ay gina am anfulo.

⁸ Ay salodi sa ay ngay daluap ay sa ay ngay dangasan laman sik famamatang sa ayu.

⁹ Ay riruki yangay si ay ngay tungud sakbawan bale ay si ay ngay sakbawan alad.

¹⁰ Ay ay Dius Yawi tumaban ayu sa kafag talun at nafatuyanan sa ay ngay mangaguyang Abrayam, Isak, ay Akub. Kanya fag daga gbia, ay e ngay furuan ayu daul maramraman, ay bunwa am ya at nawat.

¹¹ E ngay bale yangay sanya at mapnu nusnge wain ay bunwa am ya at nainlufuyan, ay e ngay bubun yangay ay bunwa am ya at naali, ay e fagtanuman wat ubas ay e ngay fun ulibu ay nayud natanum ay nu naon am napsug am.

¹² Tuyani te, wa ban am kalyam Yawi, at nafaduksun ayu siginans talun Igiptu nu inda nu gafagsuguanan am.

¹³ Suyui ay Dius Yawi, kanya yakman lang ay fagfausegananun ay sa yakman lang at ngayan nu gfatuyanan am.

¹⁴ Lag am galo tibak fagsegan, ngay taw tagbanwan si ay ligung at fagsegan,

¹⁵ aroro ay Dius Yawi wa kaylat nu e tiba am fagsegan. Nung way ban am naseg tibak fagsegan, Yawi ban kadotama ay gfamin ayu siginans fagdaul daga.

¹⁶ Lag am gfaskud ay Dius Yawi kata ay nafakamulun sis Masa.

¹⁷ Faningi Yawi at ngay suguan ay at ngay foyungan, ay at ngay faugali at nafon ayu.

¹⁸ Fakamuluni at matuyan ay at masine sis Yawi at daga salubangan. Laman umsine ay kayaunanan ay magbilug am at masine fag daga at nafatuyanan sa ay ngay mangaguyang.

¹⁹ Kanya ban nangaiyan si ay daga salubangan ay ngay fawayan kata at longan.

²⁰ Ay nu ndasug ban at buknga ay ngay sisian ban nu nainto ayu te, “Nataw at masuad Yawi tam Dius at suguan antam fag ngay foyungan ay fag ngay faugali ay fag ngay suguan?”

²¹ longi ban sa anya fagayu te, “Ebi nafagsuguanan ami Igiptu at fun, dewa katanya, siginans Yawi at fagmabalyananun nafalfas tua emi siginan em fagafagsuguananun.

²² Nalag ami at ngay nafakamulun at mabalyanan ay at maksvn nu madulo nu gfaurianan ngay taw Igiptu, anggan Igiptu at fun ay at talnayan.

²³ Ay kanya nafalao emi siginans talun Igiptu laman nantaban stie fag talun at nafatuyanan sa tam ngay mangaguyang.

²⁴ Yawi tam Dius nasugu emi te, masine nu gfaning ami tuy fag ngay faugali, ay suyui anya laman dimi e fagayudanun ay laman ngaduge tua nu gleleg ami kata katsi.

²⁵ Ay nu gfaning tua tam fia Yawi tam Dius at ngay suguan, umsik ngay matuyan ban tam sit daga salubangan.”