Deuterunumyu 2 - Fanawbuid tagsibaliwas Fakayabian

Sis Talun at Yud e Taw

¹ Kata Yawi at suguan angku, anfoli tam sat yud e gbanwan fag talun, sas dalan tagsas Dagat Maraska. Ay tangaduge naligungan way tam Seir fag talun at ngay buksul.

² Ay Yawi nalong sa angku te,

³ “Ngaduge wan nu gligungan am ste fag buksul; katsi taglayuni sas fawalan fag alvngvdan.

⁴ Nanlong o sa sangay taw te, ‘Nandalan am sa ay kaiban at talun sis Seir, sas Isaw at ngay kasugfunanan tagbanwan sanya. Ay kanya ban fagayu umlimu ayu, dewa katanya, dirii tua.

⁵ Lag am gfawayan anya fagayu, aroro nafon kwan sa anya ngay buksul tagsis Seir laman at fagagbilugun fag daga, ay sanya kwe fon ayu nusdi sik afud.

⁶ Ay bayadi ban salapi at nafon ayu fag fakonun ay fanginum.

⁷ Amatangi nu setain nu ggubuk au ayu sas fagayu ay nafakamulun. Au Yawi at nalaga ayu gina am glao si tangayayu fag talun at yud e gbanwan kaduge ufatk safuluk banwa, ay kadugenya diam nayudan nusnge wain.’ ”

⁸ Nu katanya, nadalan tam sa tam ngay kaiban Isaw at kasugfunanan tagbanwan sis Seir. Wa tam nadalan sas Araba fag dalan tagsiginan sangay furuan Elat ay Esyun-Geber. Gina tam glao sit yud e gbanwan fag talun Muab,

⁹ Yawi nalong sa angku te, “Lag am nangasalag ay namawayan ngay taw Muab, aroro nafon kwan sa anya fagayu talun Ar, laman at daga, ay sanya kwe fon ayu, nusdi sik afud.”

¹⁰ Ebi taguna ngayuk taw Em tagbanwan sis Ar. Kanya fagayu ngabat kata ngay taw Anak.

¹¹ Nafangayan yangay anya fagayu te, taw Refa, kata taw Anak, dewa katanya, ngay taw Muab nafangayan kanya fag ngay taw te, Em.

¹² Ebi tagbanwan sis talun Seir ngay taw Ur way, dewa katanya, Isaw at kasugfunanan naiyan. Ay Isaw wan at ngay kasugfunanan tagbanwan sanya, kata ngay taw Israel at nafakamulun sa sangay taw Kanaan, sis Yawi at nafon sa anya fagayu fag daga.

¹³ Sanya ginan, Yawi nalong antam te, “Nanlangfe am Liskung Sered,” ay nadife tam.

¹⁴ Anfasludan takatanya gina anlangfe tuluk safulu e waluk banwa siginan nu glao tam siginans Kades-Barnea. Ginanya, kafag kasugfunanan ngay taw Israel at ngay tagfawayan anbul kata Yawi at longan.

¹⁵ Yawi nafaurianan wan kafag ngay tagfawayan, ay kanya fagayu anbul.

¹⁶ Ay kanya fag ngay tagfawayan nu nbul wan,

¹⁷ Yawi nalong sa angku te,

¹⁸ “Katsi fag menit, fagayu am loi wan sas talun Muab at fatuan tagsis Ar.

¹⁹ Ay nu ndasug am sa sangay taw Amun, sas Lut at ngay kasugfunanan, lag am gfauri ay lag gfawayan, aroro nafon kwan sa anya fagayu kanya fag talun, ay sanya kwe fon ayu nusdi sik afud.”

²⁰ Ebi taguna gtuyan te, kanya fag daga ngay taw Refa at daga, ay ngay taw Amun nafangayan kanya fag ngay taw te, taw Samsum.

²¹ Kanya fagayu, ngayu ay mabitsug ay ngabat kata ngay taw Anak. Yawi nagbilug ngay taw Amun laman gfababo ngay taw Refa, ay kanya fagayu naiyan ay nabanwan sit talun.

²² Katanya yangay Yawi at nafakamulun sas Isaw at kasugfunanan tagbanwan sis Seir, aroro kanya fagayu nafabul ngay taw Ur laman gbanwan sat ngay daga. Dasug katsi, kanya fagayu gbanwan yay sanya fag daga.

²³ Katanya yangay at kinfasludan gina ngay taw Kaftur namawayan ngay taw Abim tagbanwan sis Gasa fag ngay furuan. Kanya fagayu nafabul ngay taw Abim ay nagbilug at talun.

²⁴ Sanya ginan, Yawi nalong te, “Katsi difei wan sas Liskung Arnun. Nafon kwan sa ayu fun Sikun fag taw Amur tagsis Kesbun, ay anggan fagdaul at talun. Namawayan am anya ay nangagbilug am at talun.

²⁵ Siginan katsi fag menit, gfon au sas fagayu talun sas fagdaul daga sik fakalimuun sa ayu. Fagayu at nadungug sabaliwa ayu gtadtaruyan kalimu.”

Fun Sikun Nababawan

²⁶ Nu katanya, gina tam sis talun at yud e gbanwan sis Kedemut, nasugu au sik ngay tagfosuk longan sas Sikun, Kesbun at fun laman nanlong anya te, gdalan ami anya manabayan. Nalong au te,

²⁷ “Nu masine, aylati nu gdalan ami sa ay talun. Sa way ro tagbia fag dalan nu glao ami, ay wa ro mi gsaruy.

²⁸ Gbayad yay ro mi em fakonun ay em fanginum. Em fagetun sa emu, aylati nu gdalan ami sam talun,

²⁹ kata Isaw at ngay kasugfunanan tagbanwan sis Seir ay ngay taw Muab tagbanwan sis Ar at nafakamulun sa emi. Aylati nu glangfe ami yakmay ami andife Liskung Urdan, sas Yawi at nafon emi fag daga.”

³⁰ Dewa katanya, Sikun, Kesbun at fun wa naylat nu gdalan tam sat talun, aroro Yawi nafaogat at amatanganan, laman gfababawan sa antam, kata at nafakamulun katsi.

³¹ Sanya ginan, Yawi nalong sa angku te, “Gfasigad au gfon ayu Sikun ay fagdaul at daga, nu katanya, fasigadi wan nu gfawayan am anya fagayu, ay nu nangagbilug am at daga.”

³² Gina fun Sikun ay at ngay tagfawayan nanamawayan antam sis furuan Yaas,

³³ Yawi tam Dius nafababo antam ay nafabul tam anya, anggan at ngay sisian ay at ngay tagfawayan.

³⁴ Ay ginanya, nagbilug tam fagayu at furuan ay nafabul tam anya fagayu: ngay mangama, ngay mangena, ay anggan at ngay sisian. Watam e nafasawad tagleleg.

³⁵ Nabuba tam at ngay fagbaugun ay fagayu at ramraman siginan at ngay furuan.

³⁶ Yawi nagubuk antam gago Aruer fag furuan tagsis tigyangan Liskung Arnun ay anggan tagsanya fag furuan, ay anggan sitsigons talun Gilyad. We furuan at magaras at dingding alad tam nayud nakatu gsakbo.

³⁷ Dewa katanya, kata Yawi tam Dius at suguan antam, wa tam ankakbang sa sangay taw Amun at daga, ay sas Liskung Abuk, ay anggan sa sangay furuan at munakbang si sangay buksul.