Deuterunumyu 10 - Fanawbuid tagsibaliwas Fakayabian

At Faduak Gang Dalifi

¹ Ay ginanya, Yawi nalong sa angku te, “Fasinei duak dalifi kata ebi taguna, ay nangundaud o sas buksul laman nanlag angku. Nangawat yangay o at fagsuadan siginan sik kayu.

² Sanya ginan, nanriruk kban sa kafag duak dalifi kata ku nariruk si taguna fag duak dalifi am narufa, ay suadi ban sam nawat fag fagsuadan.”

³ Nu katanya, nawat au sik fagsuadan siginans akasya ay duak dalifi kata ebi taguna. Sanya ginan, naundaud au sas buksul gbuba kafag duak dalifi.

⁴ Yawi nariruk sanya kata at nariruk ebi taguna, at suguan fag safulu at nalong ayu siginans afuy gina am maful fag menit sis day buksul. Ay sanya ginan Yawi nafon sa angku kafag duak dalifi.

⁵ Ay natagbung au siginans buksul ay nasuad au sa ku nawat fag fagsuadan, kata Yawi at nasugu, ay dasug katsi sanya yay gugat.

⁶ Ngay taw Israel nalao siginan sangay taw Akan at bubun tagsas Musera. Ay sanya wan Arun nu kabul ay sanya yangay nu gfoli anya. Ay at baguama Elyasar at natubus anya laman sik fun tagfon fanggalangun.

⁷ Sanya ginan, kanya fagayu nalao sas Gudguda ay sas Utbata, sik talun at ke ngay liskung.

⁸ Ay ginanya, Yawi nafili Lebi at kasugfunanan laman tagbuba Fagsuadan at Nasadian ay at namakamulun sis Yawi at daga salubangan ay laman namadante ngay taw sa at ngayan. Ay dasug katsi kanya fagayu gfakamulun takatanya.

⁹ Kanya wan at masuad Lebi at kasugfunanan at fagyudun e kwa ya daga, wa kata tibak taw Israel. Kanya fagayu at afud Yawi wan, kata ay Dius Yawi at longan.

¹⁰ Kata ebi taguna ku nafakamulun, sanya kway gugat sbuksul kaduge ufatk safuluk menit ay ufatk safuluk yabi. Nu katanya, Yawi nadog yay nadungug angku ay di nafabul ayu.

¹¹ Yawi nalong sa angku te, “Loi wan ay nanfangguna o ngay taw Israel nansakbo ay nangagbilug sa ku nafatuyanan sa ayu ay sa ay ngay mangaguyang fag talun.”

Suyui ay Faningi Yawi

¹² Ngay taw Israel, katsi ay Dius Yawi get sa ayu te, suyui anya ay mabanwani kata at balyawvtan, ay esugi ay fauseganani anya sas fagdaul ay amatanganan ay sas fagdaul ay fakaylatun.

¹³ Faningi fagayu at suguan ay at faugali ku nafon ayu katsi fag menit laman ban manabayan tuam.

¹⁴ Ay Dius Yawi tagagbilug fagdaul banwa, dewa tangabat fag banwa, ay anggan fagdaul daga ay fagayu tagsanya.

¹⁵ Dewa katanya, Yawi nafili ay ngay mangaguyang laman kesug ay nafili ayu at kasugfunanan sas fagayu talun, ay dasug katsi am yay gugat at nafili laman at ngay taw.

¹⁶ Nu katanya, fabalii wan ay ngay amatanganan, ay lag am kamaogatun ay ngay amatanganan.

¹⁷ Aroro ay Dius Yawi, gtungud tua tibak dius ay tibak fun. Kanya at mabalyanan tua ay at madulo fag Dius. Kanya di e fagfili ay wa gbul famaylatan fag famonun.

¹⁸ Kanya ggubuk at yud e fagtainan ya, ay ngay fagbubayun. Ay kanya kesug ngay betaw ay gfon tua at fakonun ay at lanbung.

¹⁹ Nu katanya, esugi yangay ay ngay betaw aroro ebi sik ngay betaw yangay am sis talun Igiptu.

²⁰ Suyui ay Dius Yawi, ay faningi tua anya, ay sii tua gugat anya, ay nu gfatuyanan am fasai yakman lang at ngayan.

²¹ Segi anya, aroro kanya wan at nafakamulun sa ayu at maksvn ay at madulo nusnge wain ay nalag.

²² Gina ay mangaguyang kadasug sas talun Igiptu, kanya fagayu fitu yayk safulu, dewa katanya katsi, Yawi nafayu ayu kayu galeme sis banwa.