Daniel 7 - Fanawbuid tagsibaliwas Fakayabian

Daniel at Taginfan sabaliwas Ufatk Mangilafang

¹ Ebi taguna fag banwa gina fun Belsasar gfunan sis Babilunya, Daniel anke taginfan. Kanya nariruk at taginfan katatuy:

² “Sik yabi, e nalag au si ku taginfan sik tagbia fag dagat ay sik maksvn fag lalab nauyup siginans ufatk fugungan fagdaul daga.

³ Ay ufatk mangilafang tagsaman ansure siginans dagat.

⁴ “Taguna fag mangilafang kata sik liun, ay e fakfak kata sik manuk tungud. Nalag au at fakfak nu kagatvng. Ay kanya namalindug kata sik taw ay anke amatanganan kata sik taw.

⁵ “At faduak mangilafang kata sik usu. Kanya malindug ay e tangagan tuluk tagyang. E nalong sa anya te, ‘Kin, fafanudani wa fia emu oni yamas!’

⁶ “Ay at fatuluk mangilafang kata sik leupardu. Kanya e ufatk fakfak sit guyuy ay at alfuyu ufat. Kanya e fagmabalyananun gfangguna.

⁷ “Ginanya yangay fag yabi, nalag au at faufatk mangilafang. Kanya malimu ay magaras. Kanya nayukfu ay naramyuk at ngay nagamat siginan at bagang fag sanbung, ay kanya gsiad wan at nagsawadan. Kafag mangilafang saman way at tuluk mangilafang aroro kanya e safuluk sunge.

⁸ “Kaduge au gamatangan at ngay sunge, nalag au sik sunge sirut nu gtugbung, sanya ginan tuluk sunge an-gunut. Kafag sunge e mata kata sik taw ay garingang kamatungudun.

⁹ “Sanya ginan, nalag au sik ngay faglunggungan, ay tagleleg kabavn fag Dius nananmalunggung sanya fag faglunggungan at sadi. At lanbung ay at buk masulo at kaksvnan nu malaksi. Ay at faglunggungan ke ngay balingkitan gigang.

¹⁰ Ay afuy gfamilugan siginan anya. Ay ngayuk tagbarita gfauseganan anya. Kanya nafalganan wan nanwabilug, ay nalunggab ngay fafil laman nanginsaful.

¹¹ “Gfataglayun au gdama kafag sunge takamatungudun, ay nalag au nu gfabul at faufatk mangilafang. Ay naukas anya sasad afuy.

¹² Ay e nabul at tuluk mangilafang at fagmabalyananun, ay nafabayan anya nu gleleg kaduge sik buknga sirut.

¹³ “Sanya ginan, nalag au takata sik taw sis wa linyabu. Kanya ankakbang sa tagleleg kabavn fag Dius.

¹⁴ Ay Dius nafauseganan anya ay nafon fagmabalyananun laman gfunan, ay fagayu gaban taw sas fagayu talun sas fagdaul daga, tagsaman at ngay fangaringang naseg anya. Kanya nu gfunan we fakatabuan. Ay we marasras at fagfagtainanan.

At Taginfan at Masuad

¹⁵ “Nafanawa au ku ngay nalag.

¹⁶ Ay sa ku taginfan ankakbang au sat sadi at malindug ay nainto au te, ‘Nataw tuy ku ngay nalag at masuad?’

¹⁷ “Kanya nabalus angku te, ‘Kanya fag ufatk mangilafang gfaydayuanan sas ufatk fun nu nanfunan ban sas fagdaul daga.

¹⁸ Dewa katanya, Tiba Tungud fag Dius ban namon sat ngay taw yud e malong fag fagmabalyananun laman ban gfunan kabavn.’

¹⁹ “Nainto kyay fia te, ‘Nataw at faufatk mangilafang at fagsamanun way?’ Kanya malimu nu kadama ay at ngay bagang sik ngay sanbung ay at ngay u tansu. Kanya nayukfu ay naramyuk at nagamat ay kanya nasiad way lang at nagsawadan.

²⁰ Nainto kyangay fia sa anya te, ‘Nataw at masuad kanya fag safuluk sunge ay at sadi at sunge at natugbung ay at kin-gunut fag tuluk sunge.’ Kafag sunge e mata ay e bibig kamatungudun nu garingang, ay nu kadama amabalyanan yap kanya fag tuluk sunge.

²¹ Nalag au tuy fag sunge gfawayan Dius at ngay taw at yud e malong, ay kanya nababo.

²² Sanya ginan, andasug Tiba Tungud ay Tagleleg kabavn fag Dius, ay kanya gwabilug gfadiuganan at ngay taw at yud e malong. Ay andasug at buknga kanya fagayu nu gfunan.

²³ “Katatuy at famayamag sa angku: at faufatk mangilafang gfafaskudanan sas faufatk fagfagtainanan stes fagdaul daga tagsaman tibak fagfagtainanan. Kanya nansiad ay nanrasras fagdaul daga.

²⁴ Kanya fag safuluk sunge gfafaskudanan sanya fag safuluk fun at nanfunan ban sanya fag fagfagtainanan. Tagsaman fag fun nantubus anya fagayu ay namaragang kafag tuluk fun nu gfunan.

²⁵ Ay kanya ban gfalingun Tiba Tungud fag Dius. Dius at ngay taw we malong, ay kafag fun namauri yangay anya fagayu. Kanya namayud e masuad ngay fagmafulun ay faugali. Kanya nangagbilug Dius at ngay taw kaduge tuluk banwa ay sik wabilug.

²⁶ Dewa katanya, kanya ban nanwabilug, ay e gbul ban siginan anya at fagmabalyananun, ay e gfabul ban anya.

²⁷ Sanya ginan, Tiba Tungud fag Dius namon sat ngay taw at yud e malong fag fagmabalyananun laman gfunan sas fagayu fagfagtainanan sas fagdaul daga. Ay at fagfagtainanan ban we fakatabuan, ay fagayu ban tagfangguna gseg ay gfaning anya.

²⁸ “Katanya ku taginfan. Nafanawa au ay anlimu. Dewa katanya, kwa nalong ku taginfan sas nusnga sinu.”