Daniel 1 - Fanawbuid tagsibaliwas Fakayabian

Daniel ay at ngay Fagadgalangan

¹ Gina sis fatuluk banwa fun Yuyakim nu gfunan sis Uda, Nabukudunusur, Babilunya at fun, ay at ngay tagfawayan nananligung furuan Erusalem.

² Kanya nababo ay nataban fun Yuyakim kata Fun Dius at fakaylatun. Ay kanya nabul tibak fagagbilugun sis Dius at bale ay nabuba sas Babilunya, ay nafasat fagfasuksukan ngay ramraman sit fagsegan at bale.

³ Fun Nabukudunusur nasugu sas Aspenas, ay sa sangay tagfangguna at fun te, “Filii sik ngay baguama siginan at natabanan fag ngay taw Israel, ay ngay tagfangguna at kalongan ay siginan takadungug fag ngay talanan.

⁴ Filii at maseganama, mataglu, maleleg, at masakit kae fagsafulun ay masine laman ku ngay fagsuguan.” Ay fun Nabukudunusur nasugu sas Aspenas te, “Foyungi yangay sa anya fagayu, tam fangaringang ay tam ngay rirukan.”

⁵ Fun Nabukudunusur nasugu yangay te, “Kayu menit, am famafangon kanya fag ngay baguama fasiginani wan ku ngay fakonun ay ku fanginum. Ay nu nlangfe ban tuluk banwa nu gfoyung o, kanya ban fag ngay baguama namakamulun laman sa angku.”

⁶ Ay Daniel, Kananya, Misael, ay Asarya tagsiginans Uda at kasugfunanan antap sit nafili fag ngay baguama.

⁷ Ay Aspenas natubus kafag ngay baguama at ngayan. Ay nafangayan Daniel te, Beltesasar, ay Kananya, Sadrak, ay Misael, Mesak, ay Asarya, Abednegu.

⁸ Dewa katanya, Daniel anke algan te, wa ban kon fun Nabukudunusur at ngay fakonun ay at fanginum laman ban di gfasuya at sadili. Nu katanya, Daniel nafainfanyuan sas Aspenas te, “Lag gfon ya sa emi fun at ngay fakonun.”

⁹ Ay Dius naylat Aspenas nu kaylat Daniel at fagetun.

¹⁰ Dewa katanya, Aspenas nalong sas Daniel te, “Kalimu au fun Nabukudunusur, aroro kanya wan tagfili ay fakonun ay ay fanginum. Ay nu nalag ban te, wam kabitsug kata tibak baguama, tibaginan ban kanya gfabul angku.”

¹¹ Nu katanya, Daniel nalong sas Aspenas at nafili fag tagalaga te,

¹² “Faskudi ban emi kaduge safuluk menit. Faoni yakman lang emi gulay ay fainumi emi mamam.

¹³ Sanya ginan, namaladlabian ban o emi sa sangay baguama takon fun at ngay fakonun, ay damai ban nu setain at kinfasludan ay famakamuluni sa emi kata am algan.”

¹⁴ Ay kafag tagalaga naylat, ay kanya nafaskud Daniel ay at ngay fagadgalangan kaduge safuluk menit.

¹⁵ Nu nlangfe safuluk menit, tagalaga nalag te, Daniel ay at ngay fagadgalangan amataglu yap tua tibak baguama takon fun at fakonun.

¹⁶ Nu katanya, tagalaga at fon sa kafag ufatk baguama gulay way lang ay mamam, ay wa gfon ya fun at ngay fakonun ay at fanginum.

¹⁷ Dius nafon sanya fag ufatk baguama fagtogdungugun ay fagsafulun sangay rirukan. Saman ya kanya, Daniel anke fagsafulun sa nu gfayamag ngay taginfan at masuad.

¹⁸ Nu nlangfe tuluk banwa nu gfoyung ngay baguama fagayu, kata fun Nabukudunusur at suguan, Aspenas nataban anya fagayu sas fun at daga salubangan.

¹⁹ Ay fun Nabukudunusur nafakamatoan anya fagayu, ay nalag te, we gfasud ya Daniel, Ananya, Misael ay Asarya at fagsafulun. Nu katanya, kanya nafili kafag ufatk baguama laman at tagfakamulun.

²⁰ Ay nusnga setaw at fun at fagintoun sa anya fag ufat, nasaful te, at fagsafulun gtungud yay sangay tagsaful gfasure at ngay madulo ay tagfangufit sit fagfunanun.

²¹ Daniel gfataglayun gfakamulun sas fun Nabukudunusur sitsigons taguna fag banwa fun Sirus nu gfunan.