At Nafasure 9 - Fanawbuid tagsibaliwas Fakayabian

¹ Ay at falimak tagbarita nu nauyup at budyung, nalag au sik galeme at kintong siginans kiwang sas daga, ay e nafon sanya fag galeme fanluang lusung at maksvn nu ngabasad.

² Ay kanya nu naluang wan kafag lusung, sik anus daul naduksun sanya ginan, kata sik faygangan daul at anus. Nu katanya, menit ay kiwang andulum maksvn.

³ Ay ngayuk liung naduksun sanya ginan fag anus, ay anrapyag sas fagdaul daga. Ay nafon sa kafag ngay liung fagmabalyananun, kata sik agipan nu gsugud.

⁴ Ay e nalong sa anya fagayu te, “Lag am gfakamulun at mauri sa sangay makmak, sa sangay kayu, ay sas nusnga setaw fag fananumun. Ay fagfauriun ngay taw yakman lang at yud e rirukan sit ngay dangasan, Dius at fakatoglagan.”

⁵ Ay nalong yangay sa kafag ngay liung te, “Lag gfabul kafag ngay taw nu bunway faidapani way lang kaduge limak magdanun.” Ay kafag ngay liung nu gfaidapan kafag ngay taw, kata agipan nu nasugud sik taw.

⁶ Ay kadugenya fag ngay menit, ngay taw grvbvy balyawvtan laman kabul, ay dewa katanya, wa nke balyawvtan. Kafag ngay taw kaylat oma daul kabul, ay dewa katanya, wa kafasludan takatanya sa anya fagayu.

⁷ Kafag ngay liung mafalganan wan kata ngay kabayu at mafalganan namawayan. Ay sit ngay alfuyu e kata sik sangbo mawatan siginans gintu, ay at ngay kamatan kata sik taw at kamatan.

⁸ Ay at ngay buk kata ngay mangena at buk, ay at ngay bagang kata liun at ngay bagang.

⁹ Ay kanya fagayu e ngay famalabag sit ngay dubdub sik takata sanbung, ay at ngay fakfak nu gwvswvs kata ngay kabayu at faguyudan nu kadkalungan gina namawayan.

¹⁰ Ay kanya fagayu e ngay iug kata agipan at iug, ay siwa at iug at fagmabalyananun laman gfaidapan ngay taw kaduge limak magdanun.

¹¹ Kanya fag ngay liung at fun, kafag tagbarita tagulit lusung at maksvn nu ngabasad. Ay kafag tagbarita at ngayan sas Ebreu, Abadun, ay sas Griegu fag fangaringang, Apulyun, at masuad te, Tagrasras.

¹² Anlangfe wan taguna fag malimu, ay e kadasug yay ban dua yak malimu.

¹³ Ay at faunumk tagbarita nu nauyup at budyung, nadungug au sik aringang siginans gintu fag fagirugan fanggalangun at fugungan fag ufat tagsis Dius at daga salubangan.

¹⁴ Ay glong sas faunumk tagbarita at ke budyung te, “Falfasi at masiukan fag ufatk tagbarita sis tigyangan liskung daul Eufrates.”

¹⁵ Ay kafag ufatk tagbarita nalfas wan. Ay siginan ebi, kanya fag ufat sik nafalganan wan laman namabul at fatuluk afud ngay taw, nu ginain fag menit, fag magdanun, ay fag banwa.

¹⁶ Ay nadungug au sik aringang te, ngay tagfawayan tagsakay sit mesa kabayu, nu fagayu wan, duak sandank milyun.

¹⁷ Ay nalag au si ku taginfan sik ngay kabayu ay at ngay tagsakay, ay kafag ngay tagsakay e ngay famalabag maraska kata sik afuy sit mesa dubdub, ay kata sik gang malayung, ay melo kata sik asupre. Ay kafag ngay kabayu at ngay alfuyu kata ngay liun at alfuyu, ay naduksun siginan at ngay bibig afuy, anus, ay asupre.

¹⁸ Ay siginan kafag tuluk faurianan at naduksun siginan kafag ngay kabayu at bibig, at fatuluk afud ngay taw anbul.

¹⁹ At ngay kabayu at fagmabalyananun si wa at ngay bibig ay sit ngay iug, aroro at ngay iug e ngay alfuyu kata ngay ule, ay kanya wan tagfaurianan ngay taw.

²⁰ Ay ngay taw at yud anbul siginan kafag faurianan, wa gfaragang nu gseg at ngay awatan fag ngay fagsegan. Kanya fagayu gfataglayun yay gugat nu gseg ngay falad, ay sa sangay fagsegan at mawatan siginans gintu, salapi, tansu, gang, ay kayu, ngay fagsegan at yud glag, yud gdungug, ay yud malao.

²¹ Ay kanya fagayu wa naubun ya at fakamabulun, at fagfangufitun, at fagfanugtugun, ay at fakamatugtugun, ay at fagfangkamulun.