At Nafasure 8 - Fanawbuid tagsibaliwas Fakayabian

At Fafituk Fandafut

¹ Tupa Riangan nu nalusi wan at fafituk fandafut, banwa naragangan, at kadugean gwabilug uras.

² Ay sanya ginan, nalag au tagbarita fag fitu at malindug sis Dius at daga salubangan, ay e nafon sas galay at sadi budyung.

³ Ay nalag au sadi yak tagbarita ankakbang sas fagirugan famaebebanglu, ay kanya gbitbitan sik famanus famaebebanglu at mawatan siginans gintu. Ay nafon sa anya ngayuk famaebebanglu laman nangirug sas fagirugan famaebebanglu at mawatan siginans gintu tagsis salubangan faglunggungan, gasfuan yangay Dius at ngay taw at ngay darangin.

⁴ Ay siginan kafag tagbarita at daluap kafag famaebebanglu at anus kabat sis Dius at daga salubangan, gasfuan Dius at ngay taw at ngay darangin.

⁵ Ay sanya ginan, kafag tagbarita nabul sik ngay singsing afuy siginans fagirugan famaebebanglu, ay nafapnu sas famanus famaebebanglu, ay naukas sas daga. Ay arodi vtv, maksvn nu glingsi ay nu glimbad ay nu guig.

Fituk Budyung

⁶ Ay fituk tagbarita mafalganan wan laman guyup at budyung.

⁷ Ay taguna fag tagbarita nu nauyup at budyung, andasug at maksvn fag arak yelu kadaul ngay gang ayu sirut, ay afuy e suglat taguk. Ay at fatuluk afud daga ankirug, gasfuan at fatuluk afud ngay kayu, ay fagayu makmak sanya.

⁸ Ay at faduak tagbarita nu nauyup at budyung, sik takata tagbia fag buksul tagigang antong sas dagat. Ay at fatuluk afud dagat ansik taguk,

⁹ ay at fatuluk afud ngay awatan tagleleg sis dagat anbul, ay at fatuluk afud ngay sakayan lino ankiklas wan.

¹⁰ Ay at fatuluk tagbarita nu nauyup at budyung, sik tagbia fag galeme gigang antong siginans banwa sas fatuluk afud ngay liskung ay sa sangay bulbug.

¹¹ Kafag galeme at ngayan Mayat. Ay at fatuluk afud mamam ansik mayat, nu katanya ngayuk taw at kinbul aroro nainum kafag mamam.

¹² Ay at faufatk tagbarita nu nauyup at budyung, menit ay magdanun at fatuluk afud anrasras, ay katanya yangay ngay galeme at fatuluk afud, nu katanya at fatuluk afud yamag nalyam wan. Ay kaduge mamenit, at fatuluk afud menit wa mayamag ya, ay katanya yangay kaduge mayabi.

¹³ Ay sanya ginan nalag au sik bio nu glayug sis kiwang, ay nadungug au nu guro te, “Gina ban at tulu yak tagbarita nauyup at budyung, kadasug ban at maksvn fag malimu sa sangay taw tagbanwan sas fagdaul daga.”