At Nafasure 6 - Fanawbuid tagsibaliwas Fakayabian

Nu Glusi kafag Fituk Fandafut

¹ Ay nalag au Tupa Riangan nu glusi at taguna fag fandafut. Ay nadungug au kafag ufatk tagleleg fag awatan at sadi nu garingang kadaul sik lingsi, glong te, “Gewan.”

² Ay nadama au, ay nalag au sik kabayu malaksi. Ay tagsakay sanya gted at godun. Ay e nafon anya sik sangbo ay kanya nalo laman namawayan ay namabo.

³ Ay Tupa Riangan nu nalusi wan at faduak fandafut, nadungug au at faduak tagleleg fag awatan nu glong te, “Gewan.”

⁴ Ay ansure yangay sadi yak kabayu, ay kafag kabayu maraska. E nafon sa tagsakay, fagmabalyananun gfalyam fagmanabayanun, ste swa daga, laman ngay taw gfadfabulan. Ay e nafon sa anya sik fiso daul tagsumbalian at uyup.

⁵ Tupa Riangan nu nalusi at fatuluk fandafut, nadungug au at fatuluk tagleleg fag awatan nu glong te, “Gewan.” Ay nalag au sik kabayu malayung, ay tagsakay sanya gbitbitan sik famabudbungguan.

⁶ Ay nadungug au kata sik aringang siginan sad wabilug ufatk tagleleg fag awatan, glong te, “Sadik fabudbungguan trigu fag fangawat tinapay ay mannga tuluk fabudbungguan barli fag fangawat tinapay, nu kabayad kafanud sik taw at nagbulan sik menit. Ay dewa katanya lag o gfasik masuya langis ay anggan fanlangu.”

⁷ Ay Tupa Riangan nu nalusi at faufatk fandafut, nadungug au at faufatk tagleleg fag awatan nu glong te, “Gewan.”

⁸ Ay nadama au, ay ku nalag sik kabayu mamalaksian. Ay tagsakay sanya at ngayan Fakabulun. Ay e gguyan anya at ngayan Kinbul at Talun. E nafon sa anya fagmabalyananun gagbilug at faufatk afud daga laman ban namabul siginans fiso ay fanlunus ay fakasaitun ay siginan tagfangagat fag ngay mela.

⁹ Ay Tupa Riangan nu nalusi at falimak fandafut, nalag au sis daga fagfonan fanggalangun ngay taw at ngay falad. E nafabul anya fagayu aroro siginan nu gfoyung Dius at longan ay sabaliwa at fagafanudun.

¹⁰ Kanya fagayu maksvn nu guro te, “Em Fun at mabalyanan, ay at yud e malong ay at matuyan, seduge yaban nu gfanya ami nu namatuyan o ngay taw at asalanan ay nu namasud o sat nafabul emi fag ngay taw tagbanwan sis daga?”

¹¹ E nafon sas galay at sadi sik lanbung aba malaksi ay nalong te, “Fanyai yap sirut sik buknga nu dyakmay ban e gfabul at kasakan at kayuan ay ngay faduksay, ay kaiban fag ngay fagsuguan. E gfabul ban anya fagayu kata nu nafabul ayu.”

¹² Ay nadama au Tupa Riangan nu glusi at faunumk fandafut. Ay anke maksvn fag uig sas fagdaul daga, ay tam menit anlayung kata sik ramit malayung, ay magdanun anraska kata staguk.

¹³ Ay ngay galeme antong siginans banwa, kata sik kayu at rawvg at yud anlesan gina katong, tagmara nu nauig.

¹⁴ Ay tam banwa nalyam kata nu e nafabilug masakit sik fafil. Ay fagayu buksul ay anggan ngay furu wa si ya at mesa fagtungkudan.

¹⁵ Ay ngay fun ste swa daga, ay ngay tagfangguna, ay ngay fun tagfawayan, ay at maramraman, ay at ke ngay fanambagun, ay nusnga sinu fag taw, dewa sik fagsuguan, ay dewa yud fagsuguan, nasuksuan sa sangay luib ay sa sangay wabilug gang ay sa sangay buksul.

¹⁶ Ay kafag ngay taw glong sa sangay buksul ay sa sangay gang te, “Atongi sa emi laman ro wami glag tagmalunggung sis faglunggungan, ay laman ro wami lumag Tupa Riangan at fandotaman.

¹⁷ Aroro andasug wan at nafalganan fag menit at maksvn nu malimu, laman namaurianan ngay taw. Sinu yaban at manansalubang sat daga salubangan?”