At Nafasure 4 - Fanawbuid tagsibaliwas Fakayabian

Dius at Faglunggungan sis Banwa

¹ Nu ntabu takatanya fagayu, nalag au sis banwa sik sakbawan maluangan. Ay nadog kyay nadungug aro taw ku nadungug fag aringang takatas budyung, ay glong angku te, “Ululi stae ay gfalag au sa emu takafasludan yay ban.”

² Ay arodi at Masine fag Falad antayuk sa angku, ay nalag au sis banwa sik fanfun fag faglunggungan ay at malunggung sanya.

³ Ay at malunggung sanya ganinag kata at mafanud fag gang mameloan ay gang maraska. Ay sit faglunggungan at ligung e balango idu kata at mafanud fag gang melo.

⁴ Ay duak safulu e ufatk faglunggungan gligung sanya, ay duak safulu e ufatk fagtainan malunggung sanya, ay kanya fagayu galanbungan malaksi ay gasangboan gintu.

⁵ Ay siginan at faglunggungan nalimbad daul, gasfuan sik lingsi at awang. Ay sis salubangan faglunggungan e fituk salung gdamlag, kanya Dius at fituk falad.

⁶ Sis salubangan faglunggungan, sik dagat daul kata sik bubug ganinag, mayamag mandi. Ay matunglu sanya fag faglunggungan, ufatk tagleleg fag awatan, kanya at bilug fagdaul mafus way lang mata, dewa sit salubangan ay sit guyuy.

⁷ Taguna tagleleg fag awatan kata sik liun, ay at fadua kata sik riangan baka, ay at fatulu at kamatan kata fia sik taw, ay at faufat kata sik bio glayugan.

⁸ Kanya fag ufatk tagleleg fag awatan mesa unum at fakfak, galay at sadi mafus way lang mata fagdaul at bilug. Ay kafag ngay awatan wa karagang nu galubad dewa swa menit ay sad yabi te, “Yud e malong, yud e malong, yud e malong, Dius tam Fun at mabalyanan sas fagayu. Dius tagleleg ebi, ay katsi, ay kabavn ban.”

⁹ Ay kayu ginan kanya fag ngay awatan tagleleg gseg ay gfauseganan ay guseganan sat malunggung sis faglunggungan, at tagleleg kabavn ban,

¹⁰ kanya fag duak safulu e ufatk fagtainan malub sis salubangan faglunggungan, gseg at malunggung sanya, tagleleg kabavn ban. Ay kanya fagayu nafatungkud at ngay sangbo sis salubangan faglunggungan, ay glong te,

¹¹ “Em Fun ay em Dius, e fagmasineun tuo gbul famauseganan ay nu gseg, ay fagmabalyananun, aroro fagayu nusnge wain o wan at nawat. Ay gfaning kata am fakaylatun, kanya fagayu ankawat.”