At Nafasure 3 - Fanawbuid tagsibaliwas Fakayabian

At Rirukan sa sangay Tagafanud sis Sardis

¹ “Riruki sas tagbarita tagulit ngay tagafanud sis Sardis te, “At ke fituk falad tagsiginans Dius, kanya tagbitbitan fituk galeme glong te, Saful kway ay ngay fakamulun. Tibak taw nu gamatangan, gleleg tuam, ay at matuyan, mabulan way am.

² Mafuloani ay fabitsugi tagsi ayu at sawad tagakabulun wan. Ay glag kway ay ngay fakamulun, wa masine sa ku Dius at daga salubangan.

³ Nu katanya, amatangi tua ay nadungug ay ay fagfaningun fag foyungan. Fakamuluni takatanya fagayu, ay ubuni wan ay fagmauriun. Nu dway am gugat kafulo, umdasug au kata sik tagfangkamul, ay wam saful te, ginain fag lungud menit.

⁴ Dewa katanya, tibak taw sanya sis furuan Sardis di nafaning at iba at fakamulun at mauri. Kanya ban fag ngay taw glao gfaudgufudan angku, ay e lanbung ban malaksi, aroro matuyan tua.

⁵ Nusnga sinu ban at nababo umke lanbung yangay malaksi, ay kdi ban grarus at ngayan sis fagrirukan at ke leleg tua ban kabavn. Nustua gfoyung kban sa ku Mama ay sat ngay tagbarita at daga salubangan te, kanya ku taw.

⁶ “Nusnga sinu at ke talinga, dungugani at Masine fag Falad at longan sa sangay tagafanud.

At Rirukan sa sangay Tagafanud sis Filadelfia

⁷ “Riruki sas tagbarita tagulit ngay tagafanud sis Filadelfia te, “Tagted Dabid at fanluang di e malong ay matuyan. Kanya nu naluang wan sakbawan we madingding ya, ay nu nadingding wan we mananluang ya. Kanya glong te,

⁸ Saful kway ay ngay fakamulun. Gluang au sik sakbawan si ay salubangan at yud e mananingding. Nasaful au te, alay way ay fagmakatuun, ay baliwan galo tuam ku foyungan, ay matuyan tuam gugat sa angku.

⁹ Dungugani, namasalubang kban sa ayu ay namalub sa ay daga darafa Satanas at ngay taw, at nafamuag ay at nafamaningan te, kanya fagayu sik ngay taw Udyu. Namakamulun au takatanya sa anya fagayu laman sumaful te, kesug au ayu.

¹⁰ Nafaning tuam ku suguan ayu te, agwantani. Nu katanya, gdiri ktua ban ayu, dewa ban andasug faurianan sa sangay taw sas fagdaul daga.

¹¹ Munakbang wan nu kadasug au. Bakvdi fia tagsi ayu fag ugali laman ban nusnga sinu fag taw we maago siginan ayu ku fagnamonun ban sa ayu fag famonun.

¹² Nusnga sinu tua ban at nababo, namakata kban sik turuk si ku Dius at bale. Ay kabavn ban kanya wa galin ya sanya ginan. Griruk kban si anya ku Dius at ngayan, ay ku Dius at furuan at ngayan, at bagu fag Erusalem takadaga siginans banwa siginan ku Dius. Ay griruk kyangay ban si anya ku ngayan at bagu.

¹³ “Nusnga sinu at ke talinga, dungugani at Masine fag Falad at longan sa sangay tagafanud.

At Rirukan sa sangay Tagafanud sis Laudisya

¹⁴ “Riruki sas tagbarita tagulit ngay tagafanud sis Laudisya te, “At ke ngayan te, Anud, ay at matuyan ay at mafanud nu e longan, ay fakasigadan Dius at awatan fagayu, kanya glong te,

¹⁵ Saful kway ay ngay fakamulun. Saful au te, wam marios ay wam masugba. Marios wam nangus fia, ay mannga masugba tuam fia.

¹⁶ Ay aroro kata way am at yud bangan masugba fag mamam, ay aroro wa ngap am fia masugba ay wa ngap am fia marios, gulub kway ayu.

¹⁷ Glong am te, ‘Maramraman ami, ay ngayu em fagagbilugun nusnge wain, ay wami e fagayudanun ya.’ Ay dewa katanya wam nasaful te, gafalingunan way am ay afanyuan, ay wam e kwa, ay wam glag, ay malulasan way am.

¹⁸ Nu katanya, gfalu au ayu te, bayadi siginan angku sik gintu at kinfasine sis afuy, laman umsik maramraman am fia. Ay bayadi siginan angku sik lanbung malaksi laman gtabun ay fagmalulasanun at maksvn nu mapla. Ay bayadi yangay sik famafia ay mata, laman glag tuam fia.

¹⁹ Gfoyung au ay gatul fagayu ku fakesugun fag ngay taw. Nu katanya, ugatani ubuni ay talyuyani ay asalanan.

²⁰ Malindug au sis lod bale sakbawan ay katuk au. Nusnga sinu at nadungug ku aringang ay at naluang at sakbawan, gsakbo au ay gfasfuan au anya gfangon.

²¹ Ay nusnga sinu ban at nababo gfalunggung au sa sik faglunggungan tagsi ku day faglunggungan, ay kanya ban kata angku at nababo ay at malunggung si ku Mama at day faglunggungan.

²² “Nusnga sinu at ke talinga, dungugani at Masine fag Falad at longan sa sangay tagafanud.”