At Nafasure 21 - Fanawbuid tagsibaliwas Fakayabian

At Bagu fag Banwa ay fag Daga

¹ Ay sanya ginan nalag au sik bagu fag banwa ay fag daga. Nalyam wan at dan fag banwa ay at dan fag daga, ay we dagat ya.

² Ay nalag au at bagu fag furuan daul Erusalem at yud e malong nu kadaga siginans banwa siginans Dius. Kanya fag furuan kata sik mangena at nangadadwa, at mafalganan wan namablang at fainduganan.

³ Ay nadungug au sik uro daul siginans faglunggungan, glong te, “Damai, katsi Dius at fagbanwanan siwa sangay taw. Dius magamut kafag ngay taw. Ay kafag ngay taw ban Dius at furuan, ay Dius ban kafag ngay taw at faudgufudan, ay kanya ban kafag ngay taw at Dius.

⁴ ‘Ay ginanya ban Dius garus kafag ngay taw at liasun. Ay wa ban e fakabulun ya, ay we fakabaluun ya,’ ay we fagwaywayun ya, ay we fakasaitun ya, aroro nalyam wan at dan fagayu nusnge wain.”

⁵ Ay sanya ginan at malunggung sis faglunggungan glong te, “Damai, gfabagu kwan fagayu nusnge wain.” Ay kanya glong sa angku te, “Riruki tuy fag ngay longan, aroro mafanud ay matuyan.”

⁶ Ay kanya glong yangay fia sa angku te, “Anfasludan wan. Au wan taguna ay taguyan, ay at fakasigadan ay at fakatabuan. Nusnga sinu takadanum, gfainum au yud e bayad fag mamam tagsiginans bulbug tagfon leleg.

⁷ Nusnga sinu at nababo, magbilug ban takatanya fagayu. Ay au ban kanya fagayu at Dius ay kanya ban fagayu ku ngay sisian.

⁸ Ay nusnga sinu tagfangalimu, ay at yud gafanud, ay at maksvn nu mauri, ay takamabul taw, ay tagfanugtug, ay at mabara, ay tagseg at yud matuyan fag ngay fagsegan, ay fagayu takamuag, kanya ban fagayu at fakadasugan saways afuy daul tagigang ay asupri. Kanya at faduak fakabulun.”

⁹ Ay kafag fituk tagbarita ebi at ke ba taya mapnu taguyan fag fituk faurianan, at sadi ankakbang sa angku ay glong te, “Gewan. Namalag au sa emu Tupa Riangan at bubay.”

¹⁰ Ay at Masine fag Falad antayuk sa angku, ay kafag tagbarita nabuba angku sa sik buksul tangabat, ay nafalag sa angku at yud e malong fag furuan Erusalem nu kadaga siginans banwa, siginans Dius.

¹¹ Kafag furuan ganinag siginan Dius at fagmasineun, ay at yamag kata sik mesug fag gang, kata sik mayamag fag gang mameloan.

¹² Kanya maaladan ngabat, ay e labi duak sakbawan, ay galay sik sakbawan sik tagbarita gulit, ay marirukan si sangay sakbawan taw Israel at kasugfunanan at ngay ngayan fag labi dua.

¹³ E tuluk sakbawan sis fakamenitan baliwa, ay tuluk sakbawan sis fakayabian baliwa, ay tuluk sakbawan sis mesa alvngvdan.

¹⁴ Ay kafag furuan at alad e labi duak fagtungkudan gang, ay sanya fag ngay gang marirukan Tupa Riangan at labi duak nasugu at ngay ngayan.

¹⁵ Ay tagfakamatoan angku fag tagbarita e buba sik famasudsudan fag sanbung gintu, laman namasud kafag furuan ay at ngay sakbawan ay at ngay alad.

¹⁶ Kafag furuan at ufatk tigyangan gsud yay at kabaan. Ay kafag tagbarita nafasud furuan; at kabaan duak milyun duak sandank libuk sangbada. Gsud yay at kabaan ay at kadaulan ay at kaabatan.

¹⁷ Ay tagbarita nafasud yangay furuan at alad: at kadamvlan sadik sandan ufatk safulu e ufatk siu. Kafag tagbarita at famasud kata yays taw at famasud.

¹⁸ At fangawat kafag furuan at alad at mameloan way lang fag ngay gang. Ay at fangawat kafag furuan gintu way lang takata at mayamag fag bubug.

¹⁹ Ay sis furuan at alad e ngay gang at mafanud tagsaman saman laman famasine. At fasadi, at mameloan fag gang. At fadua, taganyang fag gang. At fatulu, tagradraskaun fag gang. At faufat, at melo fag gang.

²⁰ At falima, at maraska fag gang tagladlaksiun. At faunum, at maraska fag gang. At fafitu, tagladlaksiun fag gang. At fawalu, at melo fag gang tagadganyangun. At fasiam, at melo fag gang tagladlaksiun. At fasafulu, at melo fag gang at mamalayungan. At falabi sadi, at mamaraskaan fag gang. At falabi dua, at masialungan fag gang.

²¹ Ay at fangawat at sakbawan fag labi dua, tanan way lang at mafanud fag ngay gang. Ay at ngay dalan tanan way lang gintu, ay mayamag kata bubug.

²² Ay kwe nalag Dius at bale sanya fag furuan, aroro fagnansegan fag bale, Dius wan, tam Fun at Mabalyanan, ay Tupa Riangan.

²³ Ay kafag furuan wa gayudan ya menit ay magdanun at yamag, aroro Dius wan at fagmasineun tagyamag sanya, ay at salung Tupa Riangan wan.

²⁴ Fagayu talun at ngay taw glao ban sat yamag, ay fagdaul daga at ngay fun ayu daul namuba sanya at fagmaramramanun.

²⁵ Ay furuan at ngay sakbawan wa batang ya madingdingan fagngabak menit, aroro sanya we yabi ya.

²⁶ Ay fagayu ban talun at ngay taw namuba sanya at ngay fagagbilugun at masine ay at mabyat nu kabayad.

²⁷ Ay waban e gsakbo ya sanya nusnge wain at masuya, ay nusnga sinu fag taw tagfakamulun at maksvn nu mapla, ay fagayu takamuag. Tagsakbo ban sanya kayu way lang ban at ke ngayan at marirukan sis Tupa Riangan at fafil fagrirukan at ngay ke leleg ban.