At Nafasure 2 - Fanawbuid tagsibaliwas Fakayabian

At Rirukan sa sangay Tagafanud sis Efesu

¹ “Riruki sas tagbarita tagulit ngay tagafanud sis Efesu te, “Tagbitbitan kafag fituk galeme sit siun fag daluap, ay taglao sis wabilug fituk fagfatungkudan salung at mawatan siginans gintu, glong te,

² Saful kway ay ngay fakamulun, ay ay faginlufuyanun ay anggan ay fagagwantanun. Ay saful au te, kauri tuam at mauri fag ngay taw. Ay nainsaful am fia sa baliwa takamaningan fag ngay nasugu, ay natuyan am te, kanya fagayu kamuagan way.

³ Saful kyangay te, gugatan tuam gagwantan dewa ngayu fag fagidapun aroro galo am angku, ay diam kamomuy.

⁴ Dewa katanya, e fakauriun kway ayu: nu kesug am angku wa kaksvn ya ebi taguna.

⁵ Amatangani ay kamomuyan katsi. Ubuni wan ay talyuyani ay ngay fakamulun at mauri, aroro nu dway ban am nafakamulun takatanya, kadasug au sa ayu ay namul kwan tagsi ayu fag fagfatungkudan salung.

⁶ Ay ku fagusegananun ayu, kauri tuam ngay taw Nikulaita at ngay fakamulun kata nu kauri au.

⁷ “Nusnga sinu at ke talinga, dungugani at Masine fag Falad at longan sa sangay tagafanud. Ay nusnga sinu tua ban at nababo, kaylat kban kanya nu nangon tagfon leleg fag fun kayu at rawvg. Kanya fag fun kayu sis Dius at fagbanwanan.

At Rirukan sa sangay Tagafanud sis Esmirna

⁸ “Riruki sas tagbarita tagulit ngay tagafanud sis Esmirna te, “At nalong te, au wan taguna ay taguyan, ay at nadog naleleg, glong te,

⁹ Saful kwan ay fagagwantanun fag ngay fagidapun. Saful kway te, sik ngay maidap way am, ay at matuyan maramraman am. Ay saful kyangay te, e gfalingun ayu. Kanya fag ngay taw kamuagan te, sik ngay taw Udyu, ay at matuyan kanya fagayu Satanas way at ngay taw.

¹⁰ Lag am kalimu at munakbang wan fag faurianan ay fagnadalanun. Amatangani te, Satanas gubung ban ayu tiba laman gfaskud ayu, ay gfaurianan ban ayu kaduge safuluk menit. Matuyani tua gugat anggan sas fakabulun, ay gfasangboan kban ayu, at masuad, gfon kban sa ayu leleg at yud e fakatabuan.

¹¹ “Nusnga sinu at ke talinga, dungugani at Masine fag Falad at longan sa sangay tagafanud. Nusnga sinu tua ban at nababo, wa ban dumalan sas faduak fakabulun.

At Rirukan sa sangay Tagafanud sis Pergamu

¹² “Riruki sas tagbarita tagulit ngay tagafanud sis Pergamu te, “Tagbitbitan at maglat fag fiso tagsumbalian at uyup, glong te,

¹³ Saful kway te, ay fagbanwanan siway Satanas at fagbanwanan, dewa katanya, matuyan tuam gugat sa angku. Ay diam natalyuyan ay fagafanudun sa angku, dewa ebi gina e gfabul Antipas, ku tagfatuyan at matuyan fia, sanya si ay furuan, sis Satanas at fagbanwanan.

¹⁴ Dewa katanya, e fakauriun kway ayu. Am tiba nafaning wayam Balaam at foyungan. Kanya nafoyung sas Balak nu setain nu gfaylatan ngay taw Israel laman kon ngay fanggalangun at nafon sat yud matuyan fag ngay fagsegan, ay at nanfanugtug ay at kamatugtug. Siginan takatanya, ngay taw Israel anke asalanan.

¹⁵ Ay tiba si ayu gfaning way ngay taw Nikulaita at foyungan.

¹⁶ Nu katanya, ubuni wan ay ngay asalanan. Aroro nu dway ban am nafakamulun takatanya, wa glugo ya kadasug au sa ayu laman namawayan au ngay taw tagfakamulun at mauri, ay gafisoan kban tagsumbalian at uyup takalfas siginan ku bibig.

¹⁷ “Nusnga sinu at ke talinga, dungugani at Masine fag Falad at longan sa sangay tagafanud. Nusnga sinu ban at nababo, gfon kban at masuksukan fag fakonun tagsiginans banwa. Ay gfon kyangay ban sas galay at sadi sanya fag ngay taw sik gang malaksi marirukan at mesa ngayan bagu, we taw nasaful nu bunway at nabul way lang ban fag taw.

At Rirukan sa sangay Tagafanud sis Tiatira

¹⁸ “Riruki sas tagbarita tagulit ngay tagafanud sis Tiatira te, “Dius at Baguama at mata tagigang kata sik afuy, ay at darafa taganinag kata sik tansu. Kanya glong te,

¹⁹ Saful kway ay ngay fakamulun. Ay saful kyangay te, mafangafanyu tuam, ay matuyan, ay mafamaning, ay mafangagwanta, ay nu gfakamulun am katsi gtungud tua nu gfakamulun am ebi taguna.

²⁰ Dewa katanya, e fakauriun kway ayu. Wam nasalag Esebel fag mangena takamaningan te, sia wan Dius at taglong. Siginan at foyungan kanya gtaban ku ngay fagsuguan laman nanfanugtug ay namatugtug, ay kon at nafon fag ngay fanggalangun sat yud matuyan fag ngay fagsegan.

²¹ Nafon koma anya sik buknga laman gubun ay gtalyuyan at ugali at mauri, ay kanya wa kaylat gubun.

²² Amatangani, namadasug au sa anya at maksvn fag fakasaitun, anggan sas fagayu at natugtug anya, kanya ban fagayu nu dway naubun ya at fagmauriun.

²³ Ay gfabul kban fagayu tagfaning kanya fag mangena, laman ban sas fagayu furuan fag ngay tagafanud, sumaful te, saful kway ngay taw at ngay amatanganan ay at ngay algan. Ay namasud kban sas galay at sadi si ayu kata ay mesa nafakamulun.

²⁴ “Dewa katanya, am tiba diam nafaning Esebel. Ay diam nasaful sa baliwa kafag ngay taw at longan te, Satanas at foyungan at masuksuk. Nu katanya, kwe fagnamamutun ya ay fagaloan fag foyungan.

²⁵ Dewa katanya, bakvdi fia tagsi ayu fag ugali yakmay kban andasug.

^26-27 Ay nusnga sinu ban at nababo ay tagfaning tua ku fakaylatun anggan sas fakatabuan, gfon kban sik fagmabalyananun laman sik fun kata ku nabul siginan ku mama. Ay gfafagtainan kban sa anya ngay talun. Kanya ban gina gfagtainan, gbitbitan sik famalang sanbung, ay nanrufa ban anya fagayu kata nu grufa fangawat bisu daga.

²⁸ Ay gfon kyangay ban sa anya tagurabas.

²⁹ “Nusnga sinu at ke talinga, dungugani at Masine fag Falad at longan sa sangay tagafanud.