At Nafasure 18 - Fanawbuid tagsibaliwas Fakayabian

Babilunya nu Karasras

¹ Sanya ginan, nalag au sik tagbarita gduksun siginans banwa, kanya e maksvn fag fagmabalyananun, ay at aninag nadamlag sas fagdaul daga.

² Ay kanya maksvn nu guro te, “Anrasras wan at mabalyanan fag furuan daul Babilunya, ay katsi tagbanwan sanya, at mauri fag ngay falad, kanya at mauri fag ngay taw yabi, ay at mauri fag ngay manuk tungud, ay at mauri fag ngay mangilafang.

³ Aroro fagayu talun at ngay taw anke fagmauriun kata kafag furuan, ay kanya fagayu kata nu galangu. Ay fagdaul daga at ngay fun ansadi sa anya, ay ngay tagfalao sas fagdaul daga anramraman siginan kafag mangena nu gbayad kafag ngay tagfalao at ngay famalaoun laman gfaning at sadili fakaylatun.”

⁴ Ay arodi nadungug au sadi yak aringang siginans banwa nu glong te, “Ku ngay taw, ayayui sanya ginan fag furuan, laman diam kataip sat ngay asalanan, ay laman ban diam gafaurianan kata anya.

⁵ Aroro at asalanan at kayuan andasug wan sas banwa, ay Dius gamatang way kafag furuan at fagmauriun.

⁶ Fakamuluni sa anya kata at nafakamulun sa ayu, ay nu setain at nafakamulun sa ayu, fasudi dua ginan. Nu seyuk taya mapnu at nafakamulun sa ayu at mauri, fasudi sa anya duak kayu nya.

⁷ Nusnga setaw nu gfauseganan at sadili, faurianani ay fae fakabaluuni yangay anya, aroro kanya glong sat sadili te, Malunggung au kata sik mangena fag fun, bundi au sik fagbubayun, ay kabavn ban kwa kabalu.

⁸ Nu katanya, sik menit ban gasfuan way nu kadasug faurianan, fakabulun ay fakabaluun ay fanlunus, ay sik afuy nangirug ban anya, aroro mabalyanan tam Fun Dius tagfaurianan anya.

⁹ “Ngay fun ste sfagdaul daga at kinsadi sa anya ay at nafaning at fakaylatun, kanya ban fagayu gwayway nu nalag nu kanus siginan at fagirugan anya fag afuy.

¹⁰ Kanya fag ngay fun malindug ngayayu aroro kalimu faurianan at kindasug sanya fag mangena, ay kanya fagayu glong te, ‘Fangulan, fangulan, o fag furuan takadungug, o at mabalyanan fag furuan daul Babilunya. Aroro faurianan masakit andasug sa emu.’

¹¹ “Ay fagayu tagfalao sas fagdaul daga gwayway ay kabalu sat kindasug sanya fag furuan, aroro we gbul ya at famaloun.

¹² Nu katanya, we gbul ya at famaloun fag ngay gintu, ay sanbung salapi, ay at mafanud ayu daul fag ngay gang, ay fag ngay rurum ay at masine fag ngay fangawat lanbung, at masialungan, ay taganyang, ay at maraska, ay fagayu nusnge wain at mabebanglu fag kayu, ay nusnge wain at mawatan siginans elepanti at bagang, ay fagayu at mafanud fag ngay awatan kayu, ay tansu, ay sanbung, ay fag ngay gang malaksi,

¹³ ay famaebebanglu fag balat kayu, ay famaenamnam fakonun, ay at mabebanglu fag lune ay kayu at dagat at mabebanglu, ay fanlangu, ay langis, ay fare ay at madudugan fag trigu, ay ngay baka, ay ngay tupa, ay ngay kabayu, ay at faguyudan, ay ngay fagsuguan.

¹⁴ “Kafag ngay tagfalao glong te, ‘Fagayu am fakaylatun nusnga setaw nalyam wan. Fagayu am ramraman ay am fagmasineun nalyam wan, ay wa ban o gdog ya glag kanya fagayu.’

¹⁵ Ay at kinramraman fag ngay tagfalao siginan katanya fag ngay famaloun, malindug ngayayu, aroro kalimu kafaurianan. Ay kanya fagayu gwayway ay kabalu, ay glong te,

¹⁶ ‘Fangulan! Fangulan o fag furuan takadungug, ebi galanbungan oma o at masine ay tagladlayungun ay at maraska fag lanbung, ay gadalagan ay gasulmanan o gintu ay at mafanud fag ngay gang.

¹⁷ Ay am ramraman nu kamin sik buknga way sirut!’ “Ay fagayu tagfalao sakayan lino, ay fagayu tagsakay, ay at ngay tagfakamulun sanya, ay fagayu tagfakamulun sis dagat, kanya fagayu malindug yangay ngayayu.

¹⁸ Ay kanya fagayu kaduge gdama kafag furuan daul nu kanus gigang, guro te, ‘We gfasud kanya fag furuan nu mabalyanan.’

¹⁹ Ay kanya ban fagayu gwayway ay gfasat alfuyu dafug, fakatoglagan te kabalu, ay guro te, ‘Fangulan, fangulan, o fag furuan takadungug. Fagayu at ke sakayan lino, anramraman siginan am ramraman. Ay am ramraman nu kamin sik buknga way sirut!

²⁰ Useganani am tagsis banwa aroro at kindasug sa anya. Useganani, am Dius at ngay taw, ay at ngay nasugu, ay at ngay taglong, aroro Dius nafaurianan wa anya aroro sat nafakamulun sa ayu at mauri.’ ”

²¹ Ay sik mabalyanan fag tagbarita naurug sik gang daul, kadaul sik tagbia fag gang fanligis rawvg trigu, ay kanya naukas sasad dagat ay glong te, “Kaksvn ban nya nu e gukas at mabalyanan fag furuan daul Babilunya, ay wa ban e malag ya anya.

²² Ay wa ban gdog ya kadungug sanya tagfawang tulali, fagfawangun ke ngay bakyang ay budyung ay tiba yak fagfawangun. Ay wa ban gdog ya kalag sanya ngay taw tagsaful kawat nusnga setaw. Ay wa ban batang ya gdog kadungug nu e glubuk.

²³ Ay salung at damlag wa ban gdog ya gyamag sanya. Ay sanya ban wa batang ya kadungug takadadwa fag mangama ay fag mangena at aringang. Aroro at ngay tagfalao maksvn nu kamatungudun, ay nadaya ngay taw siginan at fagmabaraun.

²⁴ Ay Dius at ngay taglong ay at ngay taw at taguk anlag sanya fag furuan daul, ay fagayu at nafabul fag ngay taw sas fagdaul daga.”