At Nafasure 16 - Fanawbuid tagsibaliwas Fakayabian

Dius at Fandotaman fag Fituk Taya Mapnu

¹ Ay siginan Dius at bale nadungug au sik uro gsugu sa kafag fituk tagbarita te, “Loi wan ay ugwagi sas daga kafag fituk taya at bilug, kanya wan Dius at fandotaman.”

² Ay taguna fag tagbarita nalao wan ay naugwag sas daga at ba taya at bilug. Ay fagayu taw at nafariruk sit bilug kafag tagfangagat fag mela at ngayan ay tagseg at aninu nabangbang maksvn, ay maksvn nu ganini.

³ Ay at faduak tagbarita naugwag sas dagat at ba taya at bilug, ay dagat ankata sik mabulan fag taw at taguk, ay fagayu tagleleg sisad dagat anbul wan.

⁴ Ay at fatuluk tagbarita naugwag sa sangay liskung ay sangay bulbug at ba taya at bilug, ay at mamam ansik taguk.

⁵ Ay nadungug kyangay tagfagtainan mamam fag tagbarita nu glong te, “Matuyan nu gfaurianan o, o tagleleg katsi ay ebi, at Yud e Malong.

⁶ Aroro kafag ngay taw nafabul am nafili fag ngay taw ay am ngay taglong, ay at ngay taguk ankugwag. Nu katanya, taguk yangay ban am famainum sa anya fagayu. Tuy at matuyan fag faurianan sanya fag ngay taw.”

⁷ Ay nadungug au sik famalus siginans fagfonan fanggalangun, glong te, “Anud, em Fun Dius, at mabalyanan sas fagayu. Matuyan ay mafanud nu gfaurianan o.”

⁸ Ay at faufatk tagbarita naugwag sas menit at ba taya at bilug, ay ankaksvn menit nu masugba, ay ngay taw nasugba.

⁹ Ay kafag ngay taw dewa nasugba, ya kaylat gubun at ngay fagmauriun. Ay wa yangay kaylat gfauseganan Dius, abat ngate, kanya fagayu gfalingun way Dius.

¹⁰ Ay at falimak tagbarita naugwag at ba taya at bilug sa tagfangagat fag mela at faglunggungan, ay at fagfagtainanan andulum. Ay siginan at kinfasludan takatanya, ngay taw tanan wa gangrvt at ngay mesa leplep, at kaksvnan nu gidapan.

¹¹ Kanya fagayu abat ngate gubun at fagmauriun, nafauri way Dius sis banwa aroro sat fagagwantanun fag ngay fakasaitun ay fag ngay bangbang.

¹² Ay at faunumk tagbarita naugwag at ba taya at bilug sas liskung daul Eufrates, ay kafag liskung at mamam anlanggang, laman gfalganan tagsiginans fakamenitan fag ngay fun at dalan.

¹³ Ay sanya ginan nalag kyangay fia tuluk falad at mauri kata sik ngay fio, naduksun siginans ule daul at bibig ay siginan tagfangagat fag mela at bibig ay siginan takamuagan fag taglong at bibig.

¹⁴ Kanya fag tuluk falad gfakamulun at ngay madulo, ay glao sa sangay funan sas fagdaul daga, ay namaful ay namafalganan laman namawayan Dius at mabalyanan sas fagayu, gina ban andasug Dius at nafalganan fag menit.

^15-16 Kanya fag tuluk falad nafaful kafag ngay fun sa sik talun, at ngayan sas Ebreu fag fangaringang te, Armagidun. Isus nalong te, “Amatangani, kadasug kban kata sik tagfangkamul. Mauseganan ngay taw at mafuloan tua gugat, ay tagfasine tua gugat at lanbung, kanya ban nu glao, di malulasan ay di kapla sa sangay taw.”

¹⁷ Ay at fafituk tagbarita naugwag sas kiwang at ba taya at bilug. Ay siginans faglunggungan tagsis Dius at bale nadungug au sik uro daul te, “Anfasludan wan.”

¹⁸ Ay sanya ginan, maksvn nu glimbad ay nu glingsi, ay nu gawang, ay maksvn nu guig. Ya batang e kaksvn nya fag uig siginan ngay nu bagu ke taw sas daga.

¹⁹ Ay arodi, Babilunya fag furuan ankafud tulu. Ay ngay furuan sas fagdaul daga anrasras wan, ay Dius namatang at mabalyanan fag furuan daul Babilunya ay nafainum kafag taya at bilug, kanya Dius at fandotaman at maksvn fag faurianan.

²⁰ Ay fagayu furu namin, ay we kalag ya anggan buksul.

²¹ Ay siginans kiwang, narak ngayuk yelu ayu daul, at kabyatan galay sik yelu limak safuluk fabudbungguan. Ay kafag ngay taw nalong at mauri sas Dius, aroro sat kindasug fag faurianan at maksvn nu malimu.