At Nafasure 13 - Fanawbuid tagsibaliwas Fakayabian

Tagfangagat fag Mela Tagsiginans Dagat

¹ Ay sanya ginan nalag au sik tagfangagat fag mela nu kasure siginans dagat. Kafag mela safulu at alfuyu ay safulu at sunge. Ay galay sik sunge e sangbo, ay galay sik alfuyu e rirukan sik ngayan tagfauri Dius.

² Ay kanya fag mela kata kuti daul, ay at darafa kata sik mela daul tangaba at u, ay at bibig kata liun at bibig. Ay ule daul nafabalyanan tagfangagat fag mela ay nafon sa anya at faglunggungan ay at fagfagtainanan.

³ Ay nalag au tagfangagat fag mela at alfuyu at sadi e maksvn fag bangbang ay kata wan nu mabulan, ay at bangbang anfia wan, ay fagayu taw sas fagdaul daga andulo ay galo kanya fag tagfangagat fag mela.

⁴ Ay fagayu taw gseg ule daul, aroro ule daul nafon sas tagfangagat fag mela at fagmabalyananun. Ay kanya fag ngay taw gseg yangay tagfangagat fag mela ay glong te, “Sinu at mafasudsudan tagfangagat fag mela, ay sinu at mafawayan anya?”

⁵ Ule daul nafon sa tagfangagat fag mela sik bibig laman nanfamatungudun ay namauri Dius, ay gfagtainan kaduge ufatk safulu e duak magdanun.

⁶ Kanya gfauri gugat Dius, ay Dius at ngayan, ay Dius at fagbanwanan, ay fagayu tagbanwan sis banwa.

⁷ Ay ule nafon yangay sa tagfangagat fag mela fagmakatuun gfawayan ay namabo Dius at ngay taw, ay e fagmabalyananun yangay namagtainan sas fagayu kasugfunanan, ay sas fagayu gaban taw, ay sas fagayu fangaringang, ay sas fagayu talun.

⁸ Ay fagayu taw ste sfagdaul daga gseg ban anya. Ay siginan ngay fagdaul daga nu kafasigad, kanya fagayu at ngayan wa marirukan sis fafil fagrirukan at ngay ke leleg ban, kanya fag fafil, at kinbul fag Tupa Riangan at fagbakvdun.

⁹ Nusnga sinu at ke talinga, dungugani.

¹⁰ Nusnga sinu at kinfalganan gatabanan, kanya ban gatabanan wa fia, ay nusnga sinu at kinfalganan nangabul sas fiso tagsumbalian at uyup, kanya ban kabul fia. Nu katanya, Dius at ngay taw, masine nu gagwantan tua gugat ay nu e fagafanudun tua gugat.

Tagfangagat fag Mela Tagsiginans Daga

¹¹ Ay sanya ginan nalag kyangay fia sadi yak tagfangagat fag mela nu kasure siginan sad daga. Kanya gasungean daul dua kata sik tupa riangan at ngay sunge. Ay at aringang kata sik ule daul nu garingang.

¹² Siwa anya taguna fag tagfangagat fag mela at fagmabalyananun fagayu. Ay kanya gfabulun sas fagdaul daga at taw laman gseg at naguna fag tagfangagat fag mela, kanya at kinfia at nabasingan daul.

¹³ Ay kanya nafakamulun at maksvn nu madulo sis salubangan fagayu taw siginans faduak tagfangagat fag mela at fagmabalyananun. Ay siginans banwa kanya nafarak afuy sas fagdaul daga.

¹⁴ Ay e nafon sa anya fagmabalyananun gfakamulun at ngay madulo. Ay siginan at ngay madulo kanya nafandaya ngay taw sas fagdaul daga. Kanya nasugu sa sangay taw te, “Awati sik takata tagfangagat fag mela at nabasingan fiso ay at kinfia yay.”

¹⁵ Ay e nafon sa anya fagmabalyananun gfae engasan sa tagfangagat fag mela at aninu, laman maringang ay laman gsugu te, fabuli fagayu at yud gseg at aninu.

¹⁶ Ay kanya gfabulun sas fagayu taw dewa at ke fanambagun ay at yud e fanambagun, ay dewa maramraman ay yud e kwa, ay dewa sik fagsuguan ay yud fagsuguan, laman gfae fakatoglagan sit ngay siun baliwa fag daluap ay mannga sit ngay dangasan,

¹⁷ laman we fagmafabulun ya ay wa mafalao ya nu dway nafae fakatoglagan si anya kafag tagfangagat fag mela at ngayan ay mannga at ngayan at kayuan.

¹⁸ Mamatanganani tua. At mamatanganan fag taw, asafuli kafag tagfangagat fag mela at ngayan at kayuan, aroro kanya sik fagtoglagan sik taw at ngayan at kayuan. At kayuan, unumk sandan unumk safulu e unum.