At Nafasure 12 - Fanawbuid tagsibaliwas Fakayabian

Sik Mangena ay Sik Ule Daul

¹ Ay nu nlangfe takatanya fagayu, ansure sik fakatoglagan sis banwa at maksvn nu madulo, sik mangena galanbungan menit ay malindug sis magdanun, ay at alfuyu e sangbo labi duak galeme.

² Kanya gfafion ay munakbang wa nu gafasalugun. Ay kanya guro wa ayu daul aroro maksvn nu gidapan daul kasait.

³ Sadi yak fakatoglagan at kinsure sis banwa, sik ule daul at maraska, kanya e fituk alfuyu ay e safuluk sunge, ay galay sis sik alfuyu e sangbo.

⁴ Ay at iug naguyudan at fatuluk afud ngay galeme sis banwa, ay naukas sas daga. Ay sanya ginan kafag ule malindug sis mangena tagafasalugun at daga salubangan, laman ro kafag mangena nu nafasalug wan at sisian, kafag ule dayun wa kon kafag sisian.

⁵ Ay kafag mangena nafasalug wan at sisian sik munama, ay e naago kafag sisian ay nabuba sas Dius, sat faglunggungan. Ay nafili kafag sisian at namagtainan ban fagayu talun siginan at daluap fag famalang sanbung.

⁶ Ay kafag mangena nalagyu wan sas talun at yud e taw, sas Dius at nafalganan laman kafag mangena at fagbanwanan, ay nangalaga anya sanya kaduge sadik libu duak sandan unumk safuluk menit.

⁷ Ay nu nlangfe wan takatanya anke awayan sis banwa. Ay Mikael fag tagbarita gasfuan at iba fag ngay tagbarita namawayan ule daul, ay kafag ule daul gadgaloan at ngay tagbarita laman namawayan.

⁸ Ay dewa katanya kafag ule daul ay at ngay tagbarita nababawan way, ay naiyan wan anya fagayu siginans banwa.

⁹ Ay e naukas ule daul, at madanama fag ule at ngayan te, Takamuag, ay Satanas, tagdaya sas fagdaul daga at taw. E naukas anya sas daga, gasfuan at ngay tagbarita.

¹⁰ Ay nadungug au sik aringang daul siginans banwa te, “Katsi andasug wan tam Dius at famalangfe ay at fagmabalyananun ay at fagfagtainanan, ay anggan Dius at nafili fag Fun at fagfagtainanan. Aroro e naukas wan tagfauri tam ngay faduksay kayu menit ay yabi si tam Dius at daga salubangan.

¹¹ Ay kanya nababo tua Satanas aroro siginan Tupa Riangan at taguk ay at ngay matuyan fag ngay foyungan, ay kafag ngay taw wa nesug ya at leleg, dewa ro nbul wan.

¹² Nu katanya, fagayu am tagbanwan sanya sbanwa useganani. Dewa katanya, fagayu am tagbanwan sis daga ay sis dagat, nandalan ban am at maksvn nu malimu, aroro Satanas kadasug sa ayu. Ay maksvn nu kadotama, aroro kanya nasaful wa te, wa ngaduge ya anya at buknga.”

¹³ Ay ule daul nu nalag te, naukas anya sas daga, kanya nafafalo kafag mangena at nafasalug sik sisian munama.

¹⁴ Ay e nafon sa kafag mangena duak fakfak daul bio, at fanlayug laman umyayu siginans ule sas talun at yud e taw. Sanya ban e galaga anya kaduge tuluk banwa ay sik wabilug ya.

¹⁵ Ay aroro katanya, ule naulub mamam siginan at bibig ay ankata sik liskung laman ro kafag mangena umlimus sas familugan sasad ngayayu.

¹⁶ Ay daga nagubuk kafag mangena, ay daga ankarang way lang ay kanya nasutsut mamam ule at naulub siginan at bibig.

¹⁷ Ay aroro katanya way, ule ankaksvn nu kadotama kafag mangena. Ay kanya nalo laman namawayan kafag mangena at sisian tiba, kanya wan fagayu tagfaning Dius at ngay suguan ay tagbanwan matuyan sas Isus at foyungan.

¹⁸ Ay ule malindug sis tigyangan dagat.