At Nafasure 11 - Fanawbuid tagsibaliwas Fakayabian

Duak Tagfatuyan

¹ Nu ntabu katanya, kafag tagbarita nafon sa angku sik famasudsudan kata sik tulag, ay kanya nalong sa angku te, “Malindug o ay namasudsudan o Dius at bale ay anggan at fagirugan fanggalangun, ay tapi nu seyuk taw tagseg sanya.

² Ay lag o namasud ya sas Dius at ligung bale, aroro sanya nafon wan sa sangay taw at yud natoglag Dius. Ay kanya ban fag ngay taw nangiklas furuan Erusalem, kaduge ufatk safulu e duak magdanun.

³ Dewa katanya gsugu kban ku tagfatuyan fagdua tagalanbungan at mataras fag lanbung, ay kaduge ban sadik libu duak sandan unumk safuluk menit, kanya ban gfoyung Dius at longan.”

⁴ Kanya fag duak tagfatuyan, duak kayu ulibu ay duak fagfatungkudan salung sis fagdaul daga at Fun at daga salubangan.

⁵ Ay nusnga sinu fag taw at namauri duama, afuy gduksun siginans duama at bibig ay namamin at ngay fawayan. Katanya nu gfabul nusnga sinu at namauri anya.

⁶ Ay kanya fag dua e fagmabalyananun yangay gdingding banwa laman wa karak kaduge kamoyung Dius at longan. Ay kanya e fagmabalyananun gfakata taguk mamam, ay gfadasug ngay faurianan nusnga ginain nu kaylat.

⁷ Ay duama nu ntabu wan nu kamoyung Dius at longan, abandi sik tagbia fag mela tagfangagat gduksun siginan tangabasad fag lusung, ay kanya namabo ay namabul duama.

⁸ Ay duama ban matangda way lang sisad dalan si takadungug fag furuan daul, kafag furuan nafangayan sa sik nafaydayuanan te, Suduma, ay Igiptu. Ay sanya wan fag furuan nu gtuktuk duama at Fun sas fasulungan kayu.

⁹ Ay kaduge ban tuluk menit ay sik wabilug ya, ngay taw siginans fagayu gaban, ay fagayu kasugfunanan, ay fagayu fangaringang, ay fagayu talun, gdama fia duama at bilug, ay wa kaylat nu e namoli.

¹⁰ Ay fagayu taw sas fagdaul daga guseganan ban aroro kafag duak taglong anbul wan. Ay kanya ban fagayu nangaful ay nanfodfonan at ngay fon, aroro anbul wan kafag duama tagfaidapan anya fagayu.

¹¹ Ay dewa katanya, nu nlangfe tuluk menit ay sik wabilug ya, Dius nafafoli sas duama at leleg, ay kanya fag dua anlindug. Ay fagayu taw at nalag anya fagdua, maksvn nu kalimu.

¹² Ay sanya ginan kafag duama nadungug sik aringang daul siginans banwa te, “Ululi stae.” Ay kafag duama naulul sas banwa si sik linyabu kaduge at ngay fawayan gdama.

¹³ Ay ginanya yay anke uig maksvn. Ay at fasafuluk afud kafag furuan ankiklas wan, ay fituk libuk taw at kinbul. Ay tagleleg yay fag ngay taw anlimu maksvn ay nafauseganan tagsis banwa fag Dius.

¹⁴ Anlangfe wan at faduak malimu, dewa katanya, gakadasugun wan at fatuluk malimu.

At Fafituk Budyung

¹⁵ Ay at fafituk tagbarita nu nauyup at budyung, e nadungug au sik ngay aringang ayu daul siginans banwa te, “Fagmafagtainanun ste swa daga siwa tam Fun ay si tam Fun Isus. Kanya ban gfagtainan kabavn.”

¹⁶ Ay at malunggung fag duak safulu e ufatk fagtainan sit mesa faglunggungan sis Dius at daga salubangan malub ay gseg anya.

¹⁷ Ay glong te, “Dius em Fun at mabalyanan sas fagayu, o wan Dius siginan ebi sfakasigadan ay dasug katsi. Guseganan ami sa emu aroro nagbilug wo am maksvn fag fagmabalyananun ay gfasigad wo gfagtainan.

¹⁸ Ay fagayu talun at ngay taw at yud natoglag emu, maksvn nu kadotama emu. Ay andasug wan at buknga nu gfadasug o am dotama. Ay andasug yangay at buknga nu gtuyan o ngay kinbul at fakamulun te, o masine ay o mauri, ay nu gfon o famonun sas fagayu am taglong am ngay fagsuguan, ay sam ngay taw, ay sas fagayu tagsuyu emu, sa takadungug fag ngay taw ay dewa sat mafalingun fag ngay taw. Ay andasug yangay at buknga nu gfamin o tagfaidapan ngay taw sas fagdaul daga.”

¹⁹ Ay nu ntabu takatanya, Dius at bale sis banwa anluang, ay sad basad, anlag at Fagsuadan Nasadian. Ay ginanya maksvn nu glimbad ay nu glingsi ay nu gawang, ay maksvn yangay nu guig, ay nu karak yelu.