At Nafasure 10 - Fanawbuid tagsibaliwas Fakayabian

Tagbarita ay Talay fag Fafil

¹ Ay sanya ginan, nalag au sadi yak tagbarita at mabalyanan nu kadaga siginans banwa. Kanya masifigan linyabu ay e sangbo balango idu. Ay at mata ganinag kata menit, ay at ngay bitis kata sik turuk afuy.

² Ay kanya gbitbitan sik fafil sirut malunggaban. Ay at siun fag darafa matungkud sis dagat, ay at wala fag darafa matungkud sis daga.

³ Ay kanya nafabia nu guro, kata liun nu gsubang. Ay e nabalus anya fitu daulk awang lingsi.

⁴ Ay gina au nanriruk kafag fituk lingsi at longan, e nadungug au sik aringang siginans banwa te, “Suksuki way kafag fituk lingsi at longan. Lag o griruk ya.”

⁵ Ay ku nalag fag tagbarita at malindug sis dagat ay sis daga nafalugde at siun baliwa fag daluap sas banwa,

⁶ ay glong sik famafanud fag longan sa tagleleg kabavn fag Dius at ngayan, at nawat banwa ay daga ay dagat ay fagayu tagsanya. Ay kafag tagbarita nalong te, “Wa ban glugo ya.”

⁷ Ay gina ban at fafituk tagbarita nauyup at budyung, umfasludan ban Dius at algan at masuksukan, at ngay fagsuguan fag ngay taglong at nalong.

⁸ Ay kafag aringang tagsiginans banwa gdog yay nalong sa angku te, “Nangakbang o sas tagbarita at malindug sis dagat ay sis daga, ay namul o at bitbitan fag fafil sirut at malunggaban.”

⁹ Nu katanya, nanangakbang au sa kafag tagbarita ay naet au sa anya kafag fafil. Ay kanya nalong sa angku te, “Buli ay oni. Ay gina ro sim bibig matamis kata deut, ay nu si waro am suaban, gfasait way ro am suaban.”

¹⁰ Ay nabul au kanya fag fafil sirut siginan kafag tagbarita at daluap ay naon au. Ay matamis wa ngaro fia kata deut. Ay nu nangvp kwan, nafasait way ku suaban.

¹¹ Ay sanya ginan e nalong sa angku te, “Nandog yap o nanfamoyung Dius at longan sabaliwa fagayu taw tagsaman saman at fangaringang, ay fagayu talun, ay fagayu talun at ngay fun.”