At Nafasure 1 - Fanawbuid tagsibaliwas Fakayabian

At Foyungan sas Uan

¹ Katatuy Dius at foyungan sa tam Fun Isus, ay nasugu at tagbarita laman gfoyung yangay sat fagsuguan Uan. Katatuy fag foyungan at algan laman namasaful sas Dius at ngay fagsuguan sabaliwa tagakafasludanun wan.

² Uan nafatuyan fagayu at nalag, at masuad Dius at longan ay tam Fun Isus at foyungan.

³ Mauseganan tagtap ay tagdungugan tuy fag fagtapan ay tagfaning tua fia sas fagdaul at amatanganan, aroro gakafasludanun wan.

Famasigad fag Longan sas Fituk Furuan

⁴ Au, Uan at nariruk tuy laman sa sangay tagafanud tagbanwan sis fituk furuan sis talun Asya. Sumawa nangus ayu fagmagalangun ay fagmanabayanun siginans Dius, kanya tagleleg katsi ay ebi, ay takadasug yay ban, ay siginan yangay at fituk falad tagsit faglunggungan at salubangan,

⁵ ay siginan tam Fun Isus, at matuyan fag tagfatuyan, ay at taguna naleleg siginan at fagmabulanan, ay tagtungud fag Fun ste swa daga fag ngay fun. Kanya kesug tua antam, ay siginan at nabulanan nafalfas tua antam siginan tam ngay asalanan.

⁶ Kanya nafili antam laman sik ngay fun ay sik ngay tagfon fanggalangun laman namakamulun sat Mama, Dius. Si wa anya fagmasineun ay fagmabalyananun kabavn ban. Anud.

⁷ Amatangani, kanya ban kadasug siginan sad linyabu. Fagayu ban taw lumag anya, anggan ban fagayu at naurus at tigyangan. Ay fagayu ban taw ste swa daga gwayway aroro kalimu te, gafaurianan way ban manga. Anud, umfasludan wa nangus fia takatanya.

⁸ Dius tam Fun tagleleg katsi ay ebi ay takadasug yay ban, ay at tiba tungud nu mabalyanan, glong te, “Au wan taguna ay taguyan.”

Sik Taginfan sabaliwas Isus

⁹ Au, Uan, ay faduksay ay faudgufudan sa sangay fagidapun ay sas Dius at Fagfagtainanan, ay sas fagagwantanun aroro masadi tam sas Isus. E nagamat angku ay nataban sas furu Patmus fag talun aroro gfoyung au Dius at longan ay at matuyan, Isus at nafasure sa angku.

¹⁰ Gina si tam Fun at Menit, at Masine fag Falad antayuk sa angku, ay nadungug au sik aringang daul siginan ku day guyuy, kata sik budyung at awang.

¹¹ Ay nalong te, “Riruki ro fagayu am nalag ay fadasugi sas fituk furuan: sas Efesu, ay sas Esmirna, ay sas Pergamu, ay sas Tiatira, ay sas Sardis, ay sas Filadelfia, ay sas Laudisya.”

¹² Ay nasalubang au sa ku day guyuy laman gdama au te, sinu at naringang sa angku, ay ku nalag fituk fagfatungkudan salung at mawatan siginans gintu.

¹³ Ay sis wabilug ngay fagfatungkudan salung e sik mangama takata Taw at Baguama. Kanya galanbungan aba sitsigon at sungkulan, ay sit dubdub e famutus at mawatan siginans gintu.

¹⁴ Ay at buk at kalaksian kalaksi sik dingin at barugwak, ay at mata gigang kata afuy.

¹⁵ Ay at ngay darafa ganinag kata sik tansu taganyang at mafasinean sas afuy, at aringang kata sik mamam nu gfawas takatong siginans tagbungan.

¹⁶ Ay at siun fag daluap gbitbitan fituk galeme ay siginan at bibig e naduksun sik fiso maglat gsumbalian at uyup. Ay at mata maksvn nu masulo kata nu gina sis buknga menit.

¹⁷ Gina au nalag anya, anlub au sit daga salubangan ay kata wan nu nbul au. Ay kanya nafatayuk sa angku at siun fag daluap, ay nalong te, “Lag o kalimu. Au wan taguna ay taguyan.

¹⁸ Au wan tagleleg. Ebi anbul au, dewa katanya damai, katsi gleleg kwan ay gleleg kban kabavn. Ay fakabulun ban ay anggan at kinbul at talun sa wa ku daga fagmabalyananun.

¹⁹ Nu katanya, riruki am nalag katsi, at kinfasludan wan ay takadasug yay ban.

²⁰ Katatuy at masuksukan at masuad si ku siun fag daluap fag fituk galeme, ay fag fituk fagfatungkudan salung at mawatan siginans gintu. Kanya fag fituk galeme at masuad fituk tagbarita tagalaga ngay tagafanud sanya fag fituk furuan, ay kanya fag fituk fagfatungkudan salung at masuad kafag fituk furuan.”