Amus 9 - Fanawbuid tagsibaliwas Fakayabian

We Malangfe siginans Dius at Faurianan

¹ Sanya ginan, Amus nalong te, “Nalag au Fun Dius nu malindug munakbang sis fagirugan, ay nalong sa angku te, ‘Falangi ku bale at ngay fungfung turuk laman at ugun umlafi ay ngay taw umtalfi. Ay at sawad umbul sas awayan, ay nusdi sadi we malagyu ay we malangfe.

² Kanya fagayu dewa sumuksuan sas daga daga, ay sa sangay kinbul at talun, namul kyay ban fia anya fagayu. Ay dewa ban nasas banwa, gguyud kyay fia anya fagayu sat daga.

³ Kanya ban fagayu dewa nananuksuan sas tungud Buksul Karmel, nanrvbvy kyay ban fia ay nanggamat anya fagayu. Ay dewa sumuksuan sas fagngabasadan dagat, gsugu kban sik ule laman nangagat anya fagayu.

⁴ Ay at ngay fawayan ban dewa tumaban anya fagayu, namabul kyay fia anya fagayu. Aroro ku algan wan namamin, ay yud nanggubuk anya fagayu.’ ”

⁵ Ay daga guigan, tam Fun, Yawi at Mabalyanan nu nated, ay fagayu tagbanwan sanya gwayway. Ay daga ban umkabat kata Liskung Nilu nu kabia ay nu kalay at familugan sis talun Igiptu.

⁶ Dius wan at nawat at fagbanwanan sis banwa. Ay kanya yangay at nafae kiwang, ay at nafasas linyabu dagat at mamam, ay tagfae arak. Kanya at ngayan, Yawi.

⁷ Yawi nalong te, “Ngay taw Israel, nu gamatangan au ayu gsud way am ngay taw Etiupya. Matuyan, nafalfas au ayu siginans talun Igiptu, ay nafalfas kyangay ngay taw Filistia siginans Kaftur, ay ngay taw Aram siginans Kir.

⁸ Au, Fun Dius Yawi tagsaful Israel at fagmauriun. Nu katanya, namamin kwa ban anya fagayu laman umkalyam wan siginans fagdaul daga. Dewa katanya, Akub at ngay kasugfunanan ban umke sawad yay. Au, Yawi, taglong tuy.

⁹ Damai! Sumugu au ay namasaman ayu kata sik mafasirian gasfuan ngay taw sas fagayu talun, kata nu gfasaman ngay rawvg. Ay nu setain ngay gang ayu sirut nu yud katong sa sik fagfasirian,

¹⁰ katanya yangay am, ku ngay taw tagasalanan, wa ban am umlangfe siginan ku faurianan. Fagayu ban am taglong te, ‘Faurianan ban wa mdasug sa emi,’ umbul am sas awayan.

Nu Gdog Nangawat Israel fag Talun

¹¹ Umdasug ban sik menit gdog au namalindug Dabid at fagfagtainanan kata sik bale famoy at kinkiklas. Namasine kban kata ebi nu masine,

¹² laman ban ngay taw Israel manangagbilug talun Edum at daga at sawad ay anggan tibak talun ku nalong te, ku fagagbilugun. Au Yawi taglong tuy ay namakamulun kban takatanya.”

¹³ Yawi nalong sa sangay taw Israel te, “Umdasug ban at buknga ngayu ban takagutlu, ay gina ban ggutlu, gdog wa gfalganan fagtanuman. Ay gina ban gturis ubas at rawvg, gdog wa gtanum. Ay nu kabanawan sa sangay buksul, ngayu ubas at rawvg, ay kafag ngay rawvg at mamam kata nu gfamilugan.

¹⁴ Ay gfafoli kban ku ngay taw Israel sat talun siginan at fagatabananan. Ay kanya ban fagayu gdog yay nangawat at ngay furuan kinrasras wan ay gbanwan sanya. Ay kanya ban fagayu nananum wat ubas laman e fanginum tua fanlangu. Ay nananum yangay ban sat ngay fagtanuman laman ban at fakonun.

¹⁵ Ay gdog kban namabanwan anya fagayu sa ku nafon fag fagbanwanan ay kabavn ban sanya wan nu gbanwan.” Katanya wan ay Dius Yawi at longan.