Amus 8 - Fanawbuid tagsibaliwas Fakayabian

Amus at Taginfan sabaliwa ngay Rawvg at Masuadan sad Sabi

¹ Sanya ginan, Fun Dius Yawi nafalag sa angku sik ngay rawvg malesanan masuadan sad sabi.

² Ay nainto angku te, “Amus, nataw am lagan?” Ay nabalus au te, “Sik ngay rawvg malesanan masuadan sad sabi.” Ay Yawi nalong sa angku te, “Andasug wan ku ngay taw Israel at fakatabuan. Kwa kafanyu ya anya fagayu.

³ Ginanya ban fag menit, ay alubad at mauseganan sis Yawi at bale, umsik fakabaluun, aroro at ngay kinbul ban umrapyag nusnga nday. Ay nusdi sik aringang we kadungug ya. Au, Fun Dius Yawi taglong tuy.”

At Maramraman fag ngay taw Israel at Asalanan

⁴ Am fag ngay taw tagfaidapan at ngay yud e kwa, ay tagyafabulun anya fagayu, dungugani.

⁵ Kanbang wam daul ay fagmafulun galay magdanun ay Famiangalay fag Menit nu katabu, laman namalao am ay ngay gutluan, ay nanfamuagan am nu gfabudbungguan ay nu gtas trigu.

⁶ Gabanganan wam daul namalao ay ngay gutluan tagaupaun, laman e famayad am ngay taw at yud e kwa laman sik ngay fagsuguan, aroro wa mafabayad at bedan, dewa sik lapak way.

⁷ Nu katanya, Yawi, Akub at ngay kasugfunanan at fakamatungudunun fag Dius, nafaksvn glong te, “Kwa ban kalyam ya ay ngay nafakamulun mauri.

⁸ Nu katanya, namae fanguig kban say daga, ay fagayu ban am gwayway am. Ay daga ban umkabat kata Liskung Nilu nu kabia ay nu kalay at familugan sis talun Igiptu.

⁹ Ginanya ban fag menit, gfadulum au dewa swabilug menit, nu katanya, umdulum ban say talun dewa swa menit. Au, Fun Dius Yawi taglong tuy.

¹⁰ Ay abat ngate ban am guseganan ginam maful, gwayway way ban am, ay abat ngate ban am guseganan galubad, kabalu wayam. Ay namalanbungan kban ayu saku, ay gsugu au ayu te, ufoi ay ngay buk, laman gfalag am ay fakabaluun, kata sik ngay fagtainan tagwayway aroro at sisian tagsesadi anbul. Ay dewa katanya, amaidap yap ban taguyan fag faurianan.”

¹¹ Ay Fun Dius Yawi nalong yay fia te, “Umdasug ban sik menit namae fanlunus kban sa ay talun. Dewa katanya, bunwa fakonun fag fanlunus ay bunwa mamam fag fakadanumun, nu bunway sa tua baliwa nu kaylat gdungugan ku ngay longan.

¹² Maksvn wan nu kalufuy am laman grvbvy tagfoyung ayu ku longan, dewa katanya, wam e lagan.

¹³ Gina kban gfaurianan ayu fag menit, ay ngay baguina at masine ay ay ngay baguama at maseganama ummomuy aroro maksvn nu kadanum.

¹⁴ Namaurianan kban ayu, am fag ngay taw tagfatuyanan glong at maksvn sas Samarya, sas Dan ay sas Beerseba at ngay fagsegan, ay wa ban am manangabangkad ya.”