Amus 7 - Fanawbuid tagsibaliwas Fakayabian

Amus at Taginfan sabaliwas Liung, ay Afuy, ay sik Famatagbung fag Lubyang

¹ Katatuy Fun Dius Yawi at nafalag sa angku: Nalag au kanya nu gfalganan sik ngay liung. Anfasludan takatanya gina fag buknga nafon sas fun at afud taguna at gutluan. Ay nu gfasigad wan at faduak fanggutluan,

² nalag au kafag ngay liung nu gfamin at ngay tanum. Ay nalong au te, “Fun Dius Yawi, gfainfanyuan au get sa emu te, falyami wan am ngay taw at ngay asalanan, Akub at kasugfunanan. Setain ro kanya fag ngay taw nu mabanwan nu namauri way o anya? Kanya fag ngay taw mamomuy ay we fagmakatuun.”

³ Nu katanya, Yawi nafabali yay at amatanganan ay nalong te, “Wa ban umfasludan ya takatanya.”

⁴ Fun Dius Yawi e nafalag yay fia sa angku: nalag au kanya nu gfalganan laman namaurianan ngay taw Israel siginan sik afuy, laman ban kafag afuy namalanggang ngay bulbug ay nangirug nusnga setaw sis talun Israel.

⁵ Nu katanya, nalong au te, “Fun Dius Yawi, gfainfanyuan au get sa emu te, lag yap o namafasludan takatanya. Setain ro kanya fag ngay taw nu mabanwan nu namauri way o anya? Kanya fag ngay taw mamomuy ay we fagmakatuun.”

⁶ Ay nu katanya, Fun Dius Yawi nafabali yay at amatanganan ay nalong te, “Wa ban umfasludan ya takatanya.”

⁷ Katatuy tam Fun at nafasure sa angku: nalag au kanya nu malindug sis day alad ay e bitbitan sik famatagbung fag lubyang laman nanginsaful te, o masine wan nu maaladan.

⁸ Yawi nainto sa angku te, “Amus, nataw am lagan?” Ay nabalus au te, “Sik famatagbung fag lubyang.” Ay Yawi nalong te, “Kanya ku famasaful sa ku ngay taw te, wa matuyan nu gbanwan. Nu katanya, kwa kafanyu ya anya fagayu.

⁹ Ay nangiklas kwa ban ngay taw Israel, Isak at kasugfunanan, at ngay fagnansegan sa tangabat fag afud. Gsugu kban Israel at ngay fawayan laman nangiklas fun Erubuam at fagfunanan.”

Amus ay Amasya

¹⁰ Amasya fag tagfon fanggalangun sis Betel nafadasug sas Erubuam, Israel at fun, sik rirukan. Katatuy at marirukan, “Amus e algan mauri sa emu ste sis talun Israel. Ay fagayu taw wa kagwanta ya Amus at ngay nalong.

¹¹ Katatuy at longan, fun Erubuam ban umbul sas awayan, ay e tumaban ban ngay taw Israel sa tibak talun.”

¹² Amasya nalong sas Amus te, “Loi wan ste ginan, afolii wan sas Uda. Sanya nu nanfamoyung o.

¹³ Lag o kamoyung ya Dius at longan ste sis Betel, aroro ste wan fun ay anggan at fagfagtainanan at fagnansegan.”

¹⁴ Ay Amus nabalus Amasya te, “Ebi bunkya sik taglong ay sik fagsuguan, sik tagalaga kyay ngay tupa ay ngay fun kayu sikumuru.

¹⁵ Ay Yawi nalong sa angku te, ‘Ubuni wan am fagalagaun fag ngay tupa, nanfamoyung way o ku longan sa ku ngay taw Israel.’

¹⁶ Dungugani Yawi at longan, o tagsalag angku te, ‘Lag gfoyung at longan sa sangay taw Israel, Isak at ngay kasugfunanan.’

¹⁷ Katatuy Yawi at longan sabaliwa emu te, ‘Am mangena ban umsik takamatugtug si ay furuan, ay am ngay sisian ban umbul sas awayan. Ay am ngay fawayan ban nangafudan am daga, ay o ban umbul o sa tibak talun. Ay matuyan wan e tumaban ban ngay taw Israel sa tibak talun.’ ”