Amus 6 - Fanawbuid tagsibaliwas Fakayabian

Israel at Ngay Tagfangguna at Fagmauriun

¹ Afanyuan am ngay tagfangguna sis Siun ay sis Samarya, aroro ay fakaylatun nu gbanwan am fagmabayanun way lang. Ay nu gamatangan am ay sadili, sik takadungug am fag ngay taw ay sik tagtungud sa tibak talun, ay sa wa ayu ay ngay taw nu nangakbang.

² Damai furuan Kalne, ay Kamat fag furuan daul, ay furuan Gat tagsis talun Filistia. O nunda kanya amabalyanan yap tua talun Uda ay talun Israel at fagfagtainanan? O ay at talun gtungud yay ay talun?

³ Afanyuan am, tagamatangan te, wa ban kadasug kafag menit nu gafaurianan am. Ay aroro ay ngay fakamulun mauri way, gfasakit wayam kafag menit nu kadasug, at maksvn nu mauri.

⁴ Afanyuan am tagfantaygilidanan lang manabayan si ay fagtiugan at mabyat nu kabayad, ay at mapsug gugat yamas tupa ay yamas baka.

⁵ Afanyuan am ngay takawat alubad kaduge am gfawang ngay fagfawangun ke ngay bakyang kata Dabid nu gfawang.

⁶ Afanyuan am at kinnanad ginum fanlangu ay takaylat grarus famaebebanglu at mabyat nu kabayad, ay at yud kabalu takadasug ban fag faurianan sat talun.

⁷ Nu katanya, am waban fia fag ngay tagfangguna taguna at fagnantabanun sa tibak talun; ay umragang waban nu nanmaful am gugat ay nu gfiangalay am.

Yawi Kauri Israel nu Kamatungudun

⁸ Fun Dius Yawi nafaksvn nu glong te, “Kauri au Akub at kasugfunanan nu kamatungudun, ay kwa kaylat sit ngay furuan at mogat fag ngay afud. Nu katanya, namagbilug kban anya fagayu sat ngay fawayan, at furuan daul ay fagayu tagsanya.”

⁹ Nu safulu way lang ktaw at kinsawad si sik bale, fagayu umbul.

¹⁰ Ay nangirug wan at ngay kalongan. Ay nanginto sat nasuksuan sit bale te, “O e ufud yay o sanya?” Ay nu nabalus te, “Duan,” at nainto glong te, “Lag garingang! Malong o Yawi at ngayan ay mafaurianan antam.”

¹¹ At matuyan, nu Yawi wan at nasugu, tagbia ay talay fag ngay bale, umkiklas.

¹² O ay nunda sik kabayu manantarung sas wa gang? O ay nunda sik baka maali sanya? Duan! Dewa katanya, nafalingun am ngay taw siginan nu gfawabilugan am, ay wam gfae masuad at matuyan.

¹³ Guseganan am nu nababo am furuan Lu-Debar ay Karnaim, ay glong am te, “Nababo tam kafag furuan siginan tam sadili fagmabitsugun.”

¹⁴ Katatuy Yawi at Mabalyanan fag Dius at famalus: “Ngay taw Israel, nansugu kban sa ayu sik talun laman namawayan ayu. Ay kafag talun ban namaurianan ayu ay nangagbilug ay ngay furuan gfasigad siginans Lebu-Amat sitsigons datag Araba.”