Amus 5 - Fanawbuid tagsibaliwas Fakayabian

Guro laman Gubun ngay Asalanan

¹ Ngay taw Israel, dungugani at mabalu fag ngay longan sabaliwa ayu:

² Israel kata sik baguina at kintaygilid at yud manangalindug ya. Kanya mataygilid way lang sit talun ay we namangkad ya.

³ Nu katanya, Fun Dius Yawi nalong te, “Sik furuan nu nasugu sas Israel sik libuk tagfawayan, sandan way lang takasawad. Ay nu nasugu sik sandank tagfawayan, safulu way lang takasawad.

⁴ Nu katanya, ngay taw Israel akbangi sa angku, laman ban gleleg tuam.

⁵ Lag am sas Betel ay sas Gilgal, ay sas Beerseba laman nanseg tibak fagsegan. Aroro matuyan e tumaban ban ngay taw Gilgal, ay e nangiklas ban furuan Betel.

⁶ Use at ngay kasugfunanan, akbangi sa angku, laman ban gleleg tuam. Ay wayam kakbang, namamin kban ayu kata sik afuy nu girug. Nu katanya, umkamin ban furuan Betel at ngay taw ay we mafaragang ya.

⁷ Afanyuan am! Aroro abat ngate am gfae masuad at fagmatuyanun, gfakamulun wayam at mauri!”

⁸ Ay Dius nawat ngay galeme tagfulan at ngayan te, Pleyades ay Uryun. Dius yangay tagfae yamag ay dulum, ay tagfae menit ay yabi. Kanya nafatulbu dagat at mamam sas linyabu, laman gfae arak. At ngayan, Yawi.

⁹ Kanya masakit nu gbabo ngay taw at mabalyanan, ay nu giklas at ngay furuan at mogat.

¹⁰ Am fag ngay taw Israel, kauri wayam at matuyan fag ngay tagwabilug, ay taglong at matuyan sas fagnanginsafulan asalanan.

¹¹ Gfalingun am ngay taw at yud e kwa ay gbul am at ngay gutluan. Nu katanya, wa ban am manamanwan say nawat fag bale daul, ay wa ban am mainum fanlangu siginan ay ngay tanum wat ubas.

¹² Aroro saful kway at kayuan ay nu se aksvn ay ngay asalanan. Gfalingun am ngay taw at yud e asalanan ay gbul at ngay salapi. Ay wa gsud nu gfawabilugan am sat yud e kwa.

¹³ Aroro katsi maksvn wan at fagmauriun, ay at ke fagsafulun fag ngay taw maragangan way lang.

¹⁴ Fakamuluni at masine ay lag gfakamulun at mauri laman ban gleleg tuam, nu katanya tua, Yawi gufud ayu kata ay longan.

¹⁵ Saruyi at mauri ay fakamuluni at masine, ay fafasludani fagmatuyanun say ngay faginsafulan asalanan. Tiba ginan ro manga, Yawi umfanyu yay ayu, Use at ngay kasugfunanan at sawad.

¹⁶ Nu katanya, katatuy tam Fun, Yawi at longan: “Umdasug ban sik menit umdungug nu e gwaywayan sa sangay fagaweanan ay sa sangay dalan. Ay namauro yangay tagsi sangay gamasun laman gfasfuan at ngay tagfakamulun fag ngay taw laman nanwayway sat ngay kinbul.

¹⁷ Ay e gwayway yangay ban sa sangay tanuman wat ubas. Umfasludan ban sa ayu takatanya aroro namaurianan kban ayu. Au, Yawi, taglong tuy.”

Dius nu Gfaurianan fag Menit

¹⁸ Afanyuan am tagfanya Yawi at menit. Lag am gamatangan te, ginanya ban umlangfe am. Aroro ginanya waban fag menit nu gfaurianan au ayu.

¹⁹ Ay kata ban am sik taw tagamatangan te, anlangfe wan siginan sik liun, ay aroro mangaro, nafablang yay fia sik usu. Ay gamatangan yangay te, anlangfe wan aroro siwa at bale, ay aroro mangaro gina nated at dingding sik ule nagat anya.

²⁰ Anud, Yawi ban at menit umdasug, ay kanya ban at fungfung faurianan way, ay bunwa fakalangfean, ay kata sik dulum at yud e gyamag ya.

Yawi at Fakaylatun

²¹ Yawi glong te, “Kauri kway ay ngay fagmafulun ay kwa guseganan takatanya ay ngay fakamulun.

²² Nu katanya, dewa am namuba sa angku ay fagirugun fag ngay fanggalangun ay gutluan fag fanggalangun, ay ay nafataglu fag fagbaugun, kwa kaylat.

²³ Faragangi wan nu galubad am gbarisanan. Kwa kaylat gdungugan nu gfawang am ay ngay fagfawangun ke ngay bakyang.

²⁴ Ku fakaylatun, fataglayuni nu gfakamulun am at matuyan ay at masine, kata sik liskung yud karagang nu gfamilugan.

²⁵ Ngay taw Israel, O nunda ay ngay mangaguyang gina sis talun at yud e taw kaduge ufatk safuluk banwa, nafon sa angku fanggalangun? Duan!

²⁶ Ay katsi gbuba am ay fagsegan Sakut laman ay fun, ay Kaywan ay fagsegan fag galeme. Ay nawat am kafag fagsegan laman gseg am.

²⁷ Nu katanya, namagamat au ayu ay namataban gfayayu siginans Damasku.” Katanya Yawi at longan, at ngayan at Mabalyanan fag Dius.