Amus 3 - Fanawbuid tagsibaliwas Fakayabian

¹ Ngay taw Israel, Yawi nafalfas ay ngay mangaguyang siginans talun Igiptu. Dungugani at longan sabaliwa ayu:

² “Sas fagdaul daga, am wan ku nafili laman ku ngay taw. Dewa katanya, namaurianan kban ayu aroro sa ay ngay asalanan.”

Dius Nafon sa sangay Taglong at Mesa Fakamulun

³ O nunda duak taw yud gdiuganan masine way gadgaloan?

⁴ O nunda sik liun gsubang deyud e fagnangagatun? Ay o gngarngar deyud e nagamat?

⁵ O sik manuk tungud kagamat deyud e farvk sis litag? Ay o nunda sik litag kasalan deyud e iktan?

⁶ O nunda ngay taw wa gtadtaruyan kalimu galay e nauyup budyung laman famasaful te, e fawayan takadasug? O nunda sik furuan daul nangafaurianan, Yawi nu dway nasugu?

⁷ At matuyan, Fun Dius Yawi di gfakamulun nusnge wain yakmay nafasaful sat ngay fagsuguan fag ngay taglong.

⁸ Sinu at yud kalimu liun nu nasubang? Ay sinu at yud nanfamoyung, Fun Dius Yawi nu nasugu?

Dius Nafaurianan Talun Samarya

⁹ Longi sa sangay tagfangguna sis furuan Asdud ay sas talun Igiptu te, nanmaful am sa tagligung Samarya fag ngay buksul ay nandama am ngay furuan nu gawayan ay nu gafaidapanan.

^10-11 Nu katanya, katatuy Fun Dius Yawi at longan sas Samarya: “Kanya fagayu wa gfakamulun at matuyan. Ay at ngay nafangkamul mapnu sat mogat fag ngay afud. Nu katanya, at ngay fawayan ban nangiklas at ngay fagmafulan, ay namul at ngay ramraman.”

¹² Yawi nalong yangay fia te, “Sik liun nu nangon way sik tupa, tagalaga at fagmagoun, tibaginan dua way langk si, ay mannga sik talinga. Katanya yangay ban takadasug sa ayu ngay taw Israel tagbanwan sis Samarya, wa ban am e fagmafalangfeun sangay sik afud ay igyan.”

¹³ Tam Fun, Yawi at Mabalyanan nalong te, “Dungugani ku ngay longan, ay fadungugi yangay sas Akub at ngay kasugfunanan te,

¹⁴ Gina kban gfaurianan ngay taw Israel aroro sat ngay asalanan, nangiklas kban ngay fagirugan sis Betel. Ay nanrabas kban sis fagirugan at ngay fugungan fag ngay sunge ay umtong sas daga.

¹⁵ Ay nangiklas kban at ngay bale fulug ay at ngay bale fanmangune ay anggan tagbia ay at masine fag ngay bale. Nu katanya, ngayu bank bale takaiklas. Au, Yawi, taglong tuy.”