Amus 2 - Fanawbuid tagsibaliwas Fakayabian

Faurianan sas Talun Muab

¹ Katatuy Yawi at longan sabaliwas Muab: “Ngay taw Muab gfataglayun way gugat nu gasalanan, nu katanya, namaurianan kban anya fagayu. Kanya fagayu nairug Edum at fun at ngay butul yakmay andafug.

² Nu katanya, nangirug kban Muab gasfuan Keryut at mogat fag ngay afud. Ay ngay taw ban Muab umbul kaduge at ngay fawayan gudguroan ay guyup at ngay budyung.

³ Ay anggan ban at fun umbul gasfuan at ngay fagsuguan. Au, Yawi, taglong tuy.”

Faurianan sas Talun Uda

⁴ Katatuy Yawi at longan sabaliwas Uda: “Ngay taw Uda gfataglayun way gugat nu gasalanan, nu katanya, namaurianan kban anya fagayu. Kanya fagayu nafamabo ku ngay suguan ay wa nafaning ku ngay fangatulun. Ay siginan nu gseg at ngay mangaguyang at ngay fagsegan, kanya fagayu ansik malyaman.

⁵ Nu katanya, nangirug kban talun Uda, gasfuan Erusalem at mogat fag ngay afud.”

Faurianan sas Talun Israel

⁶ Katatuy Yawi at longan sabaliwas Israel: “Ngay taw Israel gfataglayun way gugat nu gasalanan, nu katanya, namaurianan kban anya fagayu. Kanya fagayu nafaebayad ngay taw at yud e asalanan laman sik ngay fagsuguan famayad at ngay bedan. Katanya yangay at fakamulun sa sangay taw at yud e kwa, at bedan dewa sik lapak way.

⁷ Kanya fagayu gfaidapan ay wa ggubuk at yud e kwa, ay sanya sik talame nafataladan sik mangena. Nu katanya, nafauri angku.

⁸ Ay kanya fagayu gtiug sis day fagirugan ay galanbungan ngay taw at yud e kwa at nafaulbus laman famatuyan te, namayad yay ban at ngay bedan. Ay kanya fagayu gmamaman si ku bale, ay at famayad at ngay bedan at nabul way siginan at yud e kwa.

⁹ Dewa katanya, aroro kesug au ngay taw Israel, nafabul kwan takamabatun fag ngay taw Amur takabat sik fun daligan ay kamaogat sik malyvm. Nafabul kwan anya fagayu, ay kwe nafasawad nusdi sadi.

¹⁰ Ay nafalfas kwan at ngay mangaguyang siginans talun Igiptu, ay nagubuk au anya fagayu sis talun at yud e taw kaduge ufatk safuluk banwa, laman manangagbilug ngay taw Amur at daga.

¹¹ Nafili au tiba at ngay baguama laman sik ngay taglong ay ngay taw at nafatigwanan sas Dius. Ngay taw Israel, o nunda wa matuyan ku longan?

¹² Nafainumun am fanlangu sa sangay taw at nafatigwanan sas Dius, ay nalong am sa sangay taglong te, lag gfoyung ku longan.

¹³ Dungugani: Namaidapan kban ayu. Umkata ban am sik faguyudan at yud bangan malelegan ya, aroro at buba mabyat.

¹⁴ Nu katanya, dewa at masakit glagyu, wa malagyu ya, ay at magaras fag ngay taw ummomuy, ay at ngay tagfawayan wa mafalangfe at sadili.

¹⁵ Dewa tagsaful ggodun fag ngay tagfawayan gababawan way. Ay at masakit gtarung fag ngay tagfawayan wa malagyu ya, ay at ngay mafananadan gsakay sis kabayu wa mafalangfe at mesa sadili.

¹⁶ Gina kban gfaurianan fag menit, dewa at maseganama fag ngay tagfawayan lumagyu malulasan. Au, Yawi, taglong tuy.”