Amus 1 - Fanawbuid tagsibaliwas Fakayabian

¹ Katatuy Amus at foyungan sabaliwas Israel. Amus sik taw Tekwa ay sik tagalaga tupa. Ay Dius nafasure sa anya at madulo, ay ginanya, dua yak banwa ay nauig sanya fag daga. Ginanya, Usya at fun sis Uda, ay Erubuam, Yuas at baguama, at fun sis Israel.

² Amus nalong te, “Yawi at aringang gbia kata lingsi siginans Buksul Siun. Nu katanya, fagfafangonan ngay tupa an-gong wan, ay anggan sis buksul Karmel at ngay tanum anlangke wan.”

Faurianan sas Talun Sirya

³ Katatuy Yawi at longan sabaliwas Sirya: “Ngay taw Damasku gfataglayun way gugat nu gasalanan, nu katanya, namaurianan kban anya fagayu. Kanya fagayu nafaidapan taw Gilyad, kata nu gruyus gagbilug at fanruyus balse ke bagang sanbung.

⁴ Nu katanya, nangirug kban fun Kasael at bale daul, gasfuan furuan Damasku at mogat fag afud, at baguama Ben-Adad at nafawat.

⁵ Nanrasras kyangay ban furuan Damasku at sakbawan alad, ay namamin kban datag Aben, ay furuan Bet-Eden at tagfangguna. Ay e nanggamat ngay taw Sirya ay nantaban sas talun Kir. Au, Yawi, taglong tuy.”

Faurianan sas Talun Filistia

⁶ Katatuy Yawi at longan sabaliwas Filistia fag ngay taw: “Ngay taw Gasa gfataglayun way gugat nu gasalanan, nu katanya, namaurianan kban anya fagayu. Kanya fagayu nagamat ku ngay taw ay we nafasawad ya, ay nafaebayad sa sangay taw Edum laman at ngay fagsuguan.

⁷ Nu katanya, nangirug kban furuan Gasa at ngay alad gasfuan at mogat fag ngay afud.

⁸ Namamin kwa ban furuan Asdud ay furuan Askelun at ngay tagfangguna. Ay namaurianan kyangay ban taw Ekrun. Ay ngay taw Filistia ay at nalagyu siginans faurianan umbul yangay ban. Au, Fun Dius Yawi taglong tuy.”

Faurianan sas Furuan Tiru

⁹ Katatuy Yawi at longan sabaliwas furuan Tiru: “Ngay taw Tiru gfataglayun way gugat nu gasalanan, nu katanya, namaurianan kban anya fagayu. Kanya fagayu nafaebayad ku ngay taw sas Edum laman at ngay fagsuguan, ay wa nafaning at nasadian laman sik ngay tagfaduksayan

¹⁰ Nu katanya, nangirug kban furuan Tiru at ngay alad gasfuan at mogat fag ngay afud.”

Faurianan sas Talun Edum

¹¹ Katatuy Yawi at longan sabaliwas Edum: “Ngay taw Edum gfataglayun way gugat nu gasalanan, nu katanya, namaurianan kban anya fagayu. Kanya fagayu kadotama way gugat at ngay kalongan fag ngay taw Israel, ay gfafalo laman namabul yud e afanyu.

¹² Nu katanya, nangirug kban Teman gasfuan Busra at mogat fag ngay afud.”

Faurianan sas Talun Amun

¹³ Katatuy Yawi at longan sabaliwas Amun: “Ngay taw Amun gfataglayun way gugat nu gasalanan, nu katanya, namaurianan kban anya fagayu. Kanya fagayu nafilas ngay taw Gilyad at ngay mangena tagfafion, laman magbilug at ngay daga.

¹⁴ Nu katanya, nangirug kban furuan Raba at ngay alad gasfuan at mogat fag ngay afud, kaduge at ngay fawayan gudguroan kata sik fulug nu kalung.

¹⁵ E tumaban ban talun Amun at fun anggan at ngay fun ayu sirut. Au, Yawi, taglong tuy.”