Alubad. 81 - Fanawbuid tagsibaliwas Fakayabian

Alubad 81 Nu Gseg Dius Gina e Fagmafulun

Laman sa tagfangguna alubad: Asaf at rirukan. Gasfuan nu gfawang fagfawangun ke bakyang.

¹ Alubadi fauseganani Dius tagfon gugat antam tam fagmabitsugun. Fauseganani uroi maksvn sas Akub at Dius!

² Alubadi ay fawangi ngay fagfadkalinganun, gasfuan fagfawangun at ke ngay bakyang.

³ Uyupi budyung galay fagmafulun sabaliwa Magdanun nu Bagu Kasure, ay gina magdanun mabalulang.

⁴ Takatanya fag faugali Akub at Dius at suguan sa sangay taw Israel.

⁵ Ay nafoyung yangay sas Use at kasugfunanan, gina kanya fagayu glao siginans talun Igiptu. Ay nadungug au sik aringang, dewa katanya, kwa nasaful te, sinu at naringang.

⁶ Glong te, “Nafalfas au ayu siginan ay fagafagsuguananun, ay nabul au siginan ay guyuy ay famubaun.

⁷ Gina am gidapan, nadarangin am sa angku, ay nafalangfe au ayu. Siginan sad madulum fag linyabu, nabalus au ayu, ay nafaskud au ay fagafanudun gina am sis bulbug Meriba.

⁸ Ku ngay taw, dungugani ku ngay famararang. Wain ay fagyudun gdungugan angku?

⁹ Lag am kawat ay gseg tibak fagsegan.

¹⁰ Au wan ay Dius Yawi, at nafalfas ayu siginans talun Igiptu. Kata sik manuk tungud riangan nu gfatanganga, eti sa angku, ay gfon au ayu ay ngay fagayudanun.

¹¹ Dewa katanya, wam nafandungug ay wam nafaning angku.

¹² Nu katanya, nafabayan kwan ayu, ay nafaning wam ay sadili fakaylatun, aroro kamaogatun am.

¹³ Nu nafandungug di long am angku! Ay nu namanwan di am kata ku balyawvtan,

¹⁴ satu ro nafaurianan kwan ay ngay fawayan.

¹⁵ Fagayu takauri angku gtudan kalimu sa ku daga salubangan. Ay kabavn ban kanya fagayu gafaurianan.

¹⁶ Dewa katanya, namon au sa ayu sik deut tagsiginan sad gang, ay at masine fag faggutluun, ay mapsug tua ban am gugat.”