Alubad. 73 - Fanawbuid tagsibaliwas Fakayabian

Alubad 73 Dius Matuyan tua nu Gfawabilugan

Asaf at alubad.

¹ Dius kafanyu tua taw Israel, kaugat wan at matuyan fag ngay taw.

² Ay au, arvs kwe fagsegun ya kata nu gakatongun au,

³ aroro galabian au nu nalag au takamatungudun, ay at mauri fag ngay taw nu nke ngay ramraman.

⁴ Kanya fagayu mataglu ay mabitsug way gugat, ay di batang e fakasaitun.

⁵ Ay wa yangay kata tibak taw at yud batang e fagidapun ay e fagafanawaun.

⁶ Nu katanya, kanya fagayu wa kapla gfalag at fakamatungudunun ay at fagmadotun.

⁷ Kaksvn at fagmauriun aroro maramraman. Ay ngayu at ngay algan mauri.

⁸ Kanya fagayu kabavn kamalingun, kamatungudun ay kamaidapan, ay glong mauri sa tiba.

⁹ Ay kanya fagayu glong at mauri sabaliwas Dius. Kanya fagayu garingang laman ngay taw sas fagdaul daga gfaning anya.

¹⁰ Ay anggan Dius at ngay taw natalyuyan Dius, ay nafanud yangay sanya fag ngay taw mauri at ngay nalong.

¹¹ Ay kafag ngay taw mauri glong te, “Setain ro Dius nu gsaful em fakamulun? Tiba Tungud fag Dius wa nasaful.”

¹² Damai kafag ngay taw mauri nu mabanwan: we fagidapun ya, abat ngate, karamraman way.

¹³ Ay nabakvd koma gugat ku fagmatuyanun. O nunda we masuad? Ay wain, ay nasaruy koma asalanan?

¹⁴ Dius, fagngabak menit gidapan au. Ay galay balabag gfaurianan o angku.

¹⁵ Nu nalong kway ro takatanya, nafadiuganan kway ro am ngay taw at ngay fawayan.

¹⁶ Naugatan koma nangayamag takatanya fagayu, ay naidapan kway gamatangan.

¹⁷ Sanya ginan, nalao au sam bale, ay sanya ya nu gsaful au ngay taw mauri at fagnangadasugan ban.

¹⁸ Anud, nafalyam wo kafag ngay taw at fagsegun, ay kanya ban umfaurianan wan. Ay kanya fagayu kata nu ndangsal ay nu ntong.

¹⁹ Kanya ban fagayu umfaurianan masakit: ay umke fakalimuun ay umbul.

²⁰ Kanya ban fagayu masakit kalyam kata sik taginfan. Ay gina ban o anlindug laman gfaurianan anya fagayu, kanya ban fagayu wa kamatang ya.

²¹ Galay au anke fakauriun ay anke namatangan at mauri,

²² nu glag o angku kata kway lang sik fagbaugun at yud e fagsafulun ay at yud gtogdungug.

²³ Dewa katanya, gufud tuo gugat ay gbakvd angku.

²⁴ Am ngay fangatulun, si tua gugat angku, ay nataban tuo angku sas fagmanabayanun.

²⁵ Fagayu tagsis banwa, we masuad sa angku nu bunway o way lang. Ay sas day emu, kwa yangay e fakaylatun ya fagayu tagsis fagdaul daga.

²⁶ Ku Dius, dewa ku bilug ay ku amatanganan anmomuy, nafabitsug tuo angku, ay gufud tuo gugat angku.

²⁷ Umfaurianan ban ngay taw at natalyuyan emu. Ay gfabul ban o fagayu at nafamabo emu.

²⁸ Yawi, ku Fun, dewa katanya kaylat ktua nangakbang sa emu. Ay o wan ku fagsarigan. Ay namoyung au am ngay nafakamulun.