Alubad. 59 - Fanawbuid tagsibaliwas Fakayabian

Alubad 59 Sik Darangin laman Dius Gfaragang at Mauri

Laman sa tagfangguna alubad: Dabid at alubad. Nu karuri kata sik alubad at ngayan te, “Lag Giklas.” Gina Saul nasugu sik ngay taw laman gulit Dabid at bale laman gfabul anya.

¹ Dius, falangfei ay dirii angku siginan ku ngay fawayan takaylat gyafabulun angku.

² Falangfei angku siginan at mauri ay takamabul fag ngay taw.

³ Yawi, damai! Kanya fag ngay taw at madot gsuksuan angku, ay gbalabag laman namabul, deyud au e asalanan.

^4-5 Kdoma e nafakamulun at mauri, dewa katanya kanya fagayu mafalganan laman namawayan angku. Yawi, at Mabalyanan fag Dius, ay Israel at Dius, fakamuluni wan! Faurianani wan tibak talun at ngay taw at yud gafanud sa emu. Lag o kafanyu ya takamuag fag ngay taw.

⁶ Galay yabi kanya fagayu kafoli sas furuan, ay kaduge glao guro, kata ngay idu nu gsubang.

⁷ Dius, dungugani takamalingun at ngay nalong, kata sik fiso at maglat. Ay kanya fagayu glong te, “We gdungug antam.”

⁸ Yawi, dewa katanya kase way o ay gfalingun tibak talun at ngay taw yud gafanud sa emu.

⁹ Dius, siginan emu ku fagmabitsugun. Gfanya au emu, aroro o wan ku fagsarirungan.

¹⁰ Aroro kesug tuo angku, andasug o, ay nafalag o sa angku ku ngay fawayan nu gababawan.

¹¹ Ay dewa katanya lag yap vtv gfabul anya fagayu, laman ku ngay kaiban wa kalyam te, o wan at nafalangfe emi. Em Fun ay em tagbalabag, siginan am fagmabalyananun, famomuyi ay fababawani em ngay fawayan.

¹² Aroro at ngay nalong mauri way ay kamatungudun, e gumamat ban nangus anya fagayu. Ay aroro kanya fagayu kamalingun ay kamuag,

¹³ fasurei sa anya am dotama, ay famini wan anggan nalyam. Ay fagayu taw sas fagdaul daga sumaful te, o wan tagfagtainan ngay taw Israel.

¹⁴ Galay yabi kanya fagayu kafoli sas furuan, ay kaduge glao guro, kata sik ngay idu nu gsubang.

¹⁵ Kanya fagayu glao gfafagdaul furuan laman namauri ngay taw, kata sik ngay idu tagrvbvy at fakonun, ay guro yay gugat yakmay napsug.

¹⁶ Dewa katanya, galay balabag, galubad au sabaliwa am fagmabalyananun ay nu mafangesug o, aroro o wan ku fagsarirungan gina au gidapan.

¹⁷ Ku Dius at mafangesug, o wan ku fagmabitsugun ay ku fagsarirungan. Ay galubad au sik ngay alubad tagfauseganan emu.