Alubad. 49 - Fanawbuid tagsibaliwas FakayabianAlubad 49 At Yud e Fagsafulun fag Taw Tagafanud sas Ramraman Laman sa tagfangguna alubad: Kura at ngay kasugfunanan at alubad. 1 Fagayu tagbanwan ste sfagdaul daga, dungugani. 2 Dewa o sik takadungug ay sik maidap fag taw, ay sik maramraman ay sik yud e kwa, dungugani! 3 Namoyung au at mamatanganan fag ngay longan, ay siginan ku foyungan, umke fagsafulun tuo. 4 Gdungugan au ngay fangatulun. Ay gfayamag au sik fagintoun at masuksuk kaduge au gfawang sik fagfawangun ke ngay bakyang. 5 Wain ku fakalimuun yay fagmauriun nu ndasug, ay ku ngay fawayan nu gligung angku? 6 Kafag ngay taw tagseg ay takamatungudun sat ramraman. 7 Dewa katanya, kanya fagayu wa makatu gbayad sas Dius laman gfalangfe at ngay sadili siginans fakabulun. 8 Mabyat taw at leleg nu kabayad, nu katanya, we taw mafabayad, 9 laman ngaduge tua ban nu gleleg ay di kabul ya. 10 Fagayu taw saful oma te, dewa at ke fagsafulun fag taw kabul way, ay katanya yangay at kumfasludan sat yud e fagsafulun ay sa takamaogatun fag taw. Ay at ngay ramraman ban umfamato wan sat ngay iba. 11 Kabavn ban kanya fagayu gbanwan sis fagfolian, dewa yay e fagagbilugun talun. 12 Ngay taw, dewa maramraman, wa glugo nu gleleg. Kabul way kata sik fagbaugun. 13 Ay katanya yangay ban at kumdasug sa tagseg at sadili, ay anggan ban ngay tagafanud kanya fag ngay taw at longan. 14 Kanya fagayu at fagnangadasugan sa ways fagfolian. Ay fakabulun wan tagtabanan anya fagayu sanya sfagfolian, kata sik tagalaga tupa nu gfangguna. Ay umdasug ban sik balabag, at matuyan fag ngay taw gfangguna kafag ngay taw. Kanya fagayu wa si ya at ngay mesa bale, abat ngate, at ngay bilug kadan wan sis fagfolian. 15 Dewa katanya, Dius gbul angku, ay gfalangfe ku leleg siginans fakabulun at fagmabalyananun. 16 Lag o kamomuy, dewa sik taw mauri karamraman, ay dewa kafamut at ngay ramraman. 17 Aroro kanya ban fagayu nu nbul wan, wa ban gbuba at ngay ramraman sas fagfolian. 18 Kaduge kanya fagayu gleleg, gtap at sadili te, mauseganan, ay tibak taw gfauseganan anya, aroro nusnga setaw at fagdalanun, manabayan tua gugat. 19 Dewa katanya, kanya ban fagayu umbul yangay, kata at ngay mangaguyang, ay nangaful sa sik buknga at madulum kabavn. 20 Sik maramraman fag taw at yud gtogdungug at matuyan, umbul ban kata sik fagbaugun. |
Copyright © 2021 by OMF International, Philippines
OMF International