Alubad. 44 - Fanawbuid tagsibaliwas Fakayabian

Alubad 44 Darangin laman Dius Gfalangfe

Laman sas tagfangguna alubad: Kura at ngay mangaguyang at alubad.

¹ Dius, nadungug ami siginan em ngay mangaguyang am nafakamulun sa anya gina yay kanya fagayu gleleg.

² Siginan am fagmabalyananun, naiyan o tibak gaban taw at yud gafanud sa emu siginan at furuan, ay nafaurianan o anya fagayu. Dewa katanya, nafabanwan tuo sanya em ngay mangaguyang, ay nafae ramraman tuo.

³ Em ngay mangaguyang nagbilug at fagbanwanan ay nababo at ngay fawayan bunwa siginan at ngay famabul ay at fagmabitsugun, nu bunway siginan tua am fagmabalyananun tagfasaful te, sanya o, aroro kesug tuo anya fagayu.

⁴ Dius, o wan em Fun at nafababo emi aroro ami wan Akub at kasugfunanan.

⁵ Siginan am gubuk nababo tuami, ay nasiad ami em ngay fawayan.

⁶ Ay dakdi gseg ku fiso ay ku godun laman mababo au,

⁷ aroro o tua at nafababo emi sa em ngay fawayan ay nafapla o kanya fagayu.

⁸ Dius, o tua gugat em fakamatungudunun, ay em fagfausegananun kabavn ban.

⁹ Dewa katanya, katsi naiyan wo emi, ay nafaplan. Ay wo galo ya em ngay tagfawayan.

¹⁰ Ay nafababawan wo emi sa em ngay fawayan, ay kanya fagayu nagbilug wan em ngay fagagbilugun.

¹¹ Nafabayan wo emi kata sik tupa nu gafilasan, ay nafasaruayan sa sangay furuan ayu daul.

¹² Dewa ami am fagagbilugun fag ngay taw, nafalo wo emi sa talay fag famayad, ay nusdi at famamut sirut wo nabul ya.

¹³ Nafaplan o emi ay tibak talun taw gfalingun kase emi.

¹⁴ Ay nafasik fagfalingunun o emi sas fagayu talun, ay kanya fagayu gligbat gfalingun emi.

¹⁵ Nafaplan o angku at kaksvnan kwa madama ya emu.

¹⁶ Kabavn em dungganan ang way lang em ngay fawayan takaylat gfasud emi at famalingun at famauri.

¹⁷ Ay tuy fagayu anfasludan sa emi, dewa ami gamatang gugat emu ay gfaning tam nasadian.

¹⁸ Di mi natalyuyan emu, ay dimi nasaruy am faugali.

¹⁹ Dewa katanya, nafamomuy o ay nafabanwan emi sa ngay idu talun at fagbanwanan at maksvn nu madulum. Ay natabun o emi fagmadulumun.

²⁰ Dius, o nunda ro nu natalyuyan ami emu ay nadarangin sa tibak fagsegan,

²¹ o wa ro wo saful? At matuyan, saful way o dewa ngay taw at fagsuksukun sit amatanganan.

²² Aroro gafanud ami sa emu, kabavn munakbang ami gugat sas fakabulun. Ay tibak taw nu glag, kata way mi sik fagfilasun fag ngay tupa.

²³ Ku Fun, fakamuluni wan! Wain am fagyudun gfakamulun wan? Bunwa ban nangus kabavn nu gaiyan o emi.

²⁴ Wain am fagsuksuanun emi, ay am fagyudun kasalag em ngay fagidapun? Wain am fagyudun gfaragang ngay taw nu gfaurianan emi?

²⁵ Mataygilid ami sisad lukbu, ay wami manangalindug ya.

²⁶ Dius, siginan nu mafangesug o, gubuki ay falangfei emi.