Alubad. 42 - Fanawbuid tagsibaliwas Fakayabian

Alubad 42 Sik Taw at ke Fagidapun Takaylat Nanseg sas Yawi at Bale

Laman sas tagfangguna alubad: Kura at ngay kasugfunanan at alubad.

¹ Dius, kaylat kwa daul nangakbang sa emu, kata sik arasyo nu gananginumun sa sik liskung.

² Tagleleg fag Dius, kaylat kwa daul nangakbang sa emu. Ginain ya ban manga nu mananseg au emu?

³ Kayu menit ay yabi abat ngate au gfangon gwayway kway, kadugenya ngay taw glong sa angku te, “Dada wan am Dius?”

⁴ Gidapan au gamatangan nu namatang kway ebi gina au gfangguna ngayuk taw taglao sam bale, laman nangalubad ami nanseg ay nangudguroan namauseganan emu.

⁵ Wain yay ku fakabaluun ay ku fagafanawaun? Umke fagsegun ktua nangus sa emu. Ku Tagfalangfe fag Dius, gdog kyay gfauseganan emu.

^6-7 Ku amatanganan anmomuy. Ku ngay fagidapun kata sik lugwak ay kata sik takalung fag tagbungan nasuklub angku. Aroro e fagidapun kway ste sis Liskung Urdan, ay sis Ermun fag ngay buksul, ay sis buksul Misar, ay kwa mananseg emu sam bale. Dewa katanya, gamatang ktua gugat emu.

⁸ Yawi, kayu menit gfasure tuo sa angku te, mafangesug o, ay kayu yabi galubad ktua gugat am alubad ay kanya yangay ku darangin sa emu, aroro o tua tagagbilug ku leleg.

⁹ Dius o wan at mogat ku fagsarigan, ay ginto au sa emu te, “Wain am fagnalyamun angku? Wain ku fakabaluun gugat siginan ku ngay fawayan at famalingun angku?”

¹⁰ Ku ngay fawayan nu gfauri angku kata sik fiso at kintalfus sa ku bini. Ay kanya fagayu glong way gugat te, “Dada wan am Dius?”

¹¹ Wain yay ku fakabaluun ay ku fagafanawaun? Umke fagsegun ktua nangus sa emu. Ku Tagfalangfe fag Dius, gdog kyay gfauseganan emu.